1. Ni habari gani ambayo mutume Paulo alipata juu ya ndugu wa Korintho ambayo ilimufurahisha?

 TUKO katika mwaka wa 55. Mutume Paulo anapatikana katika muji wa Troa, muji wenye bandari, lakini anaendelea kukumbuka ndugu zake wa huko Korintho. Mapema kidogo katika mwaka huo, alihuzunika sana kusikia kama ndugu na dada wa kutaniko hilo hawasikilizane. Paulo aliwapenda kama baba anavyowapenda watoto wake, kwa hiyo aