•   Ita sempre iha problema ho sé?

  •  Apá

  •  Amá

•   Dala hira mak problema mosu entre Ita no Ita-nia inan-aman?

  •  Ladún akontese

  •  Dala ruma deʼit

  •  Sempre

•   Kuandu imi diskute malu, oinsá imi rezolve ida-neʼe?

  •  Baibain ami rezolve lalais no la diskute malu.

  •  Baibain ami diskute malu ba tempu naruk, tuirmai mak hadame malu.

  •  Ami diskute malu ba tempu naruk, no nunka rezolve ami-nia problema.

 Bainhira mosu problema entre Ita no Ita-nia inan-aman, karik Ita hanoin katak sira mak tenke hadiʼa situasaun. Maibé informasaun neʼe sei koʼalia kona-ba saida deʼit mak Ita bele halo atu problema la mosu beibeik entre Ita no Ita-nia inan-aman. No se problema mosu, saida mak Ita bele halo atu ida-neʼe la sai problema boot. Primeiru, hanoin toʼok . . .

•   Dalan atu hanoin. Bainhira Ita sai boot, Ita komesa iha hanoin neʼebé sériu liu kompara ho tempu neʼebé Ita sei labarik. Ita mós iha hanoin rasik no dala ruma ita-nia hanoin la hanesan ho Ita-nia inan-aman nian. Maski nuneʼe, Bíblia hatete: “Hatudu respeitu ba imi-nia inan-aman.”​—Éxodo 20:12.

   Realidade: Presiza duni sai maduru no hakaʼas an atu hatudu respeitu nafatin bainhira la konkorda malu.

•   Hakarak atu livre. Nuʼudar Ita sai boot ba daudaun, Ita-nia inan-aman sei fó liberdade liután ba Ita. Maibé problema mak karik liberdade neʼebé sira fó, la tuir buat neʼebé Ita hakarak atu hetan, no neʼe bele hamosu problema. Maski nuneʼe, Bíblia fó-hanoin: “Halo tuir imi-nia inan-aman.”​—Éfeso 6:1.

   Realidade: Baibain, liberdade neʼebé Ita-nia inan-aman fó mai Ita depende ba oinsá Ita uza liberdade neʼebé sira fó ona ba Ita.

•   Tau fokus ba buat neʼebé Ita rasik bele halo. Duké duun katak Ita-nia inan-aman mak sala, diʼak atu hanoin kona-ba buat neʼebé Ita bele halo atu situasaun sai kalma fali. Mane joven ida naran Jeffrey hatete: “Dala ruma, buat neʼebé halo problema sai boot liu laʼós buat neʼebé Ita-nia inan-aman hatete maibé dalan neʼebé Ita koʼalia ba sira. Se Ita koʼalia ho kalma, neʼe bele ajuda atu rezolve lalais problema.”

   Bíblia hatete: “Hakaʼas an atu moris iha dame ho ema hotu.”​—Roma 12:18.

•   Rona. Samantha neʼebé tinan 17 hatete: “Haʼu aprende katak susar tebes atu rona didiʼak. Maibé haʼu mós aprende katak bainhira ita-nia inan-aman haree katak ita rona didiʼak, neʼe mós sei book sira atu rona ba ita.”

   Bíblia hatete: “Ema hotu tenke lalais atu rona, la ansi atu koʼalia.”​—Tiago 1:19.

•   Apoia malu hanesan ekipa ida. Rezolve problema ida mak atu hanesan ho joga tenis. Ita no Ita-nia inan-aman iha ekipa hanesan, imi mak ekipa ida deʼit. No imi presiza halimar hasoru buat neʼebé hanesan, buat neʼe mak problema neʼebé imi presiza rezolve. Mane joven ida naran Adam hatete: “Bainhira problema ida mosu, inan-aman sira hakarak buat neʼebé diʼak ba sira-nia oan. No oan sira mós hakarak buat neʼebé diʼak ba sira-nia an. Entaun tuir loloos, inan-aman no oan sira iha objetivu neʼebé hanesan.”

   Bíblia hatete: “Buka atu halo buat neʼebé haburas dame.”​—Roma 14:19.

•   Koko komprende Ita-nia inan-aman. Joven feto ida naran Sarah hatete: “Diʼak atu hanoin-hetan katak inan-aman mós presiza tahan hasoru sira-nia problema rasik, no baibain problema sira-neʼe boot liu fali ita-nian.” Joven feto ida naran Carla hatete: “Haʼu koko atu tau haʼu-nia an iha haʼu-nia inan-aman nia pozisaun. Se haʼu haboot oan no hasoru situasaun neʼebé hanesan, saida mak haʼu sei halo? Saida mak diʼak ba haʼu-nia oan?”

   Bíblia hatete: “Keta buka diʼak deʼit ba imi-nia an rasik, maibé buka mós ema seluk nia diʼak.”​—Filipe 2:4.

•   Halo tuir inan-aman. Bíblia hatete katak Ita tenke halo tuir Ita-nia inan-aman. (Koloso 3:20) Buat hotu sei sai fasil liu se Ita halo tuir sira. Feto ida naran Karen hatete: “Haʼu-nia moris sai fasil liu bainhira haʼu halo tuir haʼu-nia inan-aman nia liafuan. Haʼu-nia inan-aman halo ona buat barak mai haʼu, entaun haʼu bele hatudu agradese ba ida-neʼe hodi halo tuir sira.” Halo tuir inan-aman mak dalan diʼak liu hotu atu bele iha dame ho sira.

   Bíblia hatete: “Ahi sei mate kuandu la iha ai.”​—Provérbios 26:20.

 Sujestaun. Se Ita sente susar atu koʼalia sai Ita-nia sentimentu, koko hakerek Ita-nia liafuan iha surat-tahan ka haruka liuhusi SMS. Feto joven ida naran Alyssa hatete: “Haʼu halo nuneʼe bainhira haʼu sente hirus. Neʼe ajuda haʼu atu fó sai haʼu-nia sentimentu no la presiza hakilar ka hatete liafuan oioin neʼebé karik haʼu sei arrepende.”