Umukaribie Musikiaji wa Sala

WATU wengi wanasema kama wanamuamini Mungu, lakini hawawezi kueleza sababu gani wanamuamini. Tena, hawawezi kueleza sababu gani mara nyingi dini inawachochea watu wafanye mambo mabaya ao sababu gani Mungu anawaacha watu wateseke. Hata hivyo, wanaendelea kusali kwa Mungu ambaye hawamujue.

Lakini, wewe unaweza kumujua Mungu na kumukaribia. Kumujua Mungu kabisa kunaweza kukusaidia umuamini, umupende na umuheshimu. Imani ya kweli inategemea mambo yaliyo hakika. (Waebrania 11:1) Ikiwa unajifunza kweli juu ya Mungu, unaweza kumujua na kuzungumuza naye kama rafiki. Ona mifano ya watu fulani ambao walikuwa wakisali hata ikiwa hawakuwa wanaamini kama Mungu iko.

◼ Patricia, aliyetajwa katika habari ya kwanza anasema hivi: “Siku fulani, katika kikundi cha marafiki karibu kumi, tulianza kubishana juu ya dini. Niliwaambia kama wakati baba yangu, ambaye haamini kama Mungu iko, alikuwa akizungumuza na Shahidi wa Yehova mumoja aliyefika kwetu, niliondoka ili kuepuka mazungumuzo yao. Mumoja kati ya marafiki wangu akasema hivi: ‘Inawezekana Mashahidi wa Yehova ndio wanaosema kweli.’

Rafiki yangu mwengine akasema hivi: “Sababu gani tusiende kwenye mikutano yao ili tujionee? Na tukaanza kuenda kwenye mikutano yao. Ijapokuwa tulikuwa bado na mashaka kuhusu mambo waliyokuwa wanafundisha, tuliendelea kufika kwenye mikutano yao kwa sababu walikuwa wenye urafiki.”

“Lakini, Siku ya Yenga moja nilisikia fundisho fulani lililobadilisha mawazo yangu. Yule aliyefundisha alieleza sababu gani watu wanateseka. Zamani, sikujua kama mutu aliumbwa mukamilifu na kama zambi na kifo vilianzishwa na mutu mumoja na kupitia mutu huyo wanadamu wote walipatwa na zambi na kifo. Tena alieleza sababu gani kifo cha Yesu kilikuwa cha lazima ili kurudishia wanadamu mambo ambayo mutu wa kwanza alipoteza. * (Waroma 5:12, 18, 19) Nilielewa mambo yote palepale. Niliona kama ‘kwa kweli kuna Mungu anayetuhangaikia.’ Niliendelea kujifunza Biblia, na bila kukawia, nikaelewa kwa mara ya kwanza katika maisha yangu kama ninaweza kusali kwa mutu fulani ambaye anaishi kweli.”

◼ Allan, aliyetajwa pia katika habari ya kwanza anasema hivi: “Siku moja Mashahidi wa Yehova walifika nyumbani, bibi yangu aliwakaribisha kwa sababu alipendezwa sana na mambo  wanayofundisha juu ya uzima wa milele duniani. Nilikasirika sana. Kwa hiyo, niliwaacha katika salon, na kumukokotea bibi yangu katika chumba cha kupigia chakula na nikamuambia, ‘Usiwe mujinga. Hauwezi kuamini mambo kama hayo!’

Akanijibu, “‘sawa, uende basi katika salon uwaonyeshe kama mambo wanayofundisha ni ya uongo.’

“Kwa kweli, sikuwaonyesha jambo lolote. Lakini walikuwa wapole sana na wakaniachia kitabu kinachoeleza ikiwa uzima uliumbwa ao ulitokea tu. Mafundisho ya kitabu hicho yalikuwa wazi na yenye kutegemeka, kwa hiyo, niliamua kujifunza mengi zaidi juu ya Mungu. Nilianza kujifunza Biblia na Mashahidi wa Yehova, na bila kukawia nikaelewa kama mambo ambayo Biblia inasema ni tofauti kabisa na mawazo niliyokuwa nayo zamani juu ya dini. Nilipoendelea kujifunza juu ya Yehova, nilianza sasa kutaja mambo waziwazi katika sala zangu. Nilikuwa na tabia fulani mbaya, kwa hiyo, nilisali Mungu ili anisaidie kuacha tabia hizo. Niko hakika kama Yehova alijibu sala zangu.”

◼ Andrew, anayeishi huko Angleterre anasema hivi: “Hata ikiwa nilikuwa mutu wa ubishi na  nilipendezwa sana na sayansi, niliamini fundisho la kusema kama vitu vilijitokeza vyenyewe kwa sababu tu watu wengine walisema kama mambo yalikuwa hivyo. Nilikataa kumuamini Mungu kwa sababu ya mambo yote mabaya yanayotokea.

