Mawu něngatorẹ̌ hiteng i Abraham nakoạ sěmbaụ bangsa kụ něgělị hukung si sire. I Sie nẹ̌sěbạ i sire bangsa ”Israel” kụ něpakẹ si sire gunang měkoạ ibadah tutune dingangu tumol᷊e hengetang’E. (Mazmur 147:19, 20) Hakị u ene, bọu bangsa Israel kěbị taumata makaěbạ al᷊amatẹ̌.​—Basa Kejadian 22:18.

Mawu němile tau Israel gunang makoạ sahidi-Ne. Apa nariadi su tau Israel něnodẹ piạ al᷊amate mạeng tumuhụ hukungu Mawu. (Ulangan 4:6) Bọu bangsa Israel lai, bangsa wal᷊inẹ sarung makasingkạ i sai Mawu tutune.​—Basa Yesaya 43:10, 12.

Ual᷊ingu samurine tau Israel tawe satia su Mawu, i sire nighanti dingangu sidang Kristen. (Matius 21:43; 23:37, 38) Orasẹ̌ ini tau Kristen tutune něngganti tau Israel, kụ nakoạ sahidi gunang Yehuwa.​—Basa Kisah 15:14, 17.

Yesus něngatorẹ̌ manga murite gunang měnginjilẹ̌ dingangu měkoạ muritẹ̌ su patikụ dunia. (Matius 10:7, 11; 24:14; 28:19, 20) Hal᷊ẹ̌ měnginjilẹ̌ kasauange kẹ̌koateng orasẹ̌ ini, su ěllo pěngěngsuěnge. Kahumotongange su kanandụu sejarah, Yehuwa napakasěmbaụ jutane taumata bọu patikụ bangsa su ibadah tutune. (Wahyu 7:9, 10) Tau Kristen tutune niatorẹ̌ gunang mẹ̌tatul᷊ung dingangu mẹ̌tatoghasẹ̌ sěmbaụ su wal᷊inẹ. Su patikụ dunia, kěbị apa niěndungang i sire su pěngangibadang mẹ̌sul᷊ung.​—Basa Ibrani 10:24, 25.

Něnětạ taung 1870, pirang katau siswa-siswa Alkitab něnětạ nakaěbạ katěngadu Alkitapẹ̌ kụ bědang tawe nikasingkateng sarang tempo ene. I sire nakasingkạ i Yesus něngatorẹ̌ sidang Kristen gunang měnginjilẹ̌, kụ i sire něnětạ někoạ kampanye měhabarẹ̌ Injilu Kararatuang su patikụ dunia. Su taung 1931, i sire něpakẹ areng Sahiding Yehuwa.​—Basa Kisah 1:8; 2:1, 4; 5:42.

Su abad humotong, manga sidang Kristen su lawọ negeri nakaěbạ laahạ bọu badan pimpinan kụ mangimang Yesus kai Těmbonangu sidang jemaatẹ̌. (Kisah 16:4, 5) Orasẹ̌ ini lai mẹ̌sul᷊ung, Badan Pimpinan měngẹ̌ngahạ Sahiding Yehuwa su patikụ dunia. I sire ini kai manga penatua piạ lawọ pengalaman. I sire lai měngẹ̌ngatorẹ̌ kantor-kantor cabang Sahiding Yehuwa gunang hal᷊ẹ̌ menerjemah, mencetakẹ̌, dingangu měndingọ bukẹ̌ gunang pěngangěndungang Alkitapẹ̌, nal᷊iu bọu 800 bawera. Hakị u ene, Badan Pimpinan nakasadia pělahiborẹ̌ dingangu laahạ bọu Alkitapẹ̌ gunang nal᷊iu bọu 100.000 sidang su patikụ dunia. Su kěbị sidang, piạ manga esẹ nakoạ penatua arau měnanahimata. I sire makěndagẹ̌ měngurusẹ̌ kěbị dombang Mawu.​—Basa 1 Petrus 5:2, 3.

Sahiding Yehuwa niatorẹ̌ gunang měnginjilẹ̌ dingangu měkoạ muritẹ̌. Kere manga rasulẹ̌, i kami lai měngẹ̌nginjilẹ̌ bọu wal᷊e sarang bal᷊e. (Kisah 20:20) I kami mapulu mẹ̌tul᷊ung si sire apang mapulu měngěndung Alkitapẹ̌. Katewe Sahiding Yehuwa bal᷊inẹ kětạeng sěmbaụ organisasi. I kami kai keluarga, kụ měpẹ̌pandung sěmbaụ su wal᷊inẹ dingangu piạ i Amang matal᷊ěntụ. (2 Tesalonika 1:3) Ual᷊ingu ělang i Yehuwa niatorẹ̌ gunang makal᷊uasẹ̌ naungu Mawu dingangu mẹ̌tul᷊ung taumata walinẹ, i sire kai keluarga sěbạe maral᷊uasẹ̌ su dunia ini.​—Basa Mazmur 33:12; Kisah 20:35.