Primeiru Samuel 10:1-27
10 Tuirmai, Samuel foti buli mina nian no fui mina ba Saul nia ulun.+ Nia reʼi Saul no dehan: “Jeová hili* ona ó nuʼudar ulun-naʼin+ ba ninia povu.*+
2 Bainhira ó fila, ó sei hetan mane naʼin-rua besik Raquel nia rate+ iha área Benjamim iha Zelza, no sira sei hatete ba ó: ‘Kuda-burru sira neʼebé imi buka, hetan tiha ona, maibé agora ó-nia aman la hanoin ona kona-ba kuda-burru sira,+ nia hanoin barak fali kona-ba ó. Nia dehan: “Haʼu-nia oan seidauk fila, saida mak haʼu sei halo?”’
3 Ó tenke kontinua laʼo husi fatin neʼe hodi bá toʼo ai-hun boot iha Tabor, no iha neʼebá ó sei hasoru mane naʼin-tolu laʼo saʼe daudaun bá Betel hodi adora Maromak loos,+ mane ida lori hela bibi-timur oan tolu, ida tan lori paun fuan tolu, no ida seluk hulan buli boot tua-uvas nian.
4 Sira sei hasé ó no fó paun fuan rua ba ó, no ó tenke simu paun neʼe husi sira.
5 Depois neʼe, ó sei toʼo iha Maromak loos nia foho-oan, no iha neʼebá iha tropa Filístia grupu ida. Bainhira ó toʼo iha sidade neʼe, ó sei hasoru profeta grupu ida tun daudaun husi fatin aas, no iha sira-nia oin, ema sei toka instrumentu ho talin no baku tamborín, huu flauta, no toka arpa nuʼudar sira koʼalia hanesan profeta.
6 Jeová nia espíritu sei fó kbiit ba ó,+ no ó sei fó sai profesia hamutuk ho sira no ó sei sai fali ema neʼebé oin-seluk.+
7 Bainhira sinál sira-neʼe sai loos, halo bá buat neʼebé ó bele halo, tanba Maromak loos hamutuk ho ó.
8 Depois neʼe, tun uluk ba Gilgal,+ no haʼu sei tun bá hasoru ó iha neʼebá hodi hasaʼe sakrifísiu sunu nian no sakrifísiu dame nian. Ó tenke hein haʼu ba loron hitu toʼo haʼu hasoru ó iha neʼebá. Tuirmai mak haʼu sei fó sai ba ó buat neʼebé ó tenke halo.”
9 Bainhira Saul fila kotuk hodi husik hela Samuel, Maromak komesa kedas troka Saul nia laran hodi sai hanesan ema seluk nian, no sinál hotu neʼe sai loos iha loron neʼebá.
10 Entaun Saul no ninia atan sai husi neʼebá no bá foho neʼe, no hasoru profeta grupu ida. Derrepente deʼit Maromak nia espíritu fó kbiit ba Saul,+ no nia komesa fó sai profesia+ iha sira-nia leet.
11 Bainhira ema hotu neʼebé uluk koñese nia haree nia koʼalia nuʼudar profeta, sira husu ba malu: “Saida mak akontese ona ba Kis nia oan-mane? Saul mós profeta ida ka?”
12 Tuirmai mane ida husi neʼebá dehan: “Maibé profeta sira-neʼe nia aman mak sé?” Entaun neʼe sai nuʼudar lia-dadolin neʼebé dehan: “Saul mós profeta ida ka?”+
13 Bainhira Saul fó sai ona profesia neʼe, nia laʼo ba fatin aas.
14 Depois neʼe, Saul nia tiu husu ba nia no ninia atan: “Imi bá neʼebé?” Nia hatán: “Ami bá buka kuda-burru sira,+ maibé ami la hetan, entaun ami bá husu Samuel.”
15 Saul nia tiu husu: “Favór ida, konta mai haʼu, saida mak Samuel hatete ba imi?”
16 Saul hatán ba nia tiu: “Nia dehan ba ami katak kuda-burru sira-neʼe hetan ona.” Maibé Saul la konta ba nia tiu katak Samuel fó-hatene kona-ba nia sei sai liurai.
17 Tuirmai Samuel halibur povu sira hamutuk iha Jeová nia oin iha Mizpa+
18 no nia dehan ba ema Izraél: “Jeová, Izraél nia Maromak, hatete: ‘Haʼu mak lori ema Izraél sai husi rai-Ejitu no salva imi husi ema Ejitu nia liman+ no husi liurai sira hotu neʼebé hanehan imi.
19 Maibé ohin imi la simu ona imi-nia Maromak+ neʼebé salva imi husi terus no susar hotu, no imi dehan: “Lae, Ita tenke hili liurai ida atu ukun ami.” Entaun agora hamriik iha Jeová nia oin tuir imi-nia suku sira no tuir imi-nia família sira.’”*
20 Nuneʼe Samuel haruka Izraél nia suku hotu hakbesik mai,+ no Maromak hili suku Benjamim.+
21 Tuirmai nia haruka suku Benjamim hakbesik mai tuir sira-nia família ida-idak, no Maromak hili ema Matri nia família. Ikusmai Maromak hili Kis nia oan-mane Saul.+ Maibé bainhira sira bá buka nia, sira la hetan nia iha fatin ida.
22 Entaun sira husu ba Jeová:+ “Mane neʼe mai ona iha neʼe ka lae?” Jeová hatán: “Nia iha neʼebá, nia subar an hela iha sasán sira-nia leet.”
23 Entaun sira halai bá hodi lori nia mai. Bainhira nia hamriik iha povu sira-nia leet, nia ain-aas liu povu hotu.+
24 Samuel hatete ba povu tomak: “Imi haree ona mane neʼebé Jeová hili?+ La iha ema ida hanesan nia iha povu sira-nia leet, loos ka lae?” Nuneʼe povu hotu komesa hakilar: “Viva liurai!”
25 Samuel koʼalia ba povu neʼe kona-ba liurai sira-nia direitu+ no hakerek neʼe iha livru ida no tau iha Jeová nia tenda santu. Tuirmai Samuel haruka povu hotu bá, no sira ida-idak fila fali ba sira-nia uma.
26 Saul mós fila fali ba ninia uma iha Gibea, no Jeová book funu-naʼin sira-nia laran atu laʼo tuir nia.
27 Maibé mane aat balu hatete: “Oinsá mak nia bele salva ita?”+ Entaun sira hakribi Saul, no sira la lori prezente ida ba nia.+ Maibé nia la koʼalia buat ida kona-ba neʼe.*
Nota-rodapé
^ Orj., “fui mina”. Haree “Fui mina” iha Glosáriu.
^ Orj., “liman-rohan”.
^ Ka “tuir grupu ema naʼin-1.000”.
^ Orj., “nia sai hanesan ema neʼebé monok”.
