Bíblia troka ema nia moris

SAIDA mak lori kontente neʼebé boot liu ba mane ida husi rai-Eskósia duké ninia susesu nuʼudar negósiu-naʼin? Saida mak ajuda mane ida iha rai-Brazíl atu husik ninia moris neʼebé la morál no mós para fuma kokaína? Oinsá mane ida neʼebé moris iha rai-Eslovénia konsege husik ninia toman atu hemu tua demais? Lee toʼok sira-nia esperiénsia.

“Haʼu hanoin haʼu-nia moris mak diʼak.”​—JOHN RICKETTS

TINAN MORIS: 1958

HUSI RAI: ESKÓSIA

MORIS ULUK NIAN: NEGÓSIU-NAʼIN NEʼEBÉ SUSESU

HAʼU-NIA MORIS ULUK NIAN: Haʼu-nia tempu labarik toʼo foin-saʼe mak diʼak. Haʼu-nia apá mak tropa ba militár Bretaña, tan neʼe ami-nia família muda ba fatin oioin. Ami hela iha fatin oioin hanesan rai-Eskósia, rai-Inglaterra, rai-Alemaña, rai-Kénia, rai-Malázia, rai-Irlanda no rai-Xipre. Husi tinan ualu, haʼu tama asrama iha rai-Eskósia. No ikusmai haʼu gradua husi Universidade Cambridge.

Bainhira haʼu tinan 20, haʼu komesa serbisu iha área petrolífera no halo serbisu neʼe durante tinan ualu. Foufoun haʼu halo serbisu neʼe iha Amérika Súl, tuirmai iha Áfrika no ikusmai iha Austrália Oeste. Kuandu haʼu muda ba rai-Austrália, haʼu loke kompañia neʼebé halo investimentu no ikusmai faʼan kompañia neʼe.

Osan husi faʼan kompañia neʼe bele sustenta haʼu-nia moris, tan neʼe haʼu para serbisu kuandu haʼu tinan 40. Haʼu iha tempu livre barak, tan neʼe haʼu lori motór haleʼu rai-Austrália dala rua. No haʼu mós halo viajen haleʼu mundu. Haʼu hanoin haʼu-nia moris mak diʼak.

OINSÁ BÍBLIA TROKA HAʼU-NIA MORIS: Antes haʼu para serbisu, haʼu komesa buka dalan atu fó obrigadu ba Maromak tanba haʼu iha moris neʼebé diʼak. Haʼu komesa tuir Igreja Anglikanu. Haʼu sai boot ho relijiaun neʼe. Maibé igreja neʼe ladún hanorin kona-ba Bíblia. Tuirmai, haʼu komesa estuda ho ema husi relijiaun Mormon, maibé haʼu la gosta tanba sira-nia hanorin la bazeia ba Bíblia.

Loron ida, Testemuña ba Jeová dere haʼu-nia odamatan. Haʼu bele haree kedas katak sira-nia hanorin bazeia ba Bíblia. Eskritura ida neʼebé sira hatudu ba haʼu mak 1 Timóteo 2:3, 4. Versíkulu sira-neʼe hatete katak Maromak hakarak “ema hotu hetan salvasaun no hetan koñesimentu neʼebé loos kona-ba lia-loos”. Haʼu admira tebes ho Testemuña sira tanba sira fiar katak la toʼo atu hetan deʼit koñesimentu maibé presiza mós iha koñesimentu neʼebé bazeia ba Bíblia.

Hodi estuda Bíblia ho Testemuña ba Jeová, neʼe ajuda haʼu atu hetan koñesimentu neʼebé loos. Porezemplu, haʼu aprende katak Maromak no Jesus laʼós parte ba Trindade, maibé sira rua ketaketak. (João 14:28; 1 Korinto 11:3) Haʼu kontente tebes atu aprende lia-loos simples neʼe. No haʼu la kontente tanba uluk haʼu gasta tempu barak atu koko komprende doutrina Trindade.

Lakleur deʼit haʼu komesa tuir reuniaun sira husi Testemuña ba Jeová. Haʼu admira ba laran-diʼak neʼebé sira hatudu. Sira hotu iha morál diʼak, haʼu hanoin sira mak hanesan santu sira. Domin neʼebé loos neʼebé sira hatudu ba malu book haʼu atu fiar katak haʼu hetan ona relijiaun neʼebé loos.​—João 13:35.

BUAT DIʼAK NEʼEBÉ HAʼU HETAN: Depois haʼu hetan tiha batizmu, haʼu hasoru feto diʼak ida naran Diane. Nia sai boot nuʼudar Testemuña ba Jeová no nia hatudu hahalok furak oioin neʼebé haʼu gosta. Ikusmai ami kaben. Diane apoia haʼu no sai nuʼudar haʼu-nia belun. Neʼe mak bensaun husi Jeová.

Diane no haʼu hakarak tebes atu muda ba área neʼebé presiza liután haklaken-naʼin. Iha tinan 2010, ami muda ba rai-Belize iha Amérika Sentrál. Iha neʼe, ami haklaken ba ema neʼebé hadomi Maromak no buka lia-loos.

Haʼu sente dame iha laran tanba hatene ona lia-loos kona-ba Maromak no ninia Liafuan Bíblia. Nuʼudar haklaken-naʼin tempu-tomak, haʼu iha priviléjiu atu hanorin ema balu kona-ba Bíblia. La iha buat ida mak diʼak liu fali haree oinsá Bíblia ajuda ema nia moris sai diʼak liu, hanesan Bíblia ajuda haʼu-nia moris. Ikusmai haʼu hetan dalan diʼak liu atu hatoʼo obrigadu ba Maromak tanba haʼu-nia moris diʼak.

“Sira hatudu laran-diʼak mai haʼu.”​—MAURÍCIO ARAÚJO

TINAN MORIS: 1967

HUSI RAI: BRAZÍL

MORIS ULUK NIAN: HALAʼO MORIS NEʼEBÉ LA MORÁL

HAʼU-NIA MORIS ULUK NIAN: Haʼu sai boot iha sidade kiʼik ida naran Avaré iha distritu São Paulo. Ema neʼebé hela iha neʼebá mak serbisu-naʼin sira.

Haʼu-nia apá mate bainhira haʼu-nia amá isin-rua haʼu. Bainhira haʼu kiʼik, haʼu hatais haʼu-nia amá nia roupa kuandu nia sai hela. Haʼu komesa halo jeitu hanesan feto no ema seluk komesa haree haʼu nuʼudar omoseksuál. Ikusmai, haʼu komesa halo relasaun seksuál ho labarik-mane seluk no mane sira.

Bainhira haʼu besik tinan 20, haʼu buka ema oioin atu halo relasaun seksuál, inklui feto no mós mane. Haʼu buka sira iha fatin naran deʼit, hanesan iha bar, diskoteka no mós igreja sira. Iha tempu karnavál, haʼu hatais hanesan feto no dansa ho grupu boot ida. Ema barak gosta haʼu.

Haʼu habelun ho ema oioin, inklui ema omoseksuál, feto aat no drogadu sira. Sira balu book haʼu atu koko kokaína, lakleur deʼit haʼu labele para atu uza. Dala ruma haʼu fuma droga durante kalan tomak. Tempu seluk, haʼu haketak an husi ema seluk no fuma kokaína durante loron tomak. Haʼu sai isin krekas, tan neʼe ema komesa habelar lia-bosok katak haʼu iha moras AIDS.

OINSÁ BÍBLIA TROKA HAʼU-NIA MORIS: Maizumenus iha tempu neʼebá, haʼu hasoru Testemuña ba Jeová. Sira hatudu laran-diʼak mai haʼu. Eskritura ida neʼebé sira lee ba haʼu mak Roma 10:13 neʼebé dehan: “Ema hotu neʼebé bolu Jeová nia naran sei hetan salvasaun.” Liafuan sira-neʼe ajuda haʼu komprende katak importante tebes atu uza Jeová nia naran. Dala barak, kuandu haʼu fuma tiha kokaína durante kalan tomak, haʼu loke janela, hateke ba lalehan, tanis no halo orasaun ba Jeová hodi husu nia atu ajuda haʼu.

