32  “வானமே,* நான் பேசுவதைக் கேள்.பூமியே, என் வார்த்தைகளைக் கவனி.  ²  என் அறிவுரைகள் மழைபோல் பொழியும்.என் வார்த்தைகள் பனிபோல் இறங்கும்.அவை புல்மேல் விழும் தூறல்போல் இருக்கும்.பயிர்மேல் கொட்டும் மழைபோல் இருக்கும்.  ³  யெகோவாவின் பெயரை நான் புகழ்வேன்.+ நம் கடவுளுடைய மகத்துவத்தை+ எல்லாருக்கும் சொல்லுங்கள்!  ⁴  அவர் கற்பாறை போன்றவர், அவருடைய செயல்கள் குறை இல்லாதவை.+அவருடைய வழிகளெல்லாம் நியாயமானவை.+ அவர் நம்பகமான கடவுள்,+ அநியாயமே செய்யாதவர்.+அவர் நீதியும் நேர்மையும் உள்ளவர்.+  ⁵  அவர்கள்தான் தறிகெட்டு நடந்தார்கள்.+ அவர்கள் அவருடைய பிள்ளைகள் அல்ல. குறையெல்லாம் அவர்கள்மேல்தான் இருக்கிறது.+ அவர்கள் சீர்கெட்டும் நெறிகெட்டும் நடக்கிற தலைமுறை!+  ⁶  அறிவில்லாதவர்களே! முட்டாள்களே!+யெகோவாவுக்கு இப்படித்தான் நன்றி காட்டுவீர்களோ?+ உங்களுக்கு உயிர் கொடுத்த தகப்பன் அவர்தானே?+உங்களை உருவாக்கி, உங்களை நிலைநாட்டியவர் அவர்தானே?  ⁷  பழங்காலத்தை நினைத்துப் பாருங்கள்.கடந்த தலைமுறைகளைப் பற்றி யோசித்துப் பாருங்கள். உங்கள் அப்பாவைக் கேளுங்கள், அவர் சொல்வார்.+உங்கள் பெரியோர்களை* கேளுங்கள், அவர்கள் விளக்குவார்கள்.  ⁸  உன்னதமான கடவுள், ஆதாமின் பிள்ளைகளை* தனித்தனியாகப் பிரித்து,+எல்லாருக்கும் சொத்தைப் பங்குபோட்டபோது,+இஸ்ரவேலர்களின்+ எண்ணிக்கையை மனதில் வைத்து,அந்தந்த தேசத்தின் எல்லையைத் தீர்மானித்தாரே.+  ⁹  யெகோவாவின் ஜனங்கள்தான் அவருடைய செல்வம்.+யாக்கோபுதான் அவருடைய சொத்து.+ ¹⁰  அவனை வனாந்தரத்தில்+ அவர் கண்டுபிடித்தார்.மிருகங்கள் ஓலமிடும் வெறுமையான பாலைவனத்தில்+ அவனைப் பார்த்தார். வேலிபோல் அவனைச் சூழ்ந்து நின்று பாதுகாத்தார்,+கண்ணும் கருத்துமாகக் கவனித்துக்கொண்டார். கண்மணிபோல் காத்தார்.+ ¹¹  கழுகு தன் குஞ்சுகளைக் கூட்டிலிருந்து கலைத்து,*அவற்றின் மேல் வட்டமிட்டுப் பறந்து,பின்பு கீழாக வந்து தன் இறக்கைகளை விரித்து,சிறகுகளில் அவற்றைச் சுமந்துகொண்டு போவது போல,+ ¹²  யெகோவா ஒருவரே அவனை* சுமந்து வந்தார்.+வேறு எந்தத் தெய்வமும் அவரோடு இல்லை.+ ¹³  பூமியின் உயர்ந்த இடங்களை அவன் கைப்பற்றும்படி செய்தார்.+வயலின் விளைச்சலைச் சாப்பிடக் கொடுத்தார்.+ மலையிலிருந்து தேனையும் கற்பாறையிலிருந்து எண்ணெயையும் தந்து போஷித்தார். ¹⁴  பசுமாட்டு வெண்ணெயும் ஆட்டுப் பாலும் ஊட்டினார்.