Oinsá mak ita bele moris ba nafatin?

LOKE

Bíblia nia resposta

Bíblia promete: “Ema neʼebé halo Maromak nia hakarak sei moris ba nafatin.” (1 João 2:17) Saida mak Maromak hakarak ita atu halo?

Aprende kona-ba Maromak no ninia Oan-Mane Jesus. Iha ninia orasaun ba Maromak, Jesus hatete: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.” (João 17:3) Oinsá mak ita bele “hatene didiʼak” Maromak no Jesus? Ita bele hatene kona-ba sira liuhusi estuda Bíblia no halo tuir matadalan sira iha Bíblia laran. a Bíblia fó sai Maromak Jeová nia hanoin, Kriadór neʼebé fó ita moris. (Apóstolu 17:24, 25) Ita mós bele aprende husi Bíblia kona-ba Maromak nia Oan-Mane Jesus neʼebé hanorin “liafuan moris rohan-laek nian”.—João 6:67-69.
Hatudu fiar ba Jesus nia sakrifísiu. Jesus mai mundu “atu serbí no atu fó ninia moris hodi sosa fali ema barak”. (Mateus 20:28) Jesus nia sakrifísiu loke dalan ba ema atu bele moris ba nafatin iha Paraízu iha mundu. b (Salmo 37:29) Jesus hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.” (João 3:16) Ida-neʼe hatudu katak la toʼo atu fiar deʼit ba Jesus. Ita mós tenke “hatudu fiar ba nia” hodi moris tuir ninia hanorin sira no ninia Aman nia hakarak.—Mateus 7:21; Tiago 2:17.
Sai Maromak nia belun. Maromak hakarak ita atu hakbesik ba nia no sai ninia belun. (Tiago 2:23; 4:8) Maromak la iha rohan. Nia nunka bele mate no nia hakarak ninia belun sira mós atu moris ba nafatin. Liuhusi ninia Liafuan, Maromak fó sai katak nia hakarak ema neʼebé buka nia atu “moris ba nafatin”.—Salmo 22:26.

Hanoin neʼebé sala kona-ba moris ba nafatin

Hanoin neʼebé sala: Liuhusi ema nia hakaʼas an ita bele hetan moris ba nafatin.

Hanoin neʼebé loos: Maski sientista barak hatete katak teknolojia médiku neʼebé avansadu bele hanaruk ema nia moris. Maibé ema nia hakaʼas an neʼe sei nunka bele lori moris ba nafatin. Só Maromak deʼit mak bele fó ita moris ba nafatin tanba nia mak “hun ba moris”. (Salmo 36:9) Nia promete atu “halakon mate ba nafatin” no fó moris ba nafatin ba ema neʼebé laran-metin ba nia.—Isaias 25:8; 1 João 2:25.

Hanoin neʼebé sala: Só ema husi rasa balu deʼit mak sei moris ba nafatin.

Hanoin neʼebé loos: Maromak la todan ba sorin. Maibé “iha nasaun hotu, Maromak simu ema hotu neʼebé hamtaʼuk nia no halo buat neʼebé loos”. (Apóstolu 10:34, 35) Ema husi rasa no kultura oioin neʼebé halo tuir Maromak mak bele moris ba nafatin.

Hanoin neʼebé sala: Se ema moris ba nafatin, ema sei sente baruk tebes.

Hanoin neʼebé loos: Maromak hakarak ita atu moris ba nafatin. Nia hadomi ita no hakarak ita atu sente kontente. (Tiago 1:17; 1 João 4:8) Nia hatene katak ema presiza halo serbisu oioin atu sente kontente. (Eclesiastes 3:12) Tan neʼe, Maromak promete katak ema neʼebé moris ba nafatin sei halo serbisu oioin neʼebé sei lori benefísiu ba sira no mós ba sira-nia família.—Isaias 65:22, 23.

Laʼós neʼe deʼit, ema neʼebé moris ba nafatin sei kontinua aprende kona-ba sira-nia Kriadór no ninia kriasaun. Nia mós halo ema ho hakarak atu moris ba nafatin no aprende kona-ba nia, maski nuneʼe “ema sei nunka hatene Maromak loos nia serbisu neʼebé nia halo ona husi primeiru toʼo ikus”. (Eclesiastes 3:10, 11) Tan neʼe, ema neʼebé moris ba nafatin sei nafatin okupadu atu halo no aprende kona-ba buat foun.

a Testemuña ba Jeová oferese estudu Bíblia gratuitu. Atu hetan informasaun liután, haree vídeo Oinsá mak ami halaʼo estuda Bíblia ho ema?

b Haree informasaun ho títulu “Oinsá mak Jesus bele salva ita?”