Haʼu hanoin barak kona-ba haʼu-nia amá neʼebé sai laran-triste tebes tanba droga sira estraga haʼu-nia moris. Tan neʼe, haʼu deside atu la uza tan droga. Lakleur depois neʼe, haʼu simu estuda Bíblia husi Testemuña ba Jeová. Sira hatete ba haʼu katak estuda Bíblia sei ajuda haʼu atu para uza droga. No neʼe ajuda duni.

Bainhira haʼu estuda Bíblia, haʼu rekoñese katak haʼu presiza troka dalan neʼebé haʼu halaʼo haʼu-nia moris. Susar tebes ba haʼu atu husik haʼu-nia hahalok omoseksuál. Neʼe mak hahalok neʼebé haʼu halo durante tempu kleur ona. Buat ida neʼebé ajuda haʼu mak buka kolega foun neʼebé iha hahalok diʼak. Haʼu mós la habelun tan ho ema sira neʼebé uluk haʼu ransu no la bá tan bar no diskoteka.

Maski la fasil atu halo mudansa sira-neʼe, maibé haʼu hetan kmaan hodi hatene katak Jeová tau matan ba haʼu no komprende susar neʼebé haʼu hasoru. (1 João 3:19, 20) Iha tinan 2002, haʼu para ona haʼu-nia hahalok omoseksuál hotu no iha tinan neʼe mós, haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN: Haʼu-nia amá kontente tebes ho mudansa sira neʼebé haʼu halo, tan neʼe nia mós komesa estuda Bíblia. Maibé triste mak nia kona estrok. Maski nuneʼe, nia kontinua haburas domin ba Jeová no hafolin lia-loos husi Bíblia.

Durante tinan ualu ona, haʼu haklaken tempu-tomak no uza tempu barak atu hanorin Bíblia ba ema seluk. Dala ruma, haʼu nafatin presiza luta hakarak neʼebé sala. Maibé haʼu hetan aten-brani hodi hatene katak bainhira haʼu la halo tuir haʼu-nia hakarak sira, haʼu halo Jeová kontente.

Hodi hakbesik ba Jeová no moris iha dalan neʼebé halo nia kontente neʼe ajuda haʼu atu respeitu haʼu-nia an. Ohin loron, haʼu mak mane ida neʼebé kontente.

“Haʼu mak bidón neʼebé kuak.”​—LUKA ŠUC

TINAN MORIS: 1975

HUSI RAI: ESLOVÉNIA

MORIS ULUK NIAN: HEMU TUA DEMAIS

HAʼU-NIA MORIS ULUK NIAN: Haʼu moris iha rai-Eslovénia nia sidade kapitál naran Ljubljana. Haʼu-nia moris kontente toʼo haʼu tinan haat. Tuirmai haʼu-nia apá oho an. Depois akontesimentu triste neʼe, haʼu-nia amá tenke serbisu makaʼas atu tau matan haʼu no haʼu-nia maun.

Bainhira haʼu tinan 15, haʼu hela ho haʼu-nia avó-feto. Haʼu gosta hela ho nia tanba haʼu-nia kolega barak hela iha ninia bairru. Haʼu mós iha liberdade barak liután kuandu hela ho haʼu-nia avó duké ho amá. Bainhira haʼu tinan 16, haʼu komesa ransu ho ema neʼebé gosta lanu iha findesemana. Haʼu-nia fuuk naruk, haʼu komesa hatais hanesan ema neʼebé gosta kontra no ikusmai komesa fuma.

