Primeiru Reis 18:1-46
18 Liutiha tempu balu, iha tinan terseiru,+ Jeová dehan ba Elias: “Bá hasoru Acab, no haʼu sei halo udan tun ba rai.”+
2 Entaun Elias bá hasoru Acab. Iha tempu neʼebá rai-hamlaha boot tebes+ mosu iha Samaria.
3 Iha tempu neʼe, Acab bolu Obadias, neʼebé tau matan ba liurai nia umakain. Obadias mak ema neʼebé hamtaʼuk tebes Jeová,
4 no bainhira Jezabel+ oho Jeová nia profeta sira, Obadias salva profeta naʼin-100 hodi subar sira naʼin limanulu-limanulu iha fatuk-kuak, no nia fó paun no bee ba sira.
5 Acab dehan ba Obadias: “Mai ita laʼo haleʼu bee-matan no mota* hotu iha rai neʼe. Karik ita bele hetan duʼut neʼebé natoon ba ita-nia kuda no kuda-mula* atu sira bele kontinua moris no ita-nia animál hotu labele mate.”
6 Entaun sira haketak rai neʼebé sira atu laʼo haleʼu. Acab laʼo mesak ba dalan ida, no Obadias laʼo mesak ba dalan seluk.
7 Bainhira Obadias laʼo daudaun, Elias bá hasoru nia. Kuandu Obadias haree Elias, nia koñese kedas Elias no hakneʼak ho oin ba rai, hodi dehan: “Ita-Boot mak haʼu-nia naʼi Elias ka?”+
8 Nia hatán: “Sin, haʼu mak neʼe. Bá fó-hatene ba ó-nia naʼi: ‘Elias iha neʼe ona.’”
9 Maibé Obadias hatete: “Ita-nia atan neʼe halo sala saida hodi Ita entrega ba Acab atu oho?
10 Haʼu jura hodi Jeová, Ita-nia Maromak neʼebé moris, katak haʼu-nia naʼi haruka ema atu buka Ita iha nasaun hotu no rai hotu. Bainhira sira dehan: ‘Nia la iha’, haʼu-nia naʼi haruka nasaun sira no liurai sira jura katak sira buka Ita maibé la hetan.+
11 Agora Ita dehan ba haʼu: ‘Bá fó-hatene ó-nia naʼi: “Elias iha neʼe ona.”’
12 Maibé bainhira haʼu husik hela Ita, Jeová nia espíritu sei lori Ita+ ba fatin neʼebé haʼu la hatene, no bainhira haʼu hatete ba Acab no nia la hetan Ita, nia sei oho duni haʼu. Loloos Ita-nia atan neʼe hamtaʼuk Jeová husi tempu joven kedas.
13 Haʼu-nia naʼi Elias, ema seidauk fó-hatene ba Ita buat neʼebé haʼu halo ka? Bainhira Jezabel oho Jeová nia profeta sira, haʼu subar Jeová nia profeta naʼin-100. Haʼu subar sira naʼin limanulu-limanulu iha fatuk-kuak no haʼu fó nafatin paun no bee ba sira.+
14 Agora se haʼu bá hasoru haʼu-nia naʼi hodi koʼalia sai Ita-nia liafuan, dehan: ‘Elias iha neʼe ona’, nia sei oho duni haʼu.”
15 Maibé Elias dehan: “Haʼu jura hodi Jeová neʼebé ukun tropa lalehan nian, Maromak neʼebé moris no neʼebé haʼu serbí, katak ohin loron haʼu sei bá hasoru Acab.”
16 Entaun Obadias bá hasoru Acab no fó-hatene ba Acab, depois neʼe, Acab bá hasoru Elias.
17 Bainhira Acab haree Elias, nia hatete kedas: “Ó mak neʼe! Ó lori susar boot ba Izraél.”
18 Ho ida-neʼe, Elias hatán: “Haʼu la lori susar ba Izraél, maibé Ita ho Ita-nia aman nia umakain mak lori susar, tanba imi husik tiha Jeová nia mandamentu sira no laʼo tuir fali Baal sira.+
19 Entaun agora bolu ema Izraél hotu hodi hasoru haʼu iha Foho Karmel,+ no mós bolu profeta Baal naʼin-450 no profeta ba ai-riin lulik*+ naʼin-400, neʼebé han iha Jezabel nia meza.”
20 Nuneʼe Acab haruka lia-menon ba povu Izraél hotu no halibur profeta sira iha Foho Karmel.
21 Tuirmai Elias hakbesik ba povu hotu, no dehan: “Toʼo bainhira mak imi sei laran-rua?*+ Se Jeová mak Maromak neʼebé loos, halo tuir nia bá!+ Se Baal mak Maromak neʼebé loos, halo tuir nia bá!” Maibé povu la koʼalia liafuan ida hodi hatán ba nia.
22 Depois neʼe, Elias hatete ba povu: “Hela haʼu deʼit mak Jeová nia profeta,+ maibé Baal nia profeta hamutuk mane naʼin-450.
23 Husik povu fó karau-aman* rua ba ami, no profeta Baal sira tenke hili karau-aman* ida no koʼa ba pedasuk no tau iha ai leten, maibé sira labele sunu ahi ba sakrifísiu neʼe. Haʼu mós sei koʼa karau-aman* ida seluk, no tau iha ai leten, maibé haʼu sei la sunu ahi ba sakrifísiu neʼe.
24 Tuirmai imi tenke bolu imi-nia maromak nia naran,+ no haʼu mós sei bolu Jeová nia naran. Maromak neʼebé hatán hodi halakan ahi atu sunu sakrifísiu sei hatudu katak nia mak Maromak neʼebé loos.”+ Ho ida-neʼe, povu hotu hatán: “Buat neʼebé ó hatete neʼe mak diʼak.”
25 Entaun Elias hatete ba Baal nia profeta sira: “Imi hili karau-aman* ida no prepara uluk, tanba imi mak barak liu. Tuirmai bolu imi-nia maromak nia naran, maibé imi labele sunu ahi ba sakrifísiu neʼe.”
26 Ho ida-neʼe, sira foti karau-aman* neʼebé fó ona ba sira no prepara sakrifísiu neʼe, no sira kontinua bolu Baal nia naran husi dadeer toʼo meiudia, hodi dehan: “Oh Baal, hatán ba ami!” Maibé la iha lian ida no la iha resposta ida.+ Sira kontinua haksoit bá-mai haleʼu altár neʼebé sira halo ona.
27 Iha meiudia, Elias komesa goza sira, hodi dehan: “Hakilar makaʼas liután tanba nia mak maromak ida!+ Karik nia hanoin hela, ka nia bá soe-bee.* Ka karik nia toba hela no presiza ema ida atu fanu nia!”
28 Sira hakilar makaʼas liután no koʼa sira-nia an ho tudik no diman hodi tuir sira-nia toman, toʼo sira-nia raan sai husi sira-nia isin-lolon tomak.
29 Meiudia liu ona, no sira kontinua halo sira-nia an hanesan bulak* toʼo oras atu hasaʼe sakrifísiu trigu nian iha kalan, maibé la iha lian ida no la iha resposta ida. Baal la tau atensaun ba sira.+
30 Liutiha tempu balu, Elias hatete ba povu hotu: “Hakbesik mai.” Entaun povu hotu hakbesik ba nia. Tuirmai nia hadiʼa Jeová nia altár neʼebé ema harahun ona.+
31 Depois neʼe, Elias foti fatuk 12 tuir númeru ba Jacob nia oan-mane sira-nia suku. Jacob mak ema neʼebé Jeová dehan ona: “Ó-nia naran sei troka ba Izraél.”+
32 Elias uza fatuk sira-neʼe atu harii altár ida+ hodi hahiʼi Jeová nia naran. Tuirmai nia halo bee-dalan haleʼu altár neʼe. Área neʼe tomak nia luan hanesan ho rai atu kuda fini sea isin rua.*
33 Depois neʼe, nia tau ai sira ho didiʼak, nia koʼa karau-aman* ba pedasuk no tau iha ai leten.+ No nia dehan: “Enxe bee nakonu iha sanan-rai boot haat no fakar ba sakrifísiu sunu nian neʼe no mós ba ai sira.”
34 Tuirmai nia dehan ba sira: “Halo dala ida tan.” Entaun sira halo dala ida tan. Nia dehan fali: “Halo dala ida tan.” Entaun sira halo ba dala terseiru.
35 Ho ida-neʼe, bee suli haleʼu altár, no nia mós enxe bee nakonu iha bee-dalan sira.
36 Iha oras atu hasaʼe sakrifísiu trigu nian iha kalan,+ profeta Elias hakat ba oin no dehan: “Oh Jeová, Abraão nia Maromak,+ Isaac nia Maromak+ no Izraél nia Maromak, ohin hatudu sai bá katak Ita mak Maromak iha Izraél no katak haʼu mak Ita-nia atan, no mós katak haʼu halo buat sira-neʼe hotu tanba Ita-nia liafuan.+
37 Oh Jeová, hatán mai haʼu! Hatán mai haʼu atu nuneʼe povu sira-neʼe bele hatene katak Ita, Jeová, mak Maromak neʼebé loos no katak Ita mak halo sira-nia laran fila fali ba Ita.”+
38 Tuirmai, ahi husi Jeová tun husi leten no han sakrifísiu sunu nian,+ han ai sira, fatuk no rai-rahun sira, no ahi lambe hotu bee iha bee-dalan.+
39 Bainhira povu hotu haree ida-neʼe, sira hakneʼak kedas ho oin ba rai, hodi dehan: “Jeová mak Maromak neʼebé loos! Jeová mak Maromak neʼebé loos!”
40 Tuirmai Elias hatete ba sira: “Kaer Baal nia profeta sira! Keta husik ema ida halai!” Entaun sira kaer kedas profeta sira-neʼe, no Elias lori sira tun ba Mota* Kison+ no oho sira iha neʼebá.+
41 Elias hatete ba Acab: “Saʼe bá, han no hemu, tanba haʼu rona lian husi udan boot.”+
42 Entaun Acab saʼe bá hodi han no hemu. Iha tempu neʼe Elias saʼe ba Foho Karmel tutun no hakneʼak, no ninia oin besik ba ninia ain-tuur rua.+
43 Tuirmai nia hatete ba ninia atan: “Favór ida, saʼe bá no hateke ba tasi.” Entaun atan neʼe saʼe no hateke, no dehan: “Haʼu la haree buat ida.” Elias haruka nia ba dala hitu, hodi dehan: “Bá fali.”
44 Ba dala ikus, ninia atan dehan: “Haree bá! Iha kalohan kiʼik ida hanesan ema nia liman saʼe husi tasi.” Elias dehan: “Bá, hatete ba Acab: ‘Prepara Ita-nia kuda-karreta! Tun ona atu udan boot la hanetik Ita!’”
45 Iha tempu neʼe, lalehan sai nakukun ho kalohan sira, anin huu no udan boot tun.+ No Acab saʼe ninia kuda-karreta hodi kontinua bá Jezreel.+
46 Maibé Jeová fó forsa ba Elias,* no Elias kesi ninia roupa iha ninia knotak no nia halai uluk liu Acab toʼo Jezreel.
Nota-rodapé
^ Neʼe mak oan husi kuda-burru aman no kuda-inan.
^ Haree “Ai-riin lulik” iha Glosáriu.
^ Orj., “haksoit bá-mai entre ideia rua neʼebé la hanesan?”
^ Ka “karau-oan neʼebé aman”.
^ Ka “karau-oan neʼebé aman”.
^ Ka “karau-oan neʼebé aman”.
^ Ka “karau-oan neʼebé aman”.
^ Ka “karau-oan neʼebé aman”.
^ Ka karik “nia halo viajen”.
^ Ka “kontinua hatudu hahalok hanesan profeta”.
^ Ka “karau-oan neʼebé aman”.
^ Orj., “Jeová tau liman ba Elias”.
