Entre tinan 1990 no 2015, númeru ba divórsiu ba sira neʼebé tinan 50 ba leten sai barak liu dala rua iha Estadus Unidus, no ba tinan 65 liu sai barak liu dala tolu. Tanbasá mak ema divórsiu bainhira idade boot ona? Oinsá Ita bele proteje Ita-nia moris kaben husi divórsiu?

Iha informasaun neʼe

•  Saida mak halo ema idade boot divórsiu?

•  Saida mak Ita bele halo?

•  Koʼalia hamutuk ho Ita-nia pár

•    Dala barak, kaben-naʼin sira neʼebé idade boot ona mak halo divórsiu tanba sira-nia relasaun neineik-neineik sai fraku. Tempu liu daudaun, karik feen-laʼen balu komesa haburas interese ba buat neʼebé la hanesan no sente katak sira iha diferensa barak demais. Ka depois oan sira husik uma, feen-laʼen ida karik rekoñese katak sira toman ona atu sai inan no aman maibé haluha oinsá atu sai feen ka laʼen neʼebé diʼak.

•    Iha tinan barak nia laran, matenek-naʼin sira kona-ba moris kaben nian fó anima ba kaben-naʼin sira atu fokus ba sira ida-idak nia presiza rasik. ‘Haʼu-nia moris kaben halo haʼu kontente ka lae?’ ‘Halo haʼu sai ema neʼebé diʼak liu ka lae?’ ‘Haʼu-nia kaben halo haʼu sente domin no iha folin ka lae?’ Se lae, tuir sira-nia hanoin mak Ita presiza halo buat neʼebé diʼak liu ba Ita-nia an rasik, neʼe mak halo divórsiu no halaʼo moris foun.

•   Ema barak la haree tan divórsiu nuʼudar buat neʼebé aat. Sosiólogu ida naran Eric Klinenberg hakerek: “Uluk, ema neʼebé la kontente ho ninia kaben no hakarak atu divórsiu tenke iha razaun forte ba ninia desizaun neʼe. Ohin loron la hanesan neʼe: Se ita la kontente ho ita-nia moris kaben, ita tenke iha razaun forte tanbasá ita nafatin mantein relasaun neʼe. Neʼe tanba ema barak ohin loron fiar katak buat neʼebé importante liu mak atu halo buat neʼebé diʼak ba ita-nia an rasik.” a

 Klaru katak divórsiu dala barak aumenta liután problema. Porezemplu, peskiza ida hatudu katak “divórsiu bainhira idade ona dala barak lori problema ekonomia neʼebé sériu, liuliu ba feto sira”.

 Presiza mós tetu buat seluk tan. Livru Don’t Divorce hatete: “Ita bele komesa moris foun, maibé Ita ema neʼebé hanesan deʼit. Saida mak Ita halo ona atu troka Ita-nia dalan komunikasaun neʼebé uluk hamosu problema entre Ita no Ita-nia kaben? Saida mak Ita halo ona atu troka dalan neʼebé Ita rezolve problema?” b

•   Simu mudansa. La iha relasaun neʼebé sempre hanesan deʼit. Karik Ita-nia relasaun ho Ita-nia kaben troka tanba oan sira muda sai ona ka tanba imi naʼin-rua haburas toman neʼebé la hanesan. Duké hanoin beibeik ba pasadu, diʼak liu hanoin kona-ba dalan atu hadiʼa situasaun agora nian.

   Bíblia nia prinsípiu: “Keta dehan: ‘Tanbasá mak loron uluk nian diʼak liu fali agora?’ Ó la hatudu matenek bainhira husu ida-neʼe.”—Eclesiastes 7:10.

•   Hametin relasaun belun ho Ita-nia kaben. Bele ka lae koko atu gosta buat neʼebé Ita-nia kaben gosta, ka Ita bele koko konvida Ita-nia kaben atu halo buat neʼebé Ita gosta? Bele ka lae Ita buka buat foun ruma atu halo ka aprende hamutuk ho Ita-nia kaben? Ita-nia objetivu mak atu gasta tempu hamutuk ho Ita-nia kaben, hodi nuneʼe Ita no Ita-nia kaben bele sente katak imi mak pár kaben nian, laʼós kolega neʼebé hela hamutuk deʼit.

   Bíblia nia prinsípiu: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”—1 Korinto 10:24.

•   Mantein atitude neʼebé diʼak. Keta para hatudu hahalok diʼak tan deʼit imi hamutuk ba tempu kleur ona. Koʼalia ho respeitu ba Ita-nia kaben, no koko hatudu hahalok diʼak neʼebé Ita iha bainhira sei namora. Dehan “favór” no “obrigadu”. Fó sai Ita-nia domin, no hatudu agradese ba buat neʼebé Ita-nia kaben halo ba Ita.

   Bíblia nia prinsípiu: “Hatudu laran-diʼak ba malu, hanoin malu.”—Éfeso 4:32.

•   Hanoin fali memória diʼak sira. Haree imi-nia foto kazamentu hamutuk, ka haree ba foto sira kona-ba buat neʼebé imi halo hamutuk. Hodi halo nuneʼe bele ajuda Ita hametin ka haburas fali domin no respeitu iha Ita-nia moris kaben.

   Bíblia nia prinsípiu: “Laʼen ida-idak tenke hadomi ninia feen hanesan ninia an rasik, no feen mós tenke hatudu respeitu kleʼan ba ninia laʼen.”—Éfeso 5:33.