Problema saúde bele mosu iha dalan oioin.

•   Ema balu iha sintoma neʼebé ema seluk bele nota kedas, maibé ema seluk hetan moras iha laran neʼebé ema labele haree.

•   Moras balu mak temporáriu deʼit, maibé moras seluk mak permanente no hamosu susar loroloron.

•   Moras balu bele kura ka bele kontrola atu la sai aat liu, maibé moras seluk bele sai aat ba beibeik no lori perigu ba sira-nia moris.

 Joven sira hasoru ona moras neʼebé temi iha neʼe. Iha informasaun neʼe, Ita sei haree esperiénsia sira husi joven naʼin-haat neʼebé mak hasoru ona situasaun susar neʼe. Se Ita terus tanba moras ruma, karik Ita bele hetan kmaan husi sira-nia esperiénsia.

•  GUÉNAELLE

•  ZACHARY

•  ANAÏS

•  JULIANA

 Buat neʼebé susar liu hotu mak simu haʼu-nia limitasaun. Haʼu hakarak atu halo buat barak, maibé loroloron haʼu presiza hatoman an ho haʼu-nia kondisaun.

 Haʼu iha problema ho haʼu-nia uat sira neʼebé prevene haʼu-nia kakutak atu haruka sinál neʼebé loos ba haʼu-nia isin-lolon. Dala ruma, parte balu husi haʼu-nia isin-lolon sei matek ka nakdedar mesak. Susar ba haʼu atu halo buat kiʼik sira hanesan, book an, koʼalia, lee, hakerek no komprende ema seluk. Bainhira haʼu sente laran-taridu tebes, katuas sira husi haʼu-nia kongregasaun halo orasaun hamutuk ho haʼu. Kuandu sira halo ida-neʼe, haʼu sente kalma kedas.

 Maski hasoru susar naran deʼit, haʼu sente katak Maromak Jeová sempre ajuda haʼu. Haʼu lakohi haʼu-nia moras neʼe hanetik haʼu atu serbí Maromak liután. Haʼu hakaʼas an atu ajuda ema seluk aprende kona-ba Bíblia nia promesa neʼebé hatete katak lakleur tan Maromak Jeová sei halo mundu sai fali Paraízu, bainhira la iha tan terus.​—Apokalipse 21:1-4.

Hanoin toʼok: Oinsá mak Ita bele hatudu laran-sadiʼa ba ema seluk hanesan ho Guénaelle?​—1 Korinto 10:24.

 Kuandu haʼu tinan 16, doutór hatete katak iha kankru iha haʼu-nia kakutak no neʼe mak grave. Doutór hatete katak haʼu bele moris ba fulan ualu deʼit. No husi tempu neʼebá, haʼu presiza luta makaʼas atu bele kontinua moris.

 Tanba tumór nia pozisaun iha haʼu-nia kakutak, agora haʼu-nia isin sorin loos mak matek. Tanba haʼu labele laʼo, haʼu presiza ema ruma atu sempre hamaluk haʼu iha uma hodi ajuda haʼu.

 Moras neʼe mós halo haʼu susar atu koʼalia ho moos. Uluk haʼu mak ema neʼebé gosta atu halo atividade oioin, haʼu halimar ski bee nian, basket, no voli. No nuʼudar Testemuña ba Jeová, haʼu badinas iha serbisu haklaken. Haʼu hanoin ema barak labele komprende buat neʼebé ita sente bainhira ita lakon ita-nia kbiit atu halo buat oioin neʼebé ita gosta tebes.

 Liafuan iha Isaias 57:15 anima haʼu tanba fó haʼu konfiansa katak Maromak Jeová sempre hamutuk ho ema “neʼebé hetan terus” no nia hanoin haʼu. No Isaias 35:6 mós temi Jeová nia promesa neʼebé dehan katak haʼu sei laʼo fali no bele serbí nia ho saúde neʼebé perfeitu.

 Maski dala ruma susar atu tahan ho situasaun neʼe, maibé haʼu fiar katak Jeová sempre apoia haʼu. Liuhusi orasaun, haʼu sempre bele koʼalia ba Maromak kuandu haʼu sente laran-taridu ka taʼuk. La iha buat ida mak bele haketak haʼu husi Jeová nia domin.​—Roma 8:39.

 Fulan rua depois Zachary halo entrevista neʼe, nia mate ho tinan 18. Nia nafatin kaer metin ninia esperansa ba Maromak nia promesa kona-ba moris-hiʼas iha mundu paraízu toʼo nia mate.