கொழுத்த செம்மறியாடுகளையும், பாசானின் செம்மறியாட்டுக் கடாக்களையும்,வெள்ளாட்டுக் கடாக்களையும் தந்தார்.தரமான கோதுமையைக் கொடுத்தார்.+திராட்சைப் பழங்களின் ரசத்தை* நீ குடித்தாய். ¹⁵  ஆனால் யெஷுரனே,* நீ கொழுத்தபோது அவரையே எட்டி உதைத்தாய். நீ பெருத்துப்போனாய், தடித்துப்போனாய், ஊதிப்போனாய்.+ அதனால் உன்னைப் படைத்த கடவுளைவிட்டே விலகினாய்.+உன்னுடைய மீட்பின் கற்பாறையை அவமதித்தாய். ¹⁶  பொய் தெய்வங்களை வணங்கி அவருடைய எரிச்சலைக் கிளப்பினாய்.+அருவருப்பான காரியங்களைச் செய்து அவரைக் கோபப்படுத்தினாய்.+ ¹⁷  கடவுளுக்குப் பலி செலுத்தாமல், பேய்களுக்குப் பலி செலுத்தினாய்.+முன்பின் தெரியாத தெய்வங்களுக்கு,நேற்று முளைத்த தெய்வங்களுக்கு,உன் முன்னோர்களுக்குத் தெரியாத தெய்வங்களுக்குப் பலி செலுத்தினாய். ¹⁸  கற்பாறைபோல் இருக்கும் உன் கடவுளை மறந்துவிட்டாய்.+உனக்கு உயிர் கொடுத்தவரை நினைக்கத் தவறிவிட்டாய்.+ ¹⁹  யெகோவா அதைப் பார்த்தார்.தன்னுடைய மகன்களும் மகள்களும் தன்னைக் கோபப்படுத்தியதால் அவர்களை உதறித்தள்ளினார்.+ ²⁰  பின்பு அவர், ‘என் முகத்தை அவர்களிடமிருந்து மறைத்துக்கொள்வேன்.+அவர்களுக்கு நடக்கப்போவதைப் பார்ப்பேன். அவர்கள் நெறிகெட்ட தலைமுறை.+உண்மை இல்லாத வம்சம்.+ ²¹  ஒன்றுக்கும் உதவாத தெய்வத்தை* கும்பிட்டு என் கோபத்தைக் கிளறினார்கள்.+வீணான சிலைகளை வணங்கி என்னை நோகடித்தார்கள்.+ அதனால், ஒன்றுக்கும் உதவாத ஜனத்தைக்கொண்டு நானும் அவர்களுடைய கோபத்தைக் கிளறுவேன்.+முட்டாள்தனமான தேசத்தைக்கொண்டு நானும் அவர்களை நோகடிப்பேன்.+ ²²  என் கோபத் தீ பற்றியெரிகிறது.+அது கல்லறையின் அடிமட்டத்தையும் சுட்டெரிக்கும்.+பூமியையும் அதன் விளைச்சலையும் பொசுக்கும்.மலைகளின் அஸ்திவாரங்களையே கொழுந்துவிட்டு எரிய வைக்கும். ²³  நான் வேதனைக்குமேல் வேதனையைக் கொண்டுவருவேன்.அவர்கள்மேல் என் அம்புகளை எறிவேன். ²⁴  பசி அவர்களை வாட்டியெடுக்கும்.+கடுமையான காய்ச்சலும் பயங்கரமான அழிவும் அவர்களைத் தாக்கும்.+ கொடிய மிருகங்கள் அவர்களைப் பீறிப்போடும்.+நிலத்தில் ஊரும் விஷப் பிராணிகள் அவர்களைக் கடிக்கும். ²⁵  வாலிபர்களோ கன்னிப்பெண்களோ,குழந்தைகளோ கிழவர்களோ,+வெளியே இருக்கிற எல்லாரையும் வாள் வெட்டித்தள்ளும்!+உள்ளே இருக்கிற எல்லாரையும் திகில் கவ்விக்கொள்ளும்!