Sin, bele duni. Jesus dehan katak ninia dixípulu sira bele simu tratamentu médiku kuandu nia dehan: “Ema neʼebé isin-diʼak la presiza doutór, maibé ema moras presiza.” (Mateus 9:12) Bíblia laʼós livru médiku nian, maibé fó sai prinsípiu oioin atu ajuda ema neʼebé hakarak halo kontente Maromak.

Pergunta atu husu ba Ita-nia an

 1. Haʼu komprende tratamentu neʼebé ema rekomenda ka lae? Bíblia anima ita atu buka informasaun neʼebé bele tau fiar duké “fiar ba liafuan hotu”.—Provérbios 14:15.

 2. Duké tuir deʼit rekomendasaun husi doutór ida, haʼu presiza konsulta ho doutór seluk hodi husu ninia opiniaun ka lae? Kuandu “ema barak fó konsellu”, neʼe bele lori benefísiu liuliu se Ita iha problema saúde neʼebé sériu.—Provérbios 15:22.

 3. Tratamentu neʼe envolve buat neʼebé kontra Bíblia nia mandamentu kona-ba “hasees an . . . husi raan” ka lae?—Apóstolu 15:20.

 4. Konsulta ka tratamentu neʼe uza espiritizmu ka lae? Bíblia bandu ema atu labele “halo espiritizmu”. (Galásia 5:19-21) Atu buka-hatene se konsulta ka tratamentu envolve espiritizmu ka lae, haree pergunta tuirmai:

•   Ema neʼe uza espiritizmu ka lae?

•   Tratamentu neʼe bazeia ba ideia neʼebé dehan katak Ita moras tanba maromak sira hirus Ita ka iha ema neʼebé fekit Ita ka lae?

•   Atu prepara ai-moruk, sira halo buat ruma hanesan hasaʼe sakrifísiu, temi liafuan espiritizmu, halo serimónia ruma, ka uza sasán neʼebé liga ho espiritizmu ka lae?

 5. Haʼu hanoin demais kona-ba haʼu-nia saúde ka lae? Bíblia fó konsellu: “Halo ema hotu haree katak imi la ulun-toos.” (Filipe 4:5) Kuandu iha hanoin neʼebé loos, neʼe ajuda Ita atu fokus ba “buat sira neʼebé importante liu”, hanesan uza tempu atu serbí Jeová.—Filipe 1:10; Mateus 5:3.