Lae, Bíblia la hanorin katak Maria mak Maromak nia inan, no la dehan katak ema Kristaun tenke adora Maria. a Hanoin toʼok razaun sira tuirmai ne’e:

•   Maria nunka dehan katak nia mak Maromak nia inan. Bíblia esplika katak nia tuur-ahi “Maromak nia Oan”, laʼós Maromak.​—Marcos 1:1; Lucas 1:32.

•   Jesus Kristu nunka dehan katak Maria mak Maromak nia inan, ka ema tenke adora Maria. Tuir loloos, nia korrije feto ida neʼebé gaba Maria nuʼudar Jesus nia inan, hodi dehan: “Lae! Ksolok ba sira neʼebé rona Maromak nia liafuan no halo tuir!”​—Lucas 11:27, 28.

•   Liafuan “Maromak nia inan” no “Theotokos” (Maromak nia inan) la hakerek iha Bíblia laran.

•   Liafuan “Liurai-Feto Lalehan nian” iha Bíblia la refere ba Maria, maibé ba maromak falsu neʼebé ema Izraél sira adora. (Jeremias 44:15-19) “Liurai-Feto Lalehan nian” karik refere ba Istar (Astarte), ema Babilónia nia maromak-feto.

•   Ema Kristaun iha tempu antigu la adora Maria, no sira mós la foti Maria nuʼudar ema neʼebé espesiál. Istória-naʼin ida hatete katak ema Kristaun iha tempu antigu “la simu hanorin oioin no taʼuk katak hodi ko’alia beibeik kona-ba Maria bele halo ema deskonfia sira adora fali maromak-feto”.​—In Quest of the Jewish Mary.

•   Bíblia hatete katak Maromak sempre iha. (Salmo 90:1, 2; Isaias 40:28) Tanba nia la iha hun, neʼe katak nia la iha inan. Liután neʼe, Maromak labele moris iha Maria nia kabun; Bíblia ko’alia ho klaru katak maski lalehan mós la toʼo atu sai Maromak nia hela-fatin.​—1 Reis 8:27.

Maria​—Jesus nia inan laʼós “Maromak nia inan”

 Maria mak ema Judeu husi nia moris mai, no nia mai husi Liurai David nia liña jerasaun. (Lucas 3:23-31) Maria monu loos ba Maromak nia laran tanba ninia fiar no laran-metin. (Lucas 1:28) Maromak hili nia atu sai Jesus nia inan. (Lucas 1:31, 35) Hamutuk ho ninia la’en José, Maria mós iha oan seluk tan.​—Marcos 6:3.

 Maski Bíblia hatete katak ikusmai Maria mós sai nuʼudar Jesus nia dixípulu ida, maibé la iha informasaun seluk tan neʼebé koʼalia kona-ba Maria.​—Apóstolu 1:14.