1, 2. (a) Oinsá mak Jesus hatudu katak importante duni atu prepara didiʼak antes halo buat ruma? (b) Prepara didiʼak importante, liuliu kuandu harii saida?

 ATU harii uma ida ema tenke prepara didiʼak. Antes komesa harii uma, ema tenke sosa rai no hanoin kona-ba uma sei boot oinsá no iha kuartu hira. Maibé, iha buat ida tan neʼebé importante tebes. Jesus hatete: “Imi ida neʼebé mak, atu halo uma aas ida, la tuur uluk lai atu sura buat neʼebé kuran, hodi haree nia iha osan ka lae atu halo toʼo hotu?”—Lucas 14:28.

² Hanoin uluk kona-ba buat neʼebé kuran, ka buat neʼebé presiza, mak importante kuandu prepara atu harii uma ida, no ida-neʼe mós importante se ema hakarak  harii moris kaben nian neʼebé kontente. Ema barak hatete: “Haʼu hakarak kaben.” Maibé sira barak ladún hanoin kona-ba buat neʼebé presiza. Maski Bíblia koʼalia kona-ba moris kaben nian nuʼudar bensaun ida, Bíblia mós hatete katak ema neʼebé kaben iha responsabilidade barak no sei hasoru susar balu. (Provérbios 18:22; 1 Korinto 7:28) Nuneʼe, sira neʼebé hakarak kaben tenke hanoin didiʼak kona-ba buat sira-neʼe hotu.

3. Tanbasá mak Bíblia bele ajuda sira neʼebé hakarak atu kaben? Bíblia nia konsellu bele ajuda ita atu fó resposta ba pergunta tolu saida?

³ Bíblia bele ajuda ita atu prepara didiʼak ba moris kaben nian neʼebé kontente. Bíblia nia konsellu mai husi Ida neʼebé hahú arranju kaben nian, Maromak Jeová. (Efeso 3:14, 15; 2 Timoteo 3:16) Maski Bíblia tuan ona, maibé ninia konsellu sei diʼak tebes ba ita ohin loron. Hodi uza konsellu husi Bíblia, mai ita hanoin kona-ba: (1) Oinsá mak ita hatene katak ita prontu ona atu kaben? (2) Ita hakarak kaben ho ema neʼebé iha hahalok saida deʼit? no, (3) Oinsá mak ita bele halo tempu namora nian moos nafatin?

4. Saida mak importante atu kaben-naʼin bele iha relasaun neʼebé metin? Tanbasá?

⁴ Atu harii uma, ema tenke planu ho didiʼak, maibé sira mós tenke hakaʼas an atu tau matan ba uma neʼe. Nuneʼe mós kona-ba kaben. Ema barak hanoin deʼit kona-ba namora no loron kazamentu; maibé importante mós atu hanoin kona-ba oinsá atu tau matan ba relasaun nuʼudar kaben-naʼin tinan ba tinan. Saida mak bele ajuda kaben-naʼin sira atu iha relasaun neʼebé metin? Buat neʼebé importante mak sira hatudu laran-metin ba malu toʼo mate. Kona-ba neʼe Bíblia hatete: “Mane sei husik nia aman ho nia inan hodi moris hamutuk ho nia feen; sira naʼin-rua sei sai isin ida deʼit.” (Mateus 19:5) Bíblia hatete razaun ida deʼit atubele soe  malu hodi bele kaben fali ho ema seluk. Jesus Kristu temi razaun ida-neʼe, neʼe mak “sala-foʼer”, katak halo relasaun seksuál ho ema neʼebé laʼós sira-nia kaben. (Mateus 19:9) Se Ita hakarak kaben, diʼak atu hanoin kona-ba Bíblia nia konsellu sira-neʼe. Entaun, se Ita seidauk prontu atu hatudu laran-metin ba ema neʼebé sei sai Ita-nia kaben, neʼe katak Ita seidauk prontu atu kaben.—Deuteronômio 23:21; Mateus 5:33, 37.

5. (a) Tanbasá mak ema balu taʼuk atu kaben? Maibé, tanbasá mak diʼak atu laran-metin ba malu? (b) Antes feto ida kaben, nia tenke hanoin kona-ba saida?

⁵ Ema balu sente taʼuk kuandu sira hanoin katak sira tenke laran-metin ba malu toʼo mate. Maibé, Ita sei la sente todan kona-ba neʼe se Ita loloos hadomi ema neʼebé Ita hakarak kaben. Tuir loloos, hatudu laran-metin ba malu halo kaben-naʼin sira sente seguru. Tanba sira hakarak moris tuir sira-nia juramentu kaben, neʼe katak sira hakarak atu moris hamutuk nafatin maski iha tempu diʼak no susar nia laran, no sira sei apoia malu kuandu hasoru problema naran deʼit. Apóstolu Paulo hakerek katak domin neʼebé loos “tahan terus hotu” no “lori todan hotu”. (1 Korinto 13:4, 7) Ba feto sira, iha buat ida tan neʼebé importante atu hanoin-hetan. Bíblia hatete katak iha família laran laʼen mak feen nia “ulun”. (1 Korinto 11:3) Antes feto ida kaben, nia tenke halo tuir inan-aman nia hakarak, maibé kuandu kaben ona nia tenke halo tuir ninia laʼen. Tan neʼe, feto-klosan tenke husu nia an: “Haʼu prontu ka lae, atu hakruʼuk ba mane neʼe?” Tempu atu hanoin kona-ba pergunta neʼe mak antes kaben, laʼós depois kaben.—Roma 7:3.

6. Tanbasá mak diʼak atu la kaben sedu, kuandu sei joven?

⁶ Atu hatudu laran-metin ba malu ema ida tenke iha kbiit atu halo desizaun neʼebé matenek. Maibé kuandu ema sei joven, hakarak seksuál neʼebé makaʼas foin mosu, no hakarak seksuál neʼe bele book sira atu halo desizaun neʼebé la matenek. Tan neʼe, diʼak liu atu la  kaben kuandu sei joven. No mós nuʼudar joven sira sai boot sira-nia isin no hanoin troka beibeik. Ema barak neʼebé kaben kuandu sira sei joven sai la kontente tinan balu depois sira kaben tanba sira-nia presiza no hakarak sai la hanesan ona. Iha relatóriu neʼebé hatudu katak ema neʼebé kaben kuandu sira sei joven, dala barak liu sira la kontente no buka atu soe malu. Tan neʼe, keta kaben sedu. Hodi moris ba tinan balu nuʼudar ema boot neʼebé klosan, bele ajuda Ita hetan kbiit atu halo desizaun neʼebé matenek. Esperiénsia hanesan neʼe iha folin boot no bele halo Ita sai kaben-naʼin neʼebé diʼak. La kaben sedu mós bele ajuda Ita atu hatene didiʼak Ita-nia an, neʼe mak buat neʼebé importante tebes atu iha relasaun diʼak ho Ita-nia kaben.

7. Tanbasá mak ema neʼebé hakarak kaben ulukliu tenke hatene didiʼak nia an?

⁷ Fasil deʼit atu mehi kona-ba kaben ho ema neʼebé iha hahalok diʼak liu hotu, loos ka lae? Sin. Maibé, oinsá ho Ita-nia an rasik? Ita iha hahalok saida deʼit neʼebé bele ajuda Ita atu harii moris kaben nian neʼebé kontente? Ita sei sai laʼen ka feen oinsá? Porezemplu, Ita prontu atu rekoñese Ita-nia sala no simu konsellu ka lae? Ka Ita sempre nega Ita-nia sala kuandu ema korrije Ita? Ita gosta hamnasa no hanoin buat diʼak? Ka Ita sente an lalais no muramura? (Provérbios 8:33; 15:15) Keta haluha, kuandu Ita kaben, ida-neʼe la troka Ita-nia hahalok. Se Ita foti-an, ka sai triste no hirus lalais kuandu Ita sei klosan, hahalok neʼe sei la troka bainhira Ita kaben. Tanba kusta atu hatene diʼak Ita-nia an, karik diʼak atu husu toʼok inan, aman ka belun ida atu fó-hatene kona-ba Ita-nia hahalok no oinsá Ita bele hadiʼa hahalok neʼebé la diʼak. Se iha duni hahalok neʼebé Ita tenke troka, hakaʼas an atu hadiʼa ida-neʼe antes hanoin atu kaben.

8-10. Bíblia fó konsellu saida deʼit neʼebé sei ajuda ema ida-idak atu prepara ba moris kaben nian?

 ⁸ Bíblia fó-hanoin mai ita atu husik Maromak nia espíritu santu book ita hodi hatudu hahalok hanesan “domin, ksolok, dame, pasiénsia, laran-diʼak, laran-luak, fiar malu [“fiar”, MF], laran-kmaus no ukun an [“kontrola an”, MF]”. Bíblia mós hatete: “Hafoun imi-nia laran ho espíritu no simu tiha ema foun, neʼebé moris mai tuir Maromak nia ilas iha justisa no santidade lia-loos nian.” (Galasia 5:22, 23; Efeso 4:23, 24) Hanesan toʼos-naʼin kuda fini agora atubele koʼa iha futuru, se Ita halo tuir Bíblia nia konsellu agora, Ita mós bele koʼa rezultadu diʼak depois Ita kaben.

⁹ Porezemplu, se Ita mak feto, diʼak tebes se Ita haburas “laran-luak, laran-kmaus” no hahalok diʼak seluk. (Koloso 3:12) Haburas hahalok neʼebé diʼak iha Ita-nia laran importante liu fali hatais ka buat neʼebé ema haree husi liʼur. Hatudu haraik-an no uza kbiit atu hanoin sei ajuda Ita atu iha matenek neʼebé hanesan “koroa furak nian”. (Provérbios 4:9; 31:10, 30; 1 Timoteo 2:9, 10) Se Ita mak mane, diʼak atu hatudu respeitu no laran-diʼak ba feto sira. (1 Timoteo 5:1, 2) No mós, diʼak atu treinu Ita-nia an atu halo desizaun no halaʼo Ita-nia responsabilidade sira ho diʼak, no hatudu haraik-an no laran-diʼak. Tanba se Ita hakarak atu manán deʼit, ida-neʼe sei lori problema iha kaben laran.—Miquéias 6:8; Efeso 5:28, 29; Tiago 4:6.

¹⁰ Maski susar atu hadiʼa ita-nia hanoin no hahalok, maibé importante ba ema kristaun hotu atu halo ida-neʼe. No ida-neʼe sei ajuda Ita atu sai kaben-naʼin neʼebé diʼak liu.

11, 12. Oinsá mak ema naʼin-rua bele buka-hatene se sira bele moris hamutuk nuʼudar feen-laʼen?

¹¹ Iha Ita-nia rai, iha toman atu hili rasik ema neʼebé  mak Ita atu kaben ka lae? Se nuneʼe, Ita bele halo saida kuandu Ita gosta feto ka mane ida? Ulukliu, husu Ita-nia an: ‘Haʼu hakarak kaben duni ka lae?’ La diʼak atu halimar ho ema nia sentimentu kona-ba kaben. (Provérbios 13:12) Tuirmai, husu Ita-nia an: ‘Haʼu prontu loos ona atu kaben ka lae?’ Se Ita hatán “Sin” ba pergunta rua neʼe, hakat tuirmai mak depende ba kostume iha Ita-nia rai. Iha rai balu, depois Ita haree katak ema ida hatudu hahalok neʼebé Ita gosta, karik Ita bele hakbesik nia no fó-hatene Ita-nia hakarak atu koñese nia diʼak liután. Se nia lakohi, karik Ita bele koko atu troka ninia hanoin, maibé labele obriga nia. Hanoin-hetan katak ema seluk mós iha direitu atu halo desizaun rasik kona-ba ida-neʼe. Maibé, se ema neʼe hakarak, karik Ita bele halo atividade ruma hamutuk hanesan laʼo pasiar no vizita kolega ka família. Hodi halo atividade hanesan neʼe sei ajuda Ita atu hatene loos kona-ba ema neʼe nia hahalok sira. a Nuneʼe, saida mak Ita bele buka-hatene kona-ba ema neʼe nia hahalok kuandu Ita hamutuk ho nia?

¹² Atu hatán pergunta ida-neʼe, hanoin toʼok ema naʼin-rua neʼebé toka viola. Kuandu viola ida-idak afina diʼak, viola ida-idak bele halo múzika neʼebé kapás. Maibé oinsá se ema naʼin-rua neʼe toka sira-nia viola hamutuk? Atu halo múzika neʼebé kapás, viola rua neʼe tenkesér afina hamutuk. Hanesan mós ho Ita no ema neʼebé Ita hakarak kaben. Karik imi ida-idak hakaʼas an atu “afina” imi-nia hahalok, maibé pergunta importante mak: Imi naʼin-rua bele “afina hamutuk” ka lae? Neʼe katak, Ita no ema neʼebé Ita gosta nia hahalok bele laʼo hamutuk ka lae?

13. Tanbasá mak la matenek duni atu namora ho ema neʼebé iha fiar la hanesan ho Ita?

¹³ Importante katak imi naʼin-rua iha fiar, no halo  tuir matadalan neʼebé hanesan. Apóstolu Paulo hakerek: “Keta kesi imi an ho . . . sira neʼebé fiar-laek.” (2 Korinto 6:14; 1 Korinto 7:39) Se Ita kaben ho ema neʼebé la fiar Maromak hanesan Ita, problema boot bele mosu. Iha parte seluk, kuandu imi naʼin-rua hadomi no fiar ba Maromak Jeová, ida-neʼe mak hun ba moris kaben nian neʼebé hakmatek. Maromak Jeová hakarak imi atu sai kontente no iha relasaun neʼebé besik ba malu. Nia hakarak imi atu kesi imi-nia an ba Nia no ba malu ho domin, hanesan tali tolu neʼebé bobar hamutuk.—Eclesiastes 4:12.

14, 15. Iha fiar neʼebé hanesan, neʼe toʼo atubele moris hamutuk nuʼudar feen-laʼen neʼebé kontente ka lae? Esplika toʼok.

¹⁴ Maski importante liu atu adora Maromak hamutuk atubele iha moris kaben nian neʼebé hakmatek no kontente, maibé iha mós buat balu tan neʼebé importante. Ita no Ita-nia namora presiza iha planu no hakarak neʼebé hanesan. Nuneʼe, saida mak imi-nia planu sira? Porezemplu, imi naʼin-rua hakarak iha oan ka lae? Saida deʼit mak importante liu iha imi-nia moris? b (Mateus 6:33) Iha moris kaben nian neʼebé kontente, laʼen no feen sai hanesan belun diʼak, sira koʼalia ba malu no gasta tempu hamutuk, maski viziñu sira hanoin katak neʼe la normál. (Provérbios 17:17) Maibé hodi halo nuneʼe, sira presiza iha interese ba buat neʼebé hanesan. Susar atu sai belun ho ema neʼebé iha hanoin la hanesan Ita, tan neʼe iha interese neʼebé hanesan importante liu ba kaben-naʼin sira. Maski nuneʼe, se ema neʼebé Ita gosta iha interese ba atividade ruma, hanesan haree joga bola, maibé Ita la gosta, neʼe katak imi naʼin-rua labele sai feen-laʼen ka lae? Lae. Karik iha buat seluk neʼebé imi naʼin-rua gosta atu halo hamutuk neʼebé mak  importante liu. Liután neʼe, karik Ita bele halo ema neʼebé Ita gosta kontente hodi halo atividade ruma neʼebé nia gosta.—Apostolu 20:35.

¹⁵ Tuir loloos, simu ema neʼebé Ita gosta nia hanoin no hakarak mak importante liu fali duké imi naʼin-rua sempre iha hanoin neʼebé hanesan. Nuneʼe, la presiza husu: “Ami sempre iha hanoin neʼebé hanesan ka lae?” Diʼak liu atu husu: “Saida mak akontese kuandu ami iha hanoin neʼebé la hanesan? Ami bele koʼalia ba malu iha dalan neʼebé hatudu respeitu? Ka, dala barak ami diskute toʼo istori malu?” (Efeso 4:29, 31) Se Ita hakarak kaben, kuidadu ho ema neʼebé foti-an no lakohi rende an, neʼebé nunka simu ema seluk nia hanoin, ka ho laran-makerek buka dalan atu halo deʼit buat ruma tuir ninia hanoin.

16, 17. Kuandu hanoin kona-ba kaben, mane ka feto bele buka hahalok hanesan saida husi ema neʼebé nia gosta?

¹⁶ Kona-ba sira neʼebé bele simu knaar importante iha kongregasaun kristaun, Bíblia dehan, ulukliu “koko sira lai” hodi haree katak “la iha buat aat ruma hasoru sira”. (1 Timoteo 3:10) Ita mós bele uza matadalan ida-neʼe. Porezemplu, feto-klosan ida bele husu nia an: “Mane neʼe iha naran diʼak iha kongregasaun ka lae? Sé deʼit mak ninia kolega? Nia hatudu katak nia bele kontrola an ka lae? Nia hatudu respeitu ba ferik-katuas sira ka lae? Ninia família mak ema hanesan saida? Oinsá mak ninia relasaun ho ninia família? Oinsá mak ninia hanoin kona-ba osan? Nia hemu tua demais ka lae? Nia hirus lalais toʼo halo violénsia ka lae? Nia iha knaar saida deʼit iha kongregasaun? Oinsá mak nia halaʼo knaar sira-neʼe? Haʼu bele hatudu respeitu neʼebé kleʼan ba nia ka lae?”—Levítico 19:32; Provérbios 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.

¹⁷ Mane-klosan ida bele husu nia an: “Feto neʼe hatudu  domin no respeitu ba Maromak ka lae? Nia matenek atu tau-matan ba uma laran ka lae? Ninia família hakarak ami atu kaer responsabilidade saida deʼit ba sira? Nia bele kuidadu osan ho diʼak ka lae? Nia badinas no bele halo desizaun neʼebé matenek ka lae? Nia gosta koʼalia kona-ba saida? Nia ho laran hanoin kona-ba ema seluk nia sentimentu no problema? Ka nia hanoin deʼit nia an, no mete ho ema seluk nia vida? Ema bele fiar nia ka lae? Nia hakruʼuk ba ninia aman no katuas kristaun sira nuʼudar ninia ulun ka lae? Ka nia ulun-fatuk toos, no sempre kontra beibeik?”—Provérbios 31:10-31; Lucas 6:45; Efeso 5:22, 23; 1 Timoteo 5:13.

18. Durante tempu namora, se Ita hatene Ita-nia namora iha fraku ruma, importante atu hanoin-hetan kona-ba saida?

¹⁸ Keta haluha katak ema neʼebé Ita gosta, laʼós ema husi livru istória romántiku, ka telenovela, maibé nia mak Adão nia bei-oan neʼebé sala-naʼin. Ita hotu halo sala, no Ita tenke haluha deʼit sala balu neʼebé Ita-nia namora halo, hanesan nia mós tenke haluha Ita-nia sala balu. (Roma 3:23; Tiago 3:2) No mós, se ema ida hatene katak nia iha fraku ruma, neʼe mak oportunidade ba nia atu hadiʼa problema neʼe atubele sai ema neʼebé diʼak liu. Porezemplu, karik Ita istori malu ho Ita-nia namora. Se nuneʼe, keta haluha katak ema neʼebé hadomi malu mós dala ruma iha hanoin neʼebé la hanesan. (Kompara ho Gênesis 30:2; Apostolu 15:39.) Tan neʼe, karik imi naʼin-rua presiza ‘satan netik imi-nia espíritu’ no aprende oinsá atu rezolve problema ho dame. (Provérbios 25:28; 1 Pedro 2:21-23) Ita-nia namora hatudu katak nia prontu atu troka ninia hahalok ka lae? Oinsá ho Ita? Ita bele troka Ita-nia hahalok atu la sai sente an lalais ka lae? (Eclesiastes 7:9; Tiago 1:19) Aprende atu rezolve problema hamutuk bele ajuda imi atu sempre koʼalia ho laran-moos ba malu, no ida-neʼe importante se imi naʼin-rua deside atu kaben.—Koloso 3:13.

19. Se problema neʼebé sériu mosu durante tempu namora, diʼak liu atu halo saida?

 ¹⁹ Maibé, oinsá se Ita-nia namora iha fraku neʼebé boot liu? Se nuneʼe Ita tenke hanoin didiʼak kona-ba problema ida-neʼe. Maski Ita hadomi no hakarak duni atu kaben ho nia, maibé keta taka matan ba ninia sala neʼebé sériu. (Provérbios 22:3; Eclesiastes 2:14) Se Ita iha dúvida makaʼas kona-ba Ita-nia namora, diʼak liu atu hakotu relasaun ho nia no la promete tan buat ruma ba nia.

20. Oinsá mak ema neʼebé namora bele hatudu nafatin hahalok moos iha dalan morál?

²⁰ Oinsá mak Ita bele halo tempu namora nian moos nafatin? Ulukliu, hatudu nafatin hahalok moos iha dalan morál. Iha Ita-nia rai, kuandu ema namora, sira bele kaer liman, reʼi malu, ka hakoʼak malu ka lae? Maski ema barak simu hahalok hanesan neʼe, maibé ba ema kristaun, sira bele halo hanesan neʼe kuandu sira deside loloos ona atu kaben. Kuidadu atu la hatudu sentimentu domin neʼebé makaʼas liu toʼo halo hahalok neʼebé lamoos ka sala-foʼer. (Efeso 4:18, 19; kompara ho Cântico de Salomão 1:2; 2:6; 8:5, 9, 10.) Ita hotu la bele fiar ba ita-nia laran, tan neʼe matenek se imi naʼin-rua labele mesamesak iha uma neʼebé mamuk, jardín neʼebé ema la iha, ka fatin seluk neʼebé bele book imi atu halo hahalok neʼebé lamoos. (Jeremias 17:9; Tiago 1:14) Hodi halo tempu namora nian moos nafatin hatudu katak Ita bele kontrola Ita-nia an, no hanoin uluk Ita-nia namora nia diʼak duké halo tuir deʼit Ita rasik nia hakarak. Maibé buat neʼebé importante liu, kuandu Ita halo tempu namora nian moos nafatin, ida-neʼe sei halo kontente Maromak Jeová, neʼebé haruka ninia povu atu hadook an husi hahalok neʼebé lamoos no sala-foʼer.—Galasia 5:19-21.

21. Hodi halo tempu namora nian moos nafatin, mane no feto presiza koʼalia ho laran-moos kona-ba saida deʼit?

 ²¹ Halo tempu namora nian moos nafatin inklui mós koʼalia ho laran-moos ba malu. Se Ita ho Ita-nia namora planu atu kaben, imi naʼin-rua tenke koʼalia nakloke kona-ba imi-nia moris iha tempu uluk, no imi-nia planu ba futuru. Porezemplu, imi sei hela iha neʼebé? Imi naʼin-rua sei serbisu atu buka osan ka lae? Imi hakarak atu iha oan ka lae? No mós, diʼak atu dehan sai kona-ba Ita-nia moris iha tempu uluk neʼebé bele kona imi-nia moris kaben. Ida-neʼe karik inklui debe boot neʼebé Ita iha, ka responsabilidade neʼebé Ita iha, ka problema kona-ba Ita-nia saúde, hanesan moras boot ruma neʼebé Ita iha. Ema barak kona HIV (virus neʼebé hamosu moras AIDS, ka moras-sida) no sinál husi moras neʼe la hatudu kedas. Tan neʼe, antes kaben ho ema neʼebé uluk halo relasaun seksuál ho ema balu, ka sona droga liuhusi uat, la sala ba Ita ka Ita-nia inan-aman atu husu uluk nia atu koko raan ba moras AIDS. Se nia iha duni moras neʼe, no Ita lakohi atu kaben, nia labele obriga. Tuir loloos, ema neʼebé envolve an ho hahalok aat hanesan neʼe, antes nia namora ho ema ruma, importante duni ba nia atu koko raan ba moras AIDS.

22, 23. (a) Kuandu prepara ba loron kazamentu nian, noivu no noiva presiza kuidadu atu la hanoin demais kona-ba saida deʼit? (b) Saida mak importante liu atu hanoin kuandu noivu no noiva prepara ba loron kazamentu no moris nuʼudar kaben-naʼin?

²² Fulan balu antes loron kazamentu, karik imi naʼin-rua sei uza tempu barak atu prepara ba loron neʼe. Imi bele hamenus estrese hodi hanoin didiʼak kona-ba oinsá imi bele iha loron kazamentu neʼebé diʼak maibé la gasta osan barak liu. Halo festa boot no gasta osan barak karik halo kontente família no kolega sira, maibé  ida-neʼe halo imi no imi-nia família, sai kolen no lakon osan barak. Loron kazamentu mak loron neʼebé importante loos ba imi naʼin-rua nia moris no fó ksolok tebes ba imi. Entaun, maski diʼak atu halo tuir kostume balu iha loron ida-neʼe, maibé se halo festa boot tan deʼit hakarak atu gaba an, ida-neʼe bele halakon imi-nia laran-haksolok. No mós, maski importante atu hanoin kona-ba ema seluk nia sentimentu, maibé noivu mak iha responsabilidade atu deside kona-ba oinsá mak atu halaʼo festa kazamentu nian.—Joao 2:9.

²³ Hanoin-hetan katak imi-nia loron kazamentu laʼo ba loron ida deʼit, maibé imi-nia moris kaben nian laʼo durante imi-nia moris tomak. Lalika hanoin demais kona-ba oinsá mak atu halaʼo loron kazamentu. Maibé diʼak liu sadere ba Maromak Jeová nia matadalan, no halo planu nanis kona-ba oinsá imi sei halaʼo moris nuʼudar kaben-naʼin. Hodi halo nuneʼe imi hatudu katak imi prepara didiʼak ona atu iha moris kaben nian neʼebé kontente.