Rai-nabeen akontese duni. Maromak mak hamosu ida-neʼe atu halakon ema aat sira, maibé Maromak haruka Noé halo ró ida hodi salva ema diʼak hamutuk ho animál sira. (Génesis 6:11-20) Ita bele fiar katak rai-nabeen akontese duni tanba neʼe hakerek iha Bíblia neʼebé “mai husi Maromak”.—2 Timóteo 3:16.

•  Istória neʼe tebes ka lae?

•  Tanbasá akontese rai-nabeen?

•  Ema hatene ka lae katak rai-nabeen sei akontese?

•  Noé nia ró haree hanesan saida?

•  Noé presiza tempu hira atu halo ró?

•  Istória kona-ba rai-nabeen

 Bíblia hatudu katak Noé moris duni iha tempu uluk no rai-nabeen akontese duni, neʼe laʼós istória bosok neʼebé ema mak inventa.

•   Bíblia nia hakerek-naʼin sira fiar katak Noé moris duni. Porezemplu, Bíblia nia hakerek-naʼin naran Ezra no Lucas halo riset didiʼak antes hakerek kona-ba istória, no sira temi Noé nia naran iha ema Izraél nia lista jerasaun. (1 Krónikas 1:4; Lucas 3:36) Hakerek-naʼin ba livru Evanjellu naran Mateus no Lucas hakerek Jesus nia liafuan kona-ba Noé no rai-nabeen.—Mateus 24:37-39; Lucas 17:26, 27.

   Profeta Ezequiel no apóstolu Paulo mós temi Noé nuʼudar ezemplu kona-ba fiar no hahalok loos. (Ezequiel 14:14, 20; Ebreu 11:7) Hakerek-naʼin sira-neʼe sei la anima ita atu banati-tuir Noé se Noé nunka moris, loos ka lae? Noé no fiar-naʼin sira seluk mak ezemplu neʼebé diʼak atu banati-tuir tanba sira moris duni.—Ebreu 12:1; Tiago 5:17.

•   Bíblia hakerek informasaun klaru kona-ba rai-nabeen. Bíblia temi ho klaru kona-ba tinan, fulan no loron husi akontesimentu sira neʼebé iha ligasaun ho rai-nabeen. (Génesis 7:11; 8:4, 13, 14) Laʼós neʼe deʼit, Bíblia mós temi ho klaru medida husi ró neʼebé Noé halo. (Génesis 6:15) Neʼe hatudu ho klaru katak istória kona-ba rai-nabeen iha Bíblia laran mak istória tebes duni.

 Tuir Bíblia, antes rai-nabeen akontese, “ema nia hahalok aat sai barak tebes”. (Génesis 6:5) Bíblia mós hatete katak “tuir Maromak loos nia haree, rai sai aat ona” tanba nakonu ho violénsia no sala seksuál.—Génesis 6:11; Judas 6, 7.

 Bíblia esplika katak hun ba problema sira-neʼe mak anju aat sira neʼebé husik hela lalehan hodi halo relasaun seksuál ho feto sira. Tuirmai feto sira-neʼe tuur ahi ba oan sira neʼebé bolu nuʼudar Nefilím. Sira laran-aat tebes no haterus ema iha tempu neʼebá. (Génesis 6:1, 2, 4) Maromak deside atu halakon ema aat no husik ema diʼak atu bele halaʼo fali moris foun.—Génesis 6:6, 7, 17.

 Sin, sira hatene. Maromak fó-hatene Noé kona-ba saida mak sei akontese. Maromak mós haruka Noé atu halo ró ida atu bele salva ninia família no animál sira. (Génesis 6:13, 14; 7:1-4) Noé mós fó avizu ba ema katak Maromak sei halakon ema aat, maibé ema lakohi rona ba Noé nia avizu. (2 Pedro 2:5) Bíblia hatete: “Sira la tau atensaun toʼo rai-nabeen akontese no halakon sira hotu.”—Mateus 24:37-39.

 Ró neʼe hanesan kaixote boot ida ho naruk maizumenus metru 133, luan maizumenus metru 22, aas maizumenus metru 13. Ró neʼe halo ho ai-rezinoza, no ró nia laran no liʼur taka ho alkatraun. Ró neʼe fahe ba andár tolu no iha kuartu balu. Iha odamatan ida deʼit iha ró nia parte sorin ida no karik iha mós janela sira iha ró nia parte leten. Karik Noé halo ró nia kakuluk haliʼis atu nuneʼe udan-been la nakonu iha kakuluk leten.—Génesis 6:14-16.

 Bíblia la hakerek kona-ba tempu hira mak Noé gasta atu halo ró neʼe, maibé karik Noé uza tinan barak atu halo ró neʼe. Noé idade 500 liu kuandu ninia oan-mane primeiru moris, no Noé idade 600 bainhira rai-nabeen akontese. a—Génesis 5:32; 7:6.

 Bainhira Maromak haruka Noé atu harii ró, ninia oan-mane naʼin-tolu boot no kaben ona, no karik neʼe presiza tinan 50 ka 60 liu. (Génesis 6:14, 18) Bazeia ba ida-neʼe, ita bele dehan katak karik presiza tinan 40 ka 50 atu harii kompletu ró neʼe.