Bele, tanba ajuda diʼak liu neʼebé ita bele hetan mai husi “Maromak neʼebé fó kmaan ba ema laran-triste”.​—2 Korinto 7:6.

•   Forsa. Maromak “fó kmaan” ba Ita, laʼós hodi halakon Ita-nia susar hotu, maibé Maromak sei hatán Ita-nia orasaun bainhira Ita husu forsa atu tahan. (Filipe 4:13) Ita bele fiar metin katak Maromak sempre prontu atu rona Ita-nia orasaun. Bíblia hatete: “Jeová besik ema sira neʼebé laran-kanek; nia salva sira neʼebé laran-triste.” (Salmo 34:18) Tuir loloos, Maromak bele rona Ita-nia halerik maski Ita la hatene ho loloos oinsá atu fó sai Ita-nia sentimentu.​—Roma 8:26, 27.

•   Ezemplu diʼak. Ema ida neʼebé hakerek Bíblia halo orasaun ba Maromak, dehan: “Iha susar boot nia laran, haʼu bolu Ita.” Nia kontrola ninia laran-triste hodi hanoin-hetan katak Maromak prontu atu fó perdua ba ninia sala. Nia hatete ba Maromak: “Se mak bele tahan se Ita hateke deʼit ba sala sira? Tanba Ita sei perdua duni ema nia sala sira, atu nuneʼe ema sei hamtaʼuk Ita.”​—Salmo 130:1, 3, 4.

•   Esperansa. Maromak fó kmaan ba Ita agora, maibé nia mós promete katak nia sei halakon problema hotu neʼebé halo Ita laran-triste. Kuandu nia sei kumpre promesa neʼe, “ema sei la hanoin tan buat uluk nian, no buat sira-neʼe sei la rai nafatin iha ema nia laran”.​—Isaias 65:17.

 Atensaun: Ami Testemuña ba Jeová fiar ba Maromak nia ajuda, maibé ami mós buka hetan tratamentu médiku ba problema saúde hanesan moras depresaun. (Marcos 2:17) Maibé ami la promove tratamentu espesífiku ruma ba lee-naʼin sira, tanba ami fiar katak ema ida-idak tenke halo desizaun rasik kona-ba tratamentu neʼebé ema ida-idak hetan.