Mundu neʼe sei lakon ka lae?

LOKE

Bíblia nia resposta

Lae, mundu sei nunka lakon, sunu iha ahi, ka troka. Bíblia hanorin katak Maromak kria mundu atu ema bele hela ba nafatin.

“Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:29.
“[Maromak] harii metin ona mundu iha ninia hun sira-nia leten; mundu neʼe sei la muda husi ninia fatin tinan ba tinan ba nafatin.”—Salmo 104:5.
“Mundu iha ba nafatin.”—Eclesiastes 1:4.
“Ida neʼebé kria rai, no Kriadór neʼebé halo rai sai metin, nia kria rai la’ós saugati deʼit, maibé nia kria rai atu ema bele hela bá”.—Isaias 45:18.

Ema sei estraga mundu neʼe ka lae?

Maromak sei la husik ema estraga mundu tomak ho poluisaun, funu, ka buat naran deʼit. Maibé, nia sei “halakon sira neʼebé estraga daudaun mundu”. (Apokalipse 11:18) Oinsá mak nia sei halo ida-neʼe?

Maromak sei troka ema nia governu hotu ho ukun husi lalehan neʼebé perfeitu, tanba governu sira ohin loron la konsege proteje mundu neʼe. (Daniel 2:44; Mateus 6:9, 10) Maromak nia oan-mane Jesus Kristu mak sei kaer ukun neʼe. (Isaias 9:6, 7) Bainhira Jesus iha rai, nia hatudu ona katak nia bele kontrola natureza. (Marcos 4:35-41) Nuʼudar Liurai husi Maromak nia Ukun, Jesus sei tau matan mundu no natureza ho didi’ak. Nia sei hadi’a fali, ka hafoun mundu nia kondisaun, no halo mundu tomak sai hanesan jardín Eden.—Mateus 19:28; Lucas 23:43.

Bíblia hanorin katak mundu sei sunu tiha iha ahi ka lae?

Lae, Bíblia la hanorin hanesan neʼe. Dala ruma mosu ideia neʼe tanba ema komprende sala liafuan neʼebé temi iha 2 Pedro 3:7, neʼebé dehan: “Lalehan no mundu neʼebé iha agora deside tiha ona atu halakon ho ahi.” Mai ita haree pontu importante rua neʼebé bele ajuda ita komprende kona-ba signifikadu husi liafuan sira-neʼe:

Bíblia uza liafuan “lalehan”, “mundu” no “ahi” atu refere ba buat barak. Porezemplu, Génesis 11:1 hatete: “Mundu tomak iha língua ida deʼit.” Liafuan “mundu” ne’e refere ba ema.
Kontestu husi 2 Pedro 3:7 fó-hatene ninia signifikadu kona-ba liafuan lalehan, mundu no ahi. Versíkulu 5 no 6 temi Rai-Nabeen iha Noé nia tempu nu’udar ezemplu. Iha tempu neʼebá, Rai-Nabeen taka mundu tomak maibé mundu nafatin iha. Rai-Nabeen halakon de’it ema aat hotu, ka “rai.” (Génesis 6:11) No Rai-Nabeen mós halakon tiha “lalehan”, katak sira neʼebé ukun povu iha tempu neʼebá. Tan neʼe, ema aat mak lakon, laʼós ita-nia planeta. Noé no ninia família hetan salvasaun kuandu mundu ne’e lakon no hela fali iha rai depois Rai-Nabeen liu tiha.—Génesis 8:15-18.

Hanesan ho Rai-Nabeen, “ahi” iha 2 Pedro 3:7 sei halakon ema aat, laʼós planeta mundu neʼe. Maromak promete kona-ba “lalehan foun no rai foun, no iha neʼebá buat hotu sei tuir justisa.” (2 Pedro 3:13) “Rai foun” katak ema, no “lalehan foun” katak Maromak nia Ukun. Liuhusi Ukun neʼe mak mundu tomak sei sai paraízu neʼebé nakonu ho dame.—Apokalipse 21:1-4.