Alberto alitumika katika jeshi kwa miaka karibu kumi. Anakumbuka hivi: “Kiongozi wetu wa kidini anayebariki wanajeshi wakati wa vita, alituambia, ‘Mungu yuko pamoja na nyinyi.’ Lakini nilijiuliza, ‘Ninaenda kuua watu, hata hivyo Biblia inasema kwamba “usiue.”’”

Ray alikuwa katika jeshi lililopigana likiwa katika maji wakati wa Vita ya Pili ya Ulimwengu. Siku moja, alimuuliza hivi kiongozi wa dini yake anayebariki wanajeshi: “Unakuja katika mashua na unasali kwa ajili ya wanajeshi na kwa ajili ya ushindi. Je, maadui wetu hawafanye vivyo hivyo?” Kiongozi huyo akajibia kwamba Bwana anafanya kazi kwa njia ambazo hazieleweke.

Ikiwa hautosheke na jibu hilo, jua kwamba hauko peke yako.

Yesu alisema kwamba moja kati ya amri za Mungu zilizo kubwa zaidi ni ‘kumupenda jirani yako kama wewe mwenyewe.’ (Marko 12:31) Je, alisema tumupende jirani yetu kwa kutegemea mahali ambapo anaishi ao kwa kutegemea taifa lake? Hapana. Aliwaambia wanafunzi wake hivi: ‘Kwa jambo hili wote watajua kwamba ninyi ni wanafunzi wangu, mukiwa na upendo kati yenu wenyewe.’ (Yohana 13:34, 35) Upendo wao kwa mumoja na mwengine ungeshangaza watu hivi kwamba ungekuwa alama ya kuwatambulisha kuwa Wakristo wa kweli. Kuliko kuwaua ndugu zao, wangetoa uzima wao kwa ajili yao.

Wakristo wa kwanza waliishi kupatana na maneno hayo ya Yesu. Kitabu kimoja (The Encyclopedia of Religion) kinasema hivi: “Mababa wa kanisa la kwanza, kutia ndani Tertullien na Origène, walionyesha kwamba Wakristo walikataa kuua watu wengine, kanuni hiyo iliwazuia kuingia katika jeshi la Waroma.”

Kwa sababu Mashahidi wa Yehova wanapatikana katika karibu kila inchi, wamoja kati yao wanajikuta wakiwa wenye kuishi pande zote mbili za mataifa yanayopigana. Hata hivyo, wanajikaza sana kuendelea kuonyesha upendo ambao ni alama inayowatambulisha kuwa Wakristo wa kweli.

Kwa mufano, katika mwaka wa 1994 wakati wa vita ya kikabila kati ya Wahutu na Watutsi huko Rwanda, Mashahidi wa Yehova hawakuunga mukono upande wowote wa wale waliokuwa wakipigana. Mashahidi wa kabila moja waliwaficha Mashahidi wa kabila lingine, na mara nyingi wale ambao waliwaficha wenzao walihatarisha uzima wao. Mashahidi wawili Wahutu walikamatwa kwa sababu waliwaficha ndugu zao Watutsi. Wapiganaji Wahutu wa Interahamwe ambao waliwakamata ndugu hao wawili waliwaambia hivi: “Munapaswa kufa kwa sababu muliwasaidia Watutsi kuponyoka.” Jambo la kusikitisha ni kwamba, Mashahidi wawili hao Wahutu waliuawa.​—Yohana 15:13.

Unawaza nini: Je, namna Mashahidi wa Yehova wanavyotenda inapatana na maneno ya Yesu kuhusu upendo wa kujitoa kwa ajili ya wengine?