Segundu Timóteo 3:1-17
3 Maibé hatene ida-neʼe bá, katak iha loron ikus sira+ sei iha problema barak neʼebé susar atu tahan.
2 Tanba ema sei hadomi deʼit sira-nia an, hadomi osan, gaba an, loko an, koʼalia aat Maromak no ema, la halo tuir inan-aman, la hatene fó agradese, la hatudu laran-metin,
3 la hadomi malu, la rona malu,* koʼalia aat hodi hafoʼer ema seluk nia naran, la kontrola an, siʼak, la hadomi buat neʼebé diʼak,
4 traidór, ulun-toos, foti an, hadomi deʼit ksolok duké hadomi Maromak,
5 iha ema nia oin sira hatudu hahalok katak sira adora Maromak, maibé sira la moris tuir sira-nia adorasaun.+ Ó hasees an husi ema sira hanesan neʼe.
6 Husi sira-nia leet mak mosu mane sira neʼebé lohidór, neʼebé bosok hodi tama ba ema nia umakain no halo feto neʼebé neon fraku laran-monu; feto sira-neʼe iha sala barak no tuir deʼit sira-nia hakarak oioin.
7 Feto sira-neʼe sempre aprende maibé nunka hetan koñesimentu neʼebé loos kona-ba lia-loos.
8 Mane sira-neʼe kontinua kontra lia-loos, hanesan ho Janes no Jambres neʼebé kontra hasoru Moisés. Mane sira-neʼe nia hanoin foʼer ona, no Maromak la simu sira tanba sira la laʼo tuir fiar.
9 Maibé, sira labele halo buat seluk tan, tanba sira-nia hahalok beik sei hatudu sai momoos iha ema hotu nia oin, hanesan ho Janes no Jambres nia hahalok.+
10 Maibé ó halo tuir didiʼak ona haʼu-nia hanorin, haʼu-nia dalan atu moris,+ haʼu-nia hakarak, haʼu-nia fiar, haʼu-nia pasiénsia, haʼu-nia domin, no oinsá haʼu tahan susar,
11 no ó hatene kona-ba susar no terus neʼebé akontese ba haʼu iha Antiokia,+ Ikónio,+ no Listra.+ Haʼu tahan susar no terus sira-neʼe, no Naʼi salva haʼu husi buat sira-neʼe hotu.+
12 Tuir loloos, ema hotu neʼebé hakarak atu moris ho laran-metin ba Maromak* nuʼudar Kristu Jesus nia dixípulu sei hetan mós terus.+
13 Maibé ema aat no bosok-teen sira sei sai aat liután, hodi bosok ema seluk no mós ema seluk bosok sira.+
14 Maibé, kona-ba ó, kontinua halo tuir buat neʼebé ó aprende no fiar metin ona,+ tanba ó hatene husi sé mak ó aprende buat sira-neʼe
15 no husi kiʼik*+ kedas ó hatene ona buat neʼebé hakerek iha livru santu,+ neʼebé bele fó matenek ba ó hodi hetan salvasaun liuhusi fiar ba Kristu Jesus.+
16 Eskritura hotu mai husi Maromak*+ no neʼe diʼak atu hanorin,+ atu fó konsellu, atu halo loos* buat hotu, no atu fó dixiplina tuir hahalok loos,*+
17 atu nuneʼe Maromak nia atan bele iha kbiit, no sai prontu hodi halo serbisu diʼak hotu.
Nota-rodapé
^ Ka “lakohi atu buka dame”.
^ Ka “ho devosaun ba Maromak”. Haree “Devosaun ba Maromak” iha Glosáriu.
^ Liafuan Gregu neʼe baibain refere ba bebé neʼebé foin moris.
^ Ka “Maromak mak inspira Eskritura hotu”.
^ Ka “korrije”.
^ Ka “treinu ita atu halo hahalok loos”.