+ ²⁶  நான் உங்களிடம், “உங்களைச் சிதறிப்போக வைத்துவிடுவேன்,உங்களைப் பற்றிய நினைவே உலகத்தில் இல்லாதபடி செய்துவிடுவேன்” என்று சொல்ல நினைத்தேன். ²⁷  ஆனால் எதிரிகள் உண்மையைப் புரட்டி,+ “எங்கள் வீரத்தால்தான் ஜெயித்தோம்,+யெகோவா எதுவும் செய்யவில்லை” என்று பெருமையடிப்பார்களோ என்று நினைத்தேன்.+ அதனால் அப்படிச் சொல்லாமல் விட்டுவிட்டேன். ²⁸  இஸ்ரவேலர்கள் அறிவில்லாத* ஜனங்கள், அவர்களுக்குப் புத்தியே* இல்லை.+ ²⁹  அப்படிப் புத்தி இருந்தால்+ இதை யோசித்துப் பார்ப்பார்களே.+ வரப்போகும் கதியை நினைத்துப் பார்ப்பார்களே.+ ³⁰  அவர்களுக்குக் கற்பாறைபோல் இருந்தவர் அவர்களைக் கைவிட்டுவிட்டார்.+யெகோவா அவர்களை எதிரிகளின் கையில் கொடுத்துவிட்டார். அதனால்தான் அவர்களில் ஆயிரம் பேரை ஒருவனால் விரட்ட முடிந்தது.அவர்களில் பத்தாயிரம் பேரை வெறும் இரண்டு பேரால் துரத்த முடிந்தது.+ ³¹  (அவர்களுடைய கடவுள்* நம்முடைய கடவுளுக்கு* ஈடாக முடியாது.+நம்முடைய எதிரிகளுக்கும் இது தெரியும்.+) ³²  அவர்களுடைய திராட்சைக் கொடி சோதோமின் திராட்சைக் கொடி,கொமோராவின் தோட்டங்களில் விளைந்த திராட்சைக் கொடி.+ அவர்களுடைய திராட்சைப் பழங்கள் விஷம் நிறைந்தவை.அவர்களுடைய திராட்சைக் குலைகள் கசப்பானவை.+ ³³  அவர்களுடைய திராட்சமது பாம்புகளின் விஷம்,அது நாகப்பாம்புகளின் கொடிய நஞ்சு. ³⁴  இதையெல்லாம் நான் முத்திரைபோட்டு மூடியிருக்கிறேன்.என் களஞ்சியத்தில் அடைத்து வைத்திருக்கிறேன்.+ ³⁵  பழிவாங்குவதும் பழிதீர்ப்பதும் என் பொறுப்பு.+குறித்த நேரத்தில் அவர்கள் தடுக்கி விழுவார்கள்.+அவர்களுடைய அழிவு நாள் நெருங்கிவிட்டது.அவர்களுக்கு நடக்க வேண்டியதெல்லாம் சீக்கிரத்தில் நடக்கும்’ என்று சொன்னார். ³⁶  யெகோவா தன்னுடைய ஜனங்களுக்குத் தீர்ப்பு கொடுப்பார்.+தன்னுடைய ஊழியர்களின் பலம் குறைந்துவிட்டதைப் பார்க்கும்போதும்,ஆதரவற்றவர்களும் அற்பமானவர்களும் மட்டுமே மீந்திருப்பதைப் பார்க்கும்போதும்,அவர் பரிதாபப்படுவார்.+ ³⁷  அப்போது அவர், ‘அவர்களுடைய தெய்வங்கள் எங்கே?+அவர்கள் அடைக்கலம் தேடிய கற்பாறை எங்கே? ³⁸  அவர்களுடைய பலிகளின் கொழுப்பைத் தின்ற தெய்வங்கள் எங்கே?அவர்கள் செலுத்திய திராட்சமதுவைக் குடித்த தெய்வங்கள் எங்கே?+ அவை வந்து அவர்களுக்கு* உதவி செய்யட்டும். அவை அவர்களுக்குப் பாதுகாப்பு தரட்டும். ³⁹  நான் மட்டும்தான் கடவுள் என்பதைப் புரிந்துகொள்ளுங்கள்.