“Lakini, wakati fulani niliwaza hivi: ‘Ikiwa Mungu iko huko mbinguni, ninataka kujua sababu ya mambo yote yanayotokea. Sababu gani kuna matendo mengi mabaya na vita?’ Nilipokuwa na magumu, nilisali wakati fulani ili kupata musaada, lakini sikujua kama nilikuwa nikisali kwa nani.

“Kisha mutu fulani akamupatia bibi yangu trakti iliyochapishwa na Mashahidi wa Yehova yenye kichwa Je, Ulimwengu huu Utaokoka? Mara nyingi, hilo ndilo ulizo nililokuwa nikijiuliza. Trakti hiyo ilinisukuma nijiulize ikiwa majibu ya Biblia yanatumainika. Baadaye, nilipokuwa katika mapumuziko, mutu fulani alinipatia kitabu Biblia—Neno la Mungu au la Binadamu? * Nilipoona kama Biblia inapatana na mambo ya kweli ya sayansi, niliona kama nilihitaji kujifunza mengi zaidi juu ya Biblia. Kwa hiyo, Shahidi wa Yehova mumoja aliposema kama anapenda kunifundisha Biblia, nilikubali. Nilipoelewa kusudi la Yehova, nilimuona kuwa mutu wa kweli, mutu ambaye ninaweza kuzungumuza naye katika sala.”

◼ Jan, aliyezaliwa katika familia ya Waprotestanti huko Londres anasema hivi: “Unafiki wa dini na uwingi wa mateso vilinifanya niachane na dini. Niliacha pia masomo na kuanza kuimba na kucheza guitare ili kupata feza. Huo ndio wakati nilikutana na Pat. Alizaliwa katika familia ya Wakatoliki lakini yeye pia aliachana na dini.

“Tuliishi katika nyumba fulani ambayo haikukaliwa na watu pamoja na vijana wengine walioacha pia masomo na waliopendezwa na dini za Asia. Usiku fulani, tulikuwa tukibishana kwa muda wa saa nyingi juu ya kusudi la maisha. Hata ikiwa mimi na Pat hatukuamini kama Mungu iko, tulijua kama kunapaswa kuwa ‘nguvu fulani ambayo iliumba vitu.’

“Kisha tukahamia kaskazini mwa Angleterre ili kutafuta kazi ya wanamuziki, na mutoto wetu wa kwanza alizaliwa huko. Usiku fulani mutoto alipogonjwa, nilijikuta nikisali Mungu ambaye sikuwa ninaamini. Muda mufupi kisha hapo, sikuelewana tena na Pat, kwa hiyo, nilikamata mutoto na kuondoka. Nilisali tena ili kupata musaada, nikitumaini kama kuna mutu aliyenisikiliza. Wakati huo, Pat alikuwa akisali pia, lakini sikujua hivyo.

“Siku hiyohiyo mangaribi, Mashahidi wa Yehova wawili walimutembelea Pat na wakamuonyesha mashauri fulani ya Biblia yenye kusaidia. Pat aliniita ili kuniuliza ikiwa nitafurahi tujifunze Biblia na Mashahidi wa Yehova. Kisha tukajifunza kama ili kumupendeza Mungu, tulipaswa kuandikisha ndoa yetu. Ilikuwa vigumu sana kwetu kufanya hivyo kwa sababu ya magumu tuliyokuwa nayo katika ndoa yetu.

“Tulitaka kujua mengi zaidi juu ya namna unabii mbalimbali wa Biblia ulivyotimia, sababu gani tunateseka, na maana ya Ufalme wa Mungu. Hatua kwa hatua, tulielewa kama Mungu anatuhangaikia, na tulitaka kufanya mambo anayotuomba. Kisha tukaandikisha ndoa yetu. Hekima ya Neno la Mungu ilitusaidia kulea watoto wetu watatu. Tuko hakika kama Mungu alisikiliza sala zetu.”

Chunguza Wewe Mwenyewe Mambo Yanayosadikisha Kama Mungu Iko

Kama watu wengine wengi, watu wanaozungumuziwa katika habari hii walivunjwa moyo na dini ya uongo na kisha wakaelewa sababu gani Mungu anaacha watu wateseke. Umeona kama ni kuelewa vizuri Biblia ndiko kulimusaidia kila mutu kati ya watu hao asadiki kama kwa kweli Yehova anasikiliza sala zetu.

Je, ungependa kuchunguza wewe mwenyewe mambo yanayosadikisha kama Mungu iko? Mashahidi wa Yehova watafurahi sana kukusaidia ujifunze ukweli juu ya Yehova na namna gani unaweza kumukaribia ‘Musikiaji wa sala.’​—Zaburi 65:2.

[Maelezo ya chini]

[Wazo la fungu kwenye ukurasa 10]

“Nilipoelewa kusudi la Yehova, nilimuona kuwa mutu wa kweli, mutu ambaye ninaweza kuzungumuza naye katika sala”

[Picha katika ukurasa wa 9]

Imani ya kweli inategemea mambo yaliyo hakika na tamaa ya kujua kweli juu ya Mungu