“Tanba Maromak nia liafuan moris no iha kbiit boot no kroʼat liu fali surik ida ho kroʼat iha sorin-sorin, no bele sona tama toʼo haketak ema nia moris husi ema nia laran, no haketak ruin-fukun husi ruin-dolen, no bele hatene ema nia hanoin no hakarak iha laran.”—Ebreu 4:12, Tradusaun Mundu Foun.

 “Tebes duni, Maromak nia liafuan moris no book makaʼas, kroat liu fali surik ida ho kroat rua, nebe bele tesi ketak klamar no espiritu, ruin no bokur, no bele hatene lo-los buat nebe ema hanoin no hakarak iha nia fuan.”—Ebreu 4:12, Liafuan diak ba imi, segunda edisaun.

 Maromak nia liafuan neʼebé hakerek iha Bíblia, iha kbiit atu fó sai ita-nia hanoin no motivu. Liafuan sira iha Bíblia mós iha kbiit atu troka ema nia hahalok.

 “Maromak nia liafuan moris.” Fraze “Maromak nia liafuan” refere ba Maromak nia promesa ka ninia objetivu neʼebé hakerek iha Bíblia. a Parte importante husi objetivu neʼe mak ema neʼebé halo tuir Maromak sei moris ba nafatin iha mundu ho dame no unidade.—Génesis 1:28; Salmo 37:29; Apokalipse 21:3, 4.

 Oinsá mak Maromak nia liafuan ka ninia objetivu “moris”? Razaun ida, tanba Maromak nia liafuan bele book makaʼas ema neʼebé laran-loos hodi fó esperansa no objetivu ba moris. (Deuteronómio 30:14; 32:47) Maromak nia liafuan kona-ba promesa mós “moris”, tanba Maromak neʼebé moris mak serbisu daudaun atu kumpre ninia promesa. (João 5:17) Maromak la hanesan ho ema neʼebé halo promesa maibé ikusmai haluha tiha ka rekoñese katak la iha kapasidade atu kumpre ida-neʼe. (Números 23:19) Maromak nia liafuan ‘sei la fila fali ba nia se neʼe seidauk fó rezultadu’.—Isaias 55:10, 11.

 “Maromak nia liafuan . . . iha kbiit boot.” Fraze “iha kbiit boot” bele mós tradús nuʼudar “book makaʼas”, “iha podér”, “ativu”, ka “kumpre buat naran deʼit neʼebé nia hakarak”. Tan neʼe, ita bele fiar metin katak Maromak Jeová b sei kumpre buat naran deʼit neʼebé nia hatete ka promete. (Salmo 135:6; Isaias 46:10) Tuir loloos, Maromak bele kumpre ninia promesa iha dalan neʼebé furak liu fali buat neʼebé ita hanoin.—Éfeso 3:20. c

 Maromak nia liafuan mós “iha kbiit boot” atu ajuda ema neʼebé hafolin ida-neʼe hodi hadiʼa sira-nia moris no hahalok. Maromak nia hanorin sai parte iha sira-nia moris, no fó influénsia ba sira-nia hanoin, toman no planu. (Roma 12:2; Éfeso 4:24) “Maromak nia liafuan . . . ajuda daudaun” sira neʼebé simu ho laran.—1 Tesalónika 2:13.

 “Maromak nia liafuan . . . kroʼat liu fali surik ida ho kroʼat iha sorin-sorin.” Maromak nia liafuan mak hanesan surik ida neʼebé kroʼat liu fali ema nia surik, tanba iha kbiit atu sona borus ema nia laran. Maromak nia liafuan bele afeta ema nia laran iha dalan neʼebé ema nia hanorin labele halo. Haree toʼok esplikasaun kona-ba Ebreu 4:12 nia parte ikus.

 “Maromak nia liafuan . . . bele sona tama toʼo haketak ema nia moris husi ema nia laran, no haketak ruin-fukun husi ruin-dolen.” Liafuan “moris” neʼebé temi iha Bíblia bele refere ba ema neʼe haree hanesan saida husi liʼur, no “laran” refere ba ema neʼe nia laran mak hanesan saida. (Galásia 6:18) “Maromak nia liafuan” bele tama borus toʼo “ruin-dolen”, neʼe mak ita-nia sentimentu no hanoin neʼebé kleʼan liu. Kuandu Maromak Jeová nia liafuan fó sai ita-nia sentimentu no hanoin iha laran neʼebé ema ida la hatene, neʼe bele book ita atu halo mudansa no sei lori haksolok ba ita-nia Kriadór no mós ba ita.

 “Maromak nia liafuan . . . bele hatene ema nia hanoin no hakarak iha laran.” Dalan neʼebé ema ida responde ba Maromak nia liafuan bele hatudu sai ninia hanoin, no mós ninia hakarak no motivu neʼebé fó influénsia ba ninia hahalok. Porezemplu, se ema ida simu Maromak nia liafuan no halo mudansa iha ninia moris, neʼe hatudu katak nia haraik an no laran-moos. Nia hakarak halo ninia Kriadór kontente. Maibé se ema neʼe buka deʼit sala husi Maromak nia liafuan, neʼe katak nia hatudu sai hahalok aat hanesan foti an ka hanoin an. Karik nia buka razaun atu hatudu hahalok neʼebé Maromak la gosta.—Jeremias 17:9; Roma 1:24-27.

 Livru referénsia ida dehan katak Maromak nia liafuan “bele toʼo iha ita-nia laran neʼebé kleʼan liu”. La iha buat ida mak bele subar husi Maromak, no ninia liafuan bele fó sai buat hotu neʼebé iha ema nia laran. Ebreu 4:13 dehan katak Maromak “bele haree buat hotu ho momoos no buat hotu nakloke iha ninia matan. Ba nia mak ita tenke hatán”.

 Iha tinan 61 EC, Maromak nia espíritu dirije apóstolu Paulo atu hakerek livru Ebreu, neʼe mak karta ba ema Kristaun Judeu iha Jeruzalein no Judeia.

 Iha kapítulu 3 no 4, Paulo esplika oinsá mak ema Izraél antigu nia ezemplu aat sai nuʼudar avizu ba ema Kristaun. (Ebreu 3:8-12; 4:11) Jeová promete atu salva ema Izraél husi situasaun atan no lori sira ba rai neʼebé sira bele “moris hakmatek”. (Deuteronómio 12:9, 10) Maski nuneʼe, sira neʼebé sai husi Ejitu hatudu katak sira la iha fiar ba Maromak nia promesa sira, no kontra beibeik ninia mandamentu. Rezultadu mak sira la ‘tama iha Maromak nia fatin deskansa nian’ no la iha relasaun diʼak ho Maromak. Ikusmai sira mate iha rai-fuik maran. Sira-nia oan no bei-oan sira konsege tama iha rai neʼebé Maromak promete, maibé sira mós la halo tuir no neʼe lori susar boot ba nasaun tomak.—Neemias 9:29, 30; Salmo 95:9-11; Lucas 13:34, 35.

 Paulo esplika katak ema Kristaun presiza aprende husi ema Izraél nia ezemplu aat neʼe. La hanesan ho ema Izraél neʼebé la hatudu laran-metin, ita bele tama iha Maromak nia fatin deskansa hodi halo tuir ninia liafuan no tau fiar tomak ba ninia promesa.—Ebreu 4:1-3, 11.

 Haree vídeo badak neʼe hodi komprende kona-ba livru Ebreu.