+என்னைத் தவிர வேறு கடவுள் இல்லை.+ உயிர் கொடுக்கிறவரும் உயிர் எடுக்கிறவரும் நானே.+ காயப்படுத்துகிறவரும்+ குணப்படுத்துகிறவரும் நானே.+என் கையிலிருந்து யாரையும் யாராலும் காப்பாற்ற முடியாது.+ ⁴⁰  என் கையை உயர்த்தி,*“என்றென்றும் வாழ்கிற என்மேல்” ஆணையாகச் சொல்கிறேன்,*+ ⁴¹  என்னுடைய பளபளப்பான வாளைத் தீட்டுவேன்.தீர்ப்பு கொடுப்பதற்குத் தயாராவேன்.+என் எதிரிகளைப் பழிவாங்குவேன்.+என்னை வெறுக்கிறவர்களைப் பழிதீர்ப்பேன். ⁴²  எதிரிகளுடைய தலைவர்களின் தலைகளைஎன் வாள் விழுங்கும்.வெட்டப்பட்டவர்களின் இரத்தத்தையும், சிறைபிடிக்கப்பட்டவர்களின் இரத்தத்தையும்என் அம்புகள் குடிக்கும்’ என்று சொல்வார். ⁴³  தேசங்களே, அவருடைய ஜனங்களோடு சேர்ந்து சந்தோஷப்படுங்கள்.+ஏனென்றால், அவருடைய ஊழியர்களின் இரத்தத்துக்காக அவர் பழிவாங்குவார்.+எதிரிகளுக்குப் பதிலடி தருவார்.+தன்னுடைய ஜனங்களின் தேசத்தைச் சுத்திகரிப்பார்.” ⁴⁴  மோசே இந்தப் பாடல் வரிகளை ஜனங்களுடைய காதில் விழும்படி சொன்னார்.+ நூனின் மகன் ஓசெயாவும்*+ அவரோடு இருந்தார். ⁴⁵  இஸ்ரவேலர்கள் எல்லாரிடமும் இந்த வார்த்தைகளைச் சொல்லி முடித்தபின், ⁴⁶  மோசே அவர்களிடம், “இன்று நான் கொடுக்கும் எச்சரிக்கையை இதயத்தில் பதிய வைத்துக்கொள்ளுங்கள்.+ இந்தத் திருச்சட்டத்தின்படி நடக்க வேண்டுமென்று உங்களுடைய மகன்களுக்குக் கட்டளை கொடுங்கள்.+ ⁴⁷  இவையெல்லாம் வெற்று வார்த்தைகள் அல்ல, வாழ்வு தரும் வார்த்தைகள்.+ இவற்றின்படி நடந்தால், நீங்கள் யோர்தானைக் கடந்துபோய் சொந்தமாக்கப்போகிற தேசத்தில் நீடூழி வாழ்வீர்கள்” என்று சொன்னார். ⁴⁸  அதே நாளில் யெகோவா மோசேயிடம், ⁴⁹  “மோவாப் தேசத்தில், எரிகோவைப் பார்த்தபடி இருக்கிற இந்த அபாரீம் மலைத்தொடரிலுள்ள+ நேபோ மலைக்கு+ நீ ஏறிப்போ. நான் இஸ்ரவேலர்களுக்குக் கொடுக்கப்போகிற கானான் தேசத்தை+ அங்கிருந்து பார். ⁵⁰  ஓர் என்ற மலையில் உன் அண்ணன் ஆரோன் இறந்தது போல,+ நேபோ மலையில் நீயும் இறந்துபோவாய்.* ⁵¹  ஏனென்றால், சீன் வனாந்தரத்திலுள்ள காதேசில் இருக்கிற மேரிபாவின் தண்ணீர் விஷயத்தில், நீங்கள் இரண்டு பேரும் இஸ்ரவேலர்களின் முன்னால் எனக்கு உண்மையாக நடக்கவில்லை,+ என்னை மகிமைப்படுத்தவில்லை.+ ⁵²  இஸ்ரவேல் ஜனங்களுக்கு நான் தருகிற தேசத்தை நீ தூரத்திலிருந்துதான் பார்ப்பாய், அதற்குள் நீ போக மாட்டாய்”+ என்று சொன்னார்.