Bíblia la koʼalia kona-ba bainhira mak Maromak hahú kria universu ka ba tempu hira. Bíblia dehan deʼit: “Horiuluk kedas Maromak kria lalehan no rai”. (Génesis 1:1) Bíblia la fó sai ho espesífiku kona-ba “horiuluk kedas” refere ba horibainhira. Maski nuneʼe, informasaun iha Génesis hatudu katak Maromak hahú kria universu antes “loron” primeiru husi loron neen kriasaun nian hahú.

•  Loron kriasaun ida-idak mak loron ida ho oras 24 deʼit ka lae?

•  Saida mak akontese durante loron neen kriasaun nian?

•  Informasaun iha Génesis mak loos tuir siénsia ka lae?

•  Horibainhira mak kria loro-matan, fulan, no fitun sira?

•  Tuir Bíblia, planeta mundu mak tinan hira?

 Lae. Kuandu Bíblia temi liafuan “loron”, neʼe bele refere ba tempu ka períodu oioin, depende ba kontestu. Porezemplu, tuir eskritura ida husi Bíblia, tempu kriasaun hotu mak refere nuʼudar loron ida.—Génesis 2:4.

 Maromak halo planeta mundu neʼebé “la iha buat ida no mamuk” sai fali fatin neʼebé ema bele hela. (Génesis 1:2) Tuirmai, nia kria buat oioin neʼebé moris iha mundu. Bíblia esplika tempu kriasaun neʼe hodi fahe ba akontesimentu neen:

•  Loron 1: Maromak halo naroman toʼo ba mundu, hodi nuneʼe bele iha loron no kalan.—Génesis 1:3-5.

•  Loron 2: Maromak halo fatin mamuk hodi haketak bee ba parte rua, parte ida taka mundu no parte ida iha leten.—Génesis 1:6-8.

•  Loron 3: Maromak halo rai maran mosu. Nia mós kria ai-horis sira.—Génesis 1:9-13.

•  Loron 4: Maromak halo loro-matan, fulan no fitun sai klaru kuandu haree husi planeta mundu.—Génesis 1:14-19.

•  Loron 5: Maromak kria kriatura sira iha tasi laran no manu sira neʼebé semo.—Génesis 1:20-23.

•  Loron 6: Maromak kria animál sira iha rai no ema.—Génesis 1:24-31.

 Depois loron 6 remata, Maromak deskansa husi ninia serbisu kriasaun.—Génesis 2:1, 2.

 Dalan neʼebé Bíblia konta kona-ba kriasaun laʼós hanesan livru siénsia, maibé esplikasaun neʼe hakerek iha dalan neʼebé simples hodi fó sai akontesimentu tuituir malu no fasil ba ema hotu, inklui mós ema iha Bíblia nia tempu. Buat neʼebé Bíblia konta la kontra faktu tuir siénsia. Sientista ida kona-ba área fízika no universu, naran Robert Jastrow hakerek: “Klaru katak, siénsia astronomia no livru Génesis iha Bíblia fó sai detalla neʼebé la hanesan. Maibé iha buat importante ida neʼebé hanesan, neʼe mak akontesimentu ida-idak mosu derrepente toʼo ikusmai ema iha.”

 Loro-matan, fulan, no fitun sira iha tiha ona nuʼudar parte husi “lalehan” neʼebé Maromak kria “horiuluk kedas”. (Génesis 1:1) Maibé buat sira-neʼe nia naroman seidauk toʼo iha mundu tanba atmosfera neʼebé mahar. (Génesis 1:2) Tan neʼe, maski iha loron primeiru naroman toʼo ba mundu, maibé husi mundu labele haree naroman neʼe nia hun. Iha loron haat, iha mudansa ba atmosfera neʼebé taka mundu. Bíblia dehan katak loro-matan, fulan, no fitun sira komesa “fó naroman ba rai”, neʼe katak husi mundu bele haree ho momoos loro-matan, fulan, no fitun sira.—Génesis 1:17.

 Bíblia la fó-hatene kona-ba planeta mundu mak tinan hira. Génesis 1:1 fó sai deʼit katak universu no planeta mundu hahú eziste iha tempu uluk liu. Informasaun neʼe la kontra buat neʼebé sientista sira fiar kona-ba planeta mundu.