Hanoin toʼok: Oinsá orasaun bele ajuda Ita atu nafatin hela iha Maromak nia domin, hanesan ho Zachary?

 Loron balu depois haʼu moris, buat ruma la loos ho uat sira iha haʼu-nia kakutak. Neʼe afeta haʼu-nia isin-lolon no halo haʼu sai defisiente, liuliu haʼu-nia ain.

 Ohin loron, haʼu bele laʼo ba tempu uitoan hodi uza ai-tonka, maibé baibain haʼu uza kadeira-roda. Haʼu-nia uat mós dala ruma naksalak no neʼe halo haʼu susar atu halo atividade sira neʼebé simples, hanesan hakerek.

 Haʼu sente estrese ho haʼu-nia situasaun, no haʼu-nia tratamentu mós lori susar mai haʼu. Haʼu halaʼo fizioterapia ba dala balu semana-semana ba tempu kleur. Haʼu hetan operasaun boot ba dala primeiru mak kuandu haʼu foin tinan lima. Haʼu mós presiza hetan operasaun dala tolu tan. Operasaun rua ikus neʼebé haʼu hetan mak tempu neʼebé susar tanba haʼu dook husi uma ba fulan tolu durante haʼu-nia tempu rekuperasaun.

 Haʼu-nia família ajuda tebes haʼu. Ami hamnasa hamutuk, neʼe ajuda boot bainhira haʼu sente laran-kraik. Haʼu-nia amá, haʼu-nia biin no mós haʼu-nia kaduak ajuda haʼu hadiʼa an, tanba haʼu labele halo ida-neʼe mesak. Haʼu triste uitoan tanba nunka koko uza sapatu aas. Maibé kuandu haʼu sei kiʼik, haʼu koko hatais sapatu iha haʼu-nia liman, ami hotu sente komik ho ida-neʼe!

 Haʼu hakaʼas an atu tau fokus ba buat neʼebé haʼu bele halo, duké ba buat neʼebé haʼu labele. Haʼu aprende língua seluk. Haʼu mós nani, maski haʼu labele surfing ka uza snowboard, maibé haʼu kontente tanba bele nani. Nuʼudar Testemuña ba Jeová, haʼu gosta atu haklaken ba ema seluk. Haʼu sente ema tau atensaun bainhira haʼu koʼalia ba sira.

 Husi kiʼik, haʼu-nia inan-aman hanorin haʼu katak haʼu-nia kondisaun mak temporáriu deʼit. Tan neʼe haʼu hametin haʼu-nia fiar ba Jeová no ba ninia promesa katak nia sei halakon susar hotu inklui haʼu-nia susar. Neʼe fó haʼu forsa atu kontinua halaʼo haʼu-nia moris.​—Apokalipse 21:3, 4.

Hanoin toʼok: Oinsá mak Ita bele banati-tuir Anaïs neʼebé la husik ninia problema atu manán nia?

 Haʼu hetan problema ho haʼu-nia imunidade no neʼe bele afeta haʼu-nia fuan, pulmaun, no raan. Agora daudaun neʼe estraga ona haʼu-nia rins.

 Haʼu foin tinan sanulu kuandu doutór hatete katak haʼu iha moras lupus, moras neʼe halo haʼu-nia isin sente moras, kole tebes, no sentimentu tun-saʼe. Dala ruma, haʼu sente la iha folin.

 Kuandu haʼu tinan 13, Testemuña ba Jeová ida mai haʼu-nia uma. Nia lee ba haʼu Maromak Jeová nia liafuan husi Isaias 41:10, neʼebé dehan: “Keta taʼuk, tanba haʼu hamutuk ho ó. . . . Haʼu sei kaer metin ó ho haʼu-nia liman-loos justisa nian.” Husi tempu neʼebá, haʼu komesa estuda Bíblia ho Testemuña ba Jeová. Ohin loron, tinan ualu liutiha, haʼu serbí Maromak ho haʼu-nia laran tomak, no haʼu deside metin ona atu la husik haʼu-nia moras hanetik haʼu ka kontrola haʼu. Haʼu sente katak Jeová fó ba haʼu “kbiit neʼebé la hanesan baibain”, atu nuneʼe haʼu bele kontinua iha hanoin neʼebé pozitivu.​—2 Korinto 4:7.

Hanoin toʼok: Oinsá Isaias 41:10 bele ajuda Ita atu iha hanoin neʼebé pozitivu, hanesan ho Juliana?