Maski Bíblia la uza liafuan “abortu”, maibé eskritura barak iha Bíblia esplika Maromak nia hanoin kona-ba ema nia moris, inklui bebé iha inan nia knotak.

 Moris mak prezente husi Maromak. (Génesis 9:6; Salmo 36:9) Tuir Maromak hanoin, moris hotu mak folin-boot, inklui mós bebé iha inan nia knotak. Entaun, se ema ida halo planu atu oho bebé neʼebé iha inan nia knotak, neʼe hanesan ho oho ema.

 Maromak nia Ukun-Fuan neʼebé nia fó ba ema Izraél dehan: “Se mane sira baku malu no hakanek feto ida neʼebé isin-rua no nia tuur-ahi sedu maibé se feto neʼe no ninia bebé la mate, ema neʼebé halo sala neʼe tenke selu multa neʼebé feto neʼe nia laʼen dehan ba nia; ema neʼe tenke selu multa liuhusi juís sira. Maibé se sira ida mate, entaun ema neʼebé halo ida-neʼe tenke mate, tanba moris tenke troka moris.”—Éxodo 21:22, 23. a

•  Bainhira mak bebé ida nia moris hahú?

•  Maromak bele fó perdua ba feto neʼebé halo abortu ka lae?

•  Halo abortu mak sala ka lae se inan ka labarik nia moris iha perigu laran?

 Tuir Maromak nia haree, ema nia moris hahú husi tempu neʼebé inan foin sai isin-rua, maski embrio mak kiʼik hela. Iha Maromak nia Liafuan Bíblia, Maromak fó sai beibeik katak maski bebé ida seidauk moris-mai, nia ema ida duni. Mai ita koʼalia kona-ba ezemplu balu neʼebé hatudu katak Maromak haree bebé iha inan nia knotak hanesan bebé neʼebé moris-mai ona.

•   Espíritu santu book Liurai David atu hatete ba Maromak: “Ita-nia matan haree ona haʼu iha haʼu-nia inan nia knotak.” (Salmo 139:16) Maromak haree David nuʼudar ema ida maski iha ninia inan nia knotak.

•   Liután neʼe, Maromak hatene katak nia iha knaar espesiál ba profeta Jeremias antes Jeremias moris-mai. Maromak hatete ba nia: “Antes haʼu kria ó iha ó-nia inan nia knotak, haʼu hatene ona ó, no antes ó moris mai, haʼu hili ona ó atu halo serbisu santu. Haʼu halo ó sai nuʼudar profeta ba nasaun sira.”—Jeremias 1:5.

•   Bíblia nia hakerek-naʼin naran Lucas mak doutór ida, nia uza liafuan Gregu neʼebé hanesan kuandu koʼalia kona-ba bebé iha inan nia knotak no bebé neʼebé moris-mai ona.—Lucas 1:41; 2:12, 16.

 Feto neʼebé uluk halo abortu bele hetan perdua husi Maromak. Se agora sira simu Maromak nia hanoin kona-ba moris, sira la presiza kontinua fó sala ba sira-nia an. “Jeová laran-sadiʼa no laran-diʼak . . . Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.” b (Salmo 103:8-12) Jeová sei fó perdua ba ema hotu neʼebé arrepende an ho laran kona-ba sira-nia sala uluk nian, inklui mós halo abortu.—Salmo 86:5

 Tuir buat neʼebé Bíblia fó sai kona-ba bebé iha inan nia knotak, ema ida labele halo abortu tanba karik inan ka oan nia moris iha perigu laran.

 Maibé oinsá se situasaun emerjénsia ida mosu no presiza hili atu salva inan nia moris ka bebé nia moris? Iha situasaun hanesan neʼe, família presiza halo desizaun rasik kona-ba salva sé nia moris.