Yehuwa něgělị dunia ini su taumata. Ini tampạ pẹ̌tatanakeng i kitẹ. I Adam dingangi Hawa tawe nikoa gunang mẹ̌tanạ su sorga. Mawu seng někoạ manga malaekatẹ̌ gunang mẹ̌tanạ su sorga. (Ayub 38:4, 7) Mawu němělọ si Adam dingangi Hawa su firdaus masadadạ isẹ̌sěbạ Taman Eden. (Kejadian 2:15-17) Yehuwa mapulu i Adam, kawinge, dingangu manga hitene měbiahẹ̌ sarang karěngụe su dunia.​—Basa Mazmur 37:29; 115:16.

Humotong, kětạeng su Taman Eden situasine kere firdaus. I Adam dingangi Hawa sarung makaěbạ anạ kụ měmenẹ dunia ini. Bọu ene, i sire harusẹ̌ měngurusẹ̌ dunia ini tadeạu patikụ dunia makoạ firdaus. (Kejadian 1:28) Dunia ini tawe ipakawinasa. Ini sarung makoạ tampạ pẹ̌tatanakengu taumata sarang karěngụe.​—Basa Mazmur 104:5.

Pẹ̌biala video Kawe Nụe Mawu Někoạ Dunia Ini?

I Adam dingangi Hawa tawe timuhụ su Mawu, hakị u ene Yehuwa něnokol᷊ẹ̌ si rẹ̌dua bọu taman ene. Firdaus nailang, kụ tawẹ apa taumata saụ makakoạ firdaus. Alkitapẹ̌ naul᷊ị dongkeng tempo ene, dunia ini seng su al᷊ungu kawasang taumata dal᷊akị.​—Ayub 9:24.​—Basa Kejadian 3:23, 24

Apa kapulung Yehuwa kahumotongange gunang taumata seng tawe mariadi? Yehuwa kai makawasa, hakị u ene kapulu-Ne mang mariadi. (Yesaya 45:18) I Sie saụ měkoạ taumata mẹ̌tanạ su dunia ini kere kapulu-Ne humotong.​—Basa Mazmur 37:11, 34.

Firdaus saụ mariadi su dunia su tempong Yesus makoạ Datu nipileng Mawu. Su sekẹ Armagedon, Yesus dingangu manga malaekatu Mawu sarung měminasa kěbị apang lụlawang Mawu. Bọu ene, Yesus sarung měngurung Setang karěngụe  1.000 su taunge. Manga ělangu Mawu sarung masal᷊amatẹ̌ bọu kawawinasa ene ualingu Yesus sarung měngahạ dingangu měndiagạ si sire. I sire sarung měbiahẹ̌ sarang karěngụe su Firdaus su dunia.​—Basa Wahyu 20:1-3; 21:3, 4.

Kange Mawu sarung mapakailang karal᷊akisẹ̌ bọu dunia ini? Yesus něgělị ”tatiala” něnodẹ tempone seng marani. Barang dal᷊akị turusẹ̌ mạdiadi orasẹ̌ ini sarung makawinasa taumata, kụ ini něnodẹ i kitẹ měbẹ̌biahẹ̌ su ”pěngěngsuengu dunia”.​—Basa Matius 24:3, 7-14, 21, 22.

Su tempong Yesus mẹ̌parenta dunia bọu sorga karěngụe 1.000 su taunge, i sie sarung mapakailang kěbị kasasusah. (Yesaya 9:6, 7; 11:9) Yesus bal᷊inẹ kětạeng makoạ Datu, katewe lai makoạ Imang Mawantugẹ̌ kụ sarung měngěmụ dosang taumata apang makěndagẹ̌ su Mawu. Lumiung Yesus, Mawu sarung měnodẹ kawasa-Ne, kụ su tempo mahi seng tawẹ apa taumata masakị, maghurang, dingangu mate.​—Basa Yesaya 25:8; 33:24.

Taumata matuhụ su Mawu sarung měbiahẹ̌ su Firdaus. (1 Yohanes 2:17) Yesus něngoro manga murite pědeạ taumata apang naunge masanạ, kụ pěněntiro i sire kerea tadeạu makal᷊uasẹ̌ naungu Mawu. Orasẹ̌ ini, Yehuwa měnẹ̌něntiro jutane taumata tadeạu sadia měbiahẹ̌ su Firdaus su dunia. (Zefanya 2:3) Su Banalang Kararatuang Sahiding Yehuwa, taumata botonge měngěndung kerea tadeạu makoạ kawing dingangu matimadẹ̌ limembong mapia. Matimadẹ̌ dingangu manga rariọ měngibadah sěngkasio lai měngěndung kerea habarẹ̌ mapia makakoạ pěbawiahi sire limembong mal᷊uasẹ̌.​—Basa Mikha 4:1-4.