ESPLIKASAUN KONA-BA ESKRITURA

Génesis 1:26—“Mai ita kria ema tuir ita-nia ilas”

LOKE

“Tuirmai Maromak dehan: ‘Mai ita kria ema tuir ita-nia ilas, atu hanesan ho ita, no sira sei domina ikan sira iha tasi, animál neʼebé semo, animál maus sira no rai tomak no mós animál seluk iha rai.’”—Génesis 1:26, Tradusaun Mundu Foun.

“Maromak dehan, ‘Mai Ita halo ema tuir Ita nia ilas, hanesan Ita nia Aan. Sira bele domina ikan sira iha tasi, no manu sira iha loro leten, no animál sira nebee hakiak, no rai tomak, no buat hotu nebee dolar iha rai.’”—Jénesis 1:26, Bíblia Kadi Kapasidade.

Signifikadu husi Génesis 1:26

Maromak kria ema tuir ninia ilas, neʼe katak ema iha kapasidade atu haburas no haleno Maromak nia hahalok sira, hanesan domin, hanoin ema seluk, no justisa. Neʼe mak razaun tanbasá ema bele banati-tuir Maromak nia hahalok.

“Maromak dehan: ‘Mai ita kria ema tuir ita-nia ilas.’” Antes Maromak Jeová a kria buat seluk, nia kria uluk anju forte ida neʼebé ikusmai ita koñese nuʼudar Jesus. Liuhusi Jesus, “Maromak kria buat hotu iha lalehan no iha rai”. (Koloso 1:16) Jesus haleno Jeová nia hahalok. “Nia mak ilas husi Maromak neʼebé matan labele haree.” (Koloso 1:15) Tan neʼe mak Maromak dehan ba Jesus: “Mai ita kria ema tuir ita-nia ilas.”

“Sira sei domina . . . animál maus sira no rai tomak.” Maromak la kria animál tuir ninia ilas. Animál sira la iha hahalok hanesan ema nian, porezemplu domin ka konxiénsia. Maski nuneʼe, Maromak hanoin no hafolin animál sira. Tan neʼe mak Maromak dehan katak ema tenke domina sira. Liafuan “domina” bele mós tradús nuʼudar “tau matan”. Entaun Jeová fó knaar no responsabilidade ba ema atu tau matan animál sira. (Salmo 8:6-8; Provérbios 12:10) Jeová hakarak ema atu tau matan didiʼak planeta mundu no kriatura moris hotu iha mundu.

Kontestu husi Génesis 1:26

Génesis kapítulu 1 no 2 fó sai informasaun kona-ba Maromak kria universu, mundu, no kriatura oioin iha mundu. Buat hotu neʼebé Jeová kria mak kapás tebes, maibé kriasaun neʼebé furak liu iha mundu mak ema. Bainhira Maromak kria tiha buat sira-neʼe hotu, nia “haree buat hotu neʼebé nia halo ona, no ida-neʼe diʼak tebes”.—Génesis 1:31.

Haree vídeo badak neʼe hodi komprende liután buat neʼebé livru Génesis fó sai kona-ba kriasaun.

Deskulpa, média player labele loke.Download vídeo ne'e

Hanoin neʼebé sala kona-ba Génesis 1:26

Hanoin neʼebé sala: Mane deʼit mak iha kapasidade atu banati-tuir ka haleno Maromak nia hahalok sira. Feto labele.

Hanoin neʼebé loos: Tradusaun Bíblia balu iha lian Inglés uza liafuan “man” iha Génesis 1:26 no neʼe halo ema hanoin katak liafuan neʼe refere deʼit ba mane. Maibé iha kontestu neʼe, liafuan Ebraiku orijinál refere ba ema hotu, inklui mane no feto. Mane no feto bele haleno Maromak nia hahalok sira, iha oportunidade neʼebé hanesan atu halo Maromak kontente, no bele simu moris rohan-laek nuʼudar prezente.—João 3:16.

Hanoin neʼebé sala: Maromak iha isin hanesan ema.

Hanoin neʼebé loos: “Maromak mak Espíritu”, neʼe katak nia la hanesan ho ema neʼebé iha isin no raan. (João 4:24) Dala ruma Bíblia temi kona-ba Maromak nia oin, liman, fuan, ka buat seluk, maibé neʼe atu halo fasil ba ema hodi bele komprende kona-ba Maromak.—Éxodo 15:6; 1 Pedro 3:12.

Hanoin neʼebé sala: Génesis 1:26 prova katak Jesus mak Maromak.

Hanoin neʼebé loos: Maromak no Jesus iha relasaun neʼebé besik nuʼudar aman no oan, maibé Jesus ho Maromak la hanesan. Jesus hanorin katak Maromak mak boot liu fali nia. (João 14:28) Atu hetan informasaun liután, haree vídeo Jesus Kristu mak Maromak ka lae? ka lee informasaun “Tanbasá Bíblia bolu Jesus nuʼudar Maromak nia Oan-Mane?”