Su tempong mata-mata Israel nakoạ sarang soa Yerikho, i sire nahumpạ su wal᷊eng sěngkatau wawine arenge Rahab. Datung Yerikho nakasingkạ hal᷊ẹ̌ ene kụ něndolohẹ̌ prajurite sarang bal᷊eng i Rahab. I Rahab němuni darua mata-mata ene su wowong bal᷊e kụ něngoro su manga prajuritẹ̌ ene pědeạ su tampạ bal᷊inẹ. Rahab naul᷊ị su mata-mata ene, ’Iạ mẹ̌tul᷊ung si rua ual᷊ingu iạ masingkạ Yehuwa mẹ̌tul᷊ung si kamene kụ i kamene sarung makakala negeri ini. Pẹ̌diandịe i kamene sarung měnal᷊amatẹ̌ keluargaku.’

Mata-mata ene naul᷊ị si Rahab, ’I kami mẹ̌diandi, kěbị taumata su wal᷊enu sarung masal᷊amatẹ̌. Ikịko tal᷊i mahamụ su janelanu, kụ kěluarganu sarung masal᷊amatẹ̌.’

Rahab něngoro mata-mata ene lintụ bọu janela dingangu tal᷊i. I sire nakoạ sarang bul᷊udẹ̌ kụ nẹ̌kěmbuni tělu ěllo. Samurine, i sire nẹ̌bal᷊ị sarang anung i Yosua. Bọu ene, tau Israel limiu Sal᷊ụ u Yordan kụ nẹ̌sasadia gunang měngalạ negeri ene. Soa humotong nakala ute soa Yerikho. Yehuwa něngoro si sire pělikụ soa ene sěnsul᷊ẹ sahěllo  karěngụe ěnungu ěllo. Su ěllo kapitune, i sire nělikụ soa ene pitung sul᷊ẹ. Bọu ene manga imang něniụ terompet, kụ manga prajuritu Israel němansagẹ̌ maihạ. Hakị u ene, těndạ u soa ene nahaka! Katewe, wal᷊eng i Rahab su wowong těndạ tatapẹ̌ dụdarisị. Rahab dingangu kěluargane nasal᷊amatẹ̌ ual᷊ingu i sire mangimang si Yehuwa.