Sin, Bíblia bele ajuda ita. Tuirmai mak matadalan haat husi Bíblia neʼebé bele ajuda Ita kuandu Ita hasoru problema kona-ba osan no debe.

1.   Halo planu kona-ba uza osan. “Ema badinas nia planu sei hetan duni susesu, maibé ema hotu neʼebé ansi sei sai kiak duni.” (Provérbios 21:5) Keta ansi atu hola sasán ruma tan deʼit sasán neʼe baratu tebes. Hakerek lista kona-ba atu uza osan hira, no tuirmai halo tuir lista neʼe.

2.   La debe osan naranaran. “Ema neʼebé empresta sei sai atan ba ida neʼebé fó-empresta.” (Provérbios 22:7) Se Ita debe ona osan no labele selu debe tuir tempu neʼebé deside ona, koko atu koʼalia ba ema neʼebé fó debe ba Ita hodi arranja tempu seluk kona-ba bainhira loos mak Ita presiza selu debe. Keta rende an lalais. Halo tuir matadalan neʼebé temi iha Provérbios 6:1-5: “Haraik an ba ó-nia maluk no kontinua husu ho laran ba nia. Keta toba, no keta taka ó-nia matan toʼo ó halo tiha ida-neʼe.” Maski la hetan aprova, husu nafatin atu bele halo mudansa.

3.   Iha hanoin neʼebé loos kona-ba osan. “Ema neʼebé kaan-teen hakarak tebes rikusoin, maibé nia la hatene katak kiak sei kaer toman nia.” (Provérbios 28:22) Hahalok laran-moras no kaan-teen bele lori ita ba problema sériu kona-ba osan no mós bele estraga ita-nia relasaun diʼak ho Maromak.

4.   Kontente ho buat neʼebé Ita iha. “Se ita iha ai-han no roupa, ita tenke kontente ho buat sira-neʼe.” (1 Timóteo 6:8) Osan labele fó Ita kontente neʼebé loos. Tuir loloos, ema barak neʼebé kontente tebes mak ema neʼebé ladún iha osan barak. Buat neʼebé sira iha mak domin husi sira-nia família no kolega sira no relasaun diʼak ho Maromak.​—Provérbios 15:17; 1 Pedro 5:6, 7.