Hanoin neʼebé la hanesan kona-ba halimar, toman ka jeitu bele hamosu problema entre feen no laʼen. Maibé buat neʼebé bele hamosu problema boot liu iha uma-laran mak hanesan tuirmai neʼe:

•   Tempu hira atu gasta ho laʼen ka feen nia família

•   Oinsá atu uza osan didiʼak

•   Atu iha oan ka lae

 Saida mak ita bele halo se Ita no Ita-nia kaben hanoin la hanesan?

•  Buat neʼebé Ita presiza hatene

•  Saida mak Ita bele halo

 La iha feen-laʼen ida neʼebé sempre iha hanoin neʼebé hanesan. Maski dala barak feen-laʼen hanoin hanesan, dala ruma sira sei iha hanoin neʼebé la hanesan kona-ba buat importante ruma.

 “Haʼu sai boot iha família neʼebé gasta tempu barak hamutuk. Findesemana, ami gasta tempu ho avó, tiu, tia, primu no prima sira. Maibé haʼu-nia laʼen nia família la halibur hamutuk beibeik. Entaun ami iha hanoin la hanesan kona-ba tempu hira mak ami sei gasta ho família ka kontaktu família neʼebé hela dook.”—Tamara.

 “Haʼu no haʼu-nia feen iha hanoin la hanesan kona-ba gasta osan tanba dalan neʼebé inan-aman haboot ami. Kuandu ami foin kaben, ami diskute malu beibeik kona-ba osan. Ami presiza koʼalia ba malu beibeik hodi rezolve problema neʼe.”—Tyler.

 Ita labele rezolve problema balu liuhusi halo mudansa simples. Porezemplu, Ita sei halo saida se banin moras no presiza ema atu tau matan? Ka, se Ita-nia kaben hakarak iha oan maibé Ita lakohi? a

 “Haʼu-nia feen no haʼu koʼalia beibeik kona-ba atu iha oan ka lae. Nia hanoin beibeik kona-ba neʼe, no ami komesa hanoin la hanesan. Haʼu la hatene oinsá ami sei rezolve ida-neʼe.”—Alex.

 Maski iha hanoin la hanesan, la dehan katak moris kaben tenke naksobu. Ema balu dehan katak se Ita no Ita-nia kaben iha hanoin la hanesan kona-ba buat importante ruma, Ita tenke halo buat naran deʼit hodi manán, maski presiza soe malu atu kumpre ida-neʼe. Maibé dalan neʼe tau fokus liu ba Ita rasik nia hanoin no sentimentu duké Ita-nia juramentu iha Maromak nia oin atu hela hamutuk ho Ita-nia kaben, maski hasoru situasaun naran deʼit.

 Hakaʼas an atu halo tuir ita-nia juramentu kaben nian. Se ita haburas hakarak ida-neʼe, neʼe sei ajuda ita sai ekipa ida hodi rezolve problema sira.

 Bíblia nia prinsípiu: “Buat neʼebé Maromak tau hamutuk, ema keta haketak.”—Mateus 19:6.

 Tetu didiʼak desizaun neʼebé ita halo. Porezemplu, karik Ita hakarak oan maibé Ita-nia kaben, lae. Presiza hanoin kona-ba buat balu, hanesan:

•   Ita-nia moris kaben nian mak metin duni ka lae?

   Ita-nia moris kaben nian bele tahan estrese neʼebé bele mosu tanba haboot oan?

•   Responsabilidade neʼebé inan-aman iha.

   Sai inan-aman laʼós deʼit kona-ba fó hahán, roupa no hela-fatin, maibé envolve buat barak liután.

•   Ita-nia situasaun finanseiru.

   Ita bele halo serbisu, tau matan família, no mós buat importante seluk iha tempu hanesan ka lae?

 Bíblia nia prinsípiu: “Se ema ida hakarak harii uma-andár, nia sei tuur uluklai hodi sura ninia osan.”—Lucas 14:28.

 Hanoin kona-ba buat hotu neʼebé sei kona Ita-nia desizaun. Se Ita halo ida-neʼe, karik Ita bele rezolve problema balu. Porezemplu, se desizaun mak kona-ba atu iha oan ka lae, kaben neʼebé duvida hela bele husu ninia an:

•   ‘Bainhira haʼu dehan katak haʼu lakohi iha oan, neʼe katak haʼu nunka hakarak atu iha oan ka agora daudaun deʼit?’

•   ‘Haʼu lakohi iha oan tanba duvida haʼu bele sai inan ka aman neʼebé diʼak ka lae?’

•   ‘Haʼu taʼuk katak haʼu-nia kaben nia domin ba haʼu sei menus ka lae?’

 Kaben neʼebé hakarak iha oan bele husu ninia an pergunta hanesan:

•   ‘Ami prontu atu simu responsabilidade nuʼudar inan-aman ka lae?’

•   ‘Ami-nia situasaun finanseiru ajuda ami atu haboot oan ka lae?’

 Bíblia nia prinsípiu: “Matenek husi lalehan . . . prontu atu simu ema seluk nia hanoin.”—Tiago 3:17, nota-rodapé.

 Hanoin kona-ba buat neʼebé diʼak tuir Ita-nia kaben nia haree. Ema naʼin-rua bele haree dezeñu ida neʼebé hanesan maibé sira ida-idak haree iha dalan neʼebé la hanesan. Hanesan neʼe, kaben-naʼin sira bele hanoin iha dalan neʼebé la hanesan maski tópiku ida deʼit, porezemplu, oinsá atu gasta osan. Kuandu atu koʼalia kona-ba buat ruma neʼebé Ita ho Ita-nia kaben la konkorda, hahú koʼalia kona-ba buat neʼebé Ita ho Ita-nia kaben konkorda.

•   Ita konkorda kona-ba objetivu saida deʼit?

•   Saida mak diʼak kona-ba Ita-nia kaben nia hanoin?

•   Atu hametin Ita-nia moris kaben nian, Ita bele troka Ita-nia hanoin hodi ajuda malu?

 Bíblia nia prinsípiu: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”—1 Korinto 10:24.