Maski haʼu koko droga oioin, maibé ikusmai haʼu toman liu atu hemu tua demais deʼit tanba haʼu sente neʼe lori kontente neʼebé diʼak liu. Foufoun haʼu hemu tintu kopu balu iha tempu ida, maibé liutiha tempu balu haʼu hemu tintu botir balu iha tempu ida. Haʼu sai matenek atu finje katak haʼu la lanu todan. Dala ruma, ema bele nota katak haʼu hemu tanba deʼit haʼu iis tua. Maski nuneʼe, ema labele nota katak haʼu hemu ona tintu ka serveja litru balu no mós vodka.

Dala barak, haʼu mak ajuda haʼu-nia belun atu hamriik no sai husi diskoteka maski loloos karik haʼu hemu dala rua barak liu fali sira. Loron ida, haʼu rona haʼu-nia belun ida hatete katak haʼu mak bidón neʼebé kuak, iha língua Eslovenu ema uza ida-neʼe atu hatún ema neʼebé bele hemu tua barak. Liafuan neʼe halo haʼu laran-kanek.

Haʼu komesa hanoin didiʼak kona-ba dalan neʼebé haʼu halaʼo haʼu-nia moris. Haʼu sente folin-laek tebes. Haʼu-nia moris hanesan la iha objetivu.

OINSÁ BÍBLIA TROKA HAʼU-NIA MORIS: Maizumenus iha tempu neʼebé hanesan, haʼu nota katak haʼu-nia kolega eskola ida nia hahalok troka, nia sai laran-maus. Haʼu hakarak hatene tanbasá nia halo mudansa, tan neʼe haʼu konvida nia atu bá hemu kafé. Kuandu ami koʼalia hamutuk, nia esplika katak nia estuda Bíblia ho Testemuña ba Jeová. Nia fahe ba haʼu buat balu neʼebé nia aprende. Buat hotu neʼe mak foun tebes mai haʼu tanba haʼu la iha relijiaun ida. Haʼu komesa tuir Testemuña sira-nia reuniaun no estuda Bíblia ho sira.

Bainhira haʼu estuda Bíblia, haʼu aprende lia-loos furak oioin neʼebé kona tebes haʼu-nia laran. Porezemplu, haʼu aprende katak ita moris iha tempu neʼebé Bíblia bolu nuʼudar “loron ikus sira”. (2 Timóteo 3:1-5) Haʼu mós aprende katak lakleur Maromak sei halakon ema aat hotu husi mundu no fó oportunidade ba ema diʼak atu moris ba nafatin iha mundu paraízu. (Salmo 37:29) Haʼu hakarak tebes atu troka haʼu-nia dalan moris atu nuneʼe haʼu bele adora Maromak hamutuk ho ema sira-neʼe.

Haʼu komesa fahe buat neʼebé haʼu aprende husi Bíblia ba haʼu-nia belun sira. Sira barak goza haʼu, maibé tuir loloos neʼe ajuda haʼu iha dalan neʼebé haʼu la imajina. Sira-nia reasaun ajuda haʼu atu komprende katak sira laʼós belun neʼebé loos. Haʼu rekoñese katak haʼu-nia problema kona-ba hemu tua demais mak liga ho ema neʼebé haʼu ransu. Semana tomak haʼu hein namanas ba findesemana atu haʼu bele lanu.

Haʼu para ransu ho sira no komesa ransu fali ho ema neʼebé hametin haʼu, Testemuña ba Jeová. Haʼu hetan anima barak bainhira haʼu ransu ho sira. Testemuña sira hadomi tebes Maromak no hakaʼas an atu moris tuir ninia matadalan sira. Neineik-neineik, haʼu konsege para haʼu-nia toman atu hemu tua demais.

BUAT DIʼAK NEʼEBÉ HAʼU HETAN: Haʼu agradese tebes ba Jeová tanba agora haʼu la presiza tua atu bele sente kontente. Haʼu la hatene saida mak sei akontese ba haʼu se haʼu la troka haʼu-nia moris. Maibé haʼu fiar metin katak agora haʼu-nia moris diʼak liu.

Tinan hitu ona, haʼu serbí iha sukursál husi Testemuña ba Jeová iha rai-Eslovénia. Agora haʼu-nia moris iha objetivu tanba haʼu koñese no serbí Jeová.