Roma 4:1-25
4 Se nuneʼe, buat diʼak saida mak ita-nia beiʼala Abraão hetan?
2 Porezemplu, se Abraão sai nuʼudar ema laran-loos liuhusi ninia hahalok, nia iha razaun atu gaba an ba ema seluk, maibé labele gaba an iha Maromak nia oin.
3 Tanba eskritura dehan saida? “Abraão tau fiar ba Jeová,* no tan neʼe Maromak haree nia nuʼudar ema laran-loos.”+
4 Entaun, ema neʼebé halo serbisu hetan nia kolen nuʼudar buat neʼebé nia merese atu simu,* laʼós nuʼudar prezente ida.*
5 Maibé tuir Maromak, atu sai ema laran-loos, neʼe la depende ba buat neʼebé ema ida halo, tanba hodi tau fiar ba Maromak mak ema neʼe sai ema laran-loos maski nia sala-naʼin.+
6 David mós koʼalia kona-ba ksolok husi ema neʼebé Maromak haree nuʼudar ema laran-loos, maski ida-neʼe laʼós tanba ninia hahalok rasik. David dehan:
7 “Ksolok ba ema neʼebé hetan ona perdua husi sira-nia hahalok aat no sira-nia sala hamoos* ona.
8 Ksolok ba ema neʼebé ninia sala Jeová* la hanoin-hetan tan.”+
9 Entaun, ksolok neʼe ba deʼit ema neʼebé hetan sirkunsizaun* ka? Oinsá ho ema neʼebé la hetan sirkunsizaun?+ Ita dehan ona: “Liuhusi Abraão nia fiar mak Maromak haree nia nuʼudar ema laran-loos.”+
10 Maibé horibainhira mak Maromak haree nia nuʼudar ema laran-loos? Kuandu nia hetan ona sirkunsizaun ka seidauk hetan sirkunsizaun? Kuandu nia seidauk hetan sirkunsizaun.
11 Maromak dehan ba nia atu hetan sirkunsizaun. Ida-neʼe mak sinál+ nuʼudar garantia* katak nia ema laran-loos liuhusi fiar neʼebé nia hatudu kuandu nia seidauk hetan sirkunsizaun. Nuneʼe nia sai aman ba ema hotu neʼebé iha fiar+ maski sira la hetan sirkunsizaun, no Maromak haree sira hotu nuʼudar ema laran-loos.
12 Entaun Abraão mós sai aman ba ema neʼebé hetan ona sirkunsizaun. Nia sai aman laʼós deʼit ba sira neʼebé hetan ona sirkunsizaun iha isin, maibé mós ba sira neʼebé iha fiar hanesan nia. Neʼe mak ita-nia aman Abraão+ nia fiar kuandu nia seidauk hetan sirkunsizaun.
13 Tanba laʼós liuhusi ukun-fuan mak Abraão ka ninia bei-oan simu promesa katak nia sei simu mundu ida nuʼudar liman-rohan,+ maibé nia simu promesa neʼe tanba Maromak haree nia nuʼudar ema laran-loos liuhusi fiar.+
14 Tanba se sira neʼebé moris tuir ukun-fuan mak simu liman-rohan, fiar sai folin-laek no promesa neʼe la iha folin ona.
15 Tuir loloos, Ukun-Fuan hamosu laran-nakali,+ maibé se la iha ukun-fuan, sala mós sei la iha.+
16 Nuneʼe, Abraão simu promesa neʼe tanba ninia fiar, no ida-neʼe tuir Maromak nia laran-diʼak neʼebé boot,+ no ninia bei-oan hotu mós simu promesa neʼe.+ Neʼe laʼós deʼit ba sira neʼebé moris tuir Ukun-Fuan, maibé mós ba sira neʼebé iha fiar hanesan Abraão. Loloos Abraão mak aman ba ita hotu.+
17 Neʼe hanesan hakerek nanis ona: “Haʼu hili ona ó nuʼudar aman ba nasaun barak.”+ Maromak nia promesa sei sai loos duni no Abraão tau fiar ba Maromak, neʼebé fó moris ba ema mate sira no koʼalia kona-ba buat sira neʼebé seidauk akontese hanesan ida-neʼe akontese ona.*
18 Tanba esperansa neʼe, nia fiar katak nia bele sai aman ba nasaun barak maski esperansa neʼe haree hanesan labele sai loos. Nia fiar buat neʼebé dehan sai ona: “Ó-nia bei-oan sira sei sai hanesan neʼe.”+
19 Maski ninia fiar la sai fraku, maibé nia hanoin kona-ba ninia isin rasik neʼebé hanesan mate ona tanba nia besik tinan 100,+ no mós Sara labele ona atu iha oan.*+
20 Maibé tanba Maromak nia promesa neʼe, ninia fiar la namlele, maibé nia hetan kbiit liuhusi ninia fiar no fó glória ba Maromak.
21 Nia fiar metin duni katak Maromak bele kumpre buat neʼebé nia promete ona.+
22 Tan neʼe “Maromak haree nia nuʼudar ema laran-loos”.+
23 Maibé, liafuan iha eskritura neʼebé dehan: “Maromak haree nia nuʼudar ema loos”, laʼós ba Abraão deʼit,+
24 maibé mós ba ita neʼebé Maromak sei haree nuʼudar ema laran-loos, tanba ita fiar ba Nia neʼebé fó moris-hiʼas ba ita-nia Naʼi Jesus husi mate.+
25 Maromak husik ema atu oho Jesus tanba ita-nia sala,+ no Maromak fó moris hiʼas ba nia atu Maromak bele haree ita nuʼudar ema laran-loos.+
Nota-rodapé
^ Ka “nuʼudar tusan”.
^ Ka “laʼós tanba laran-diʼak neʼebé boot”.
^ Ka “perdua”.
^ Orj., “nuʼudar selus”. Haree “Selus” iha Glosáriu.
^ Ka karik “hamosu buat neʼebé seidauk iha”.
^ Orj., “Sara nia oan-fatin mate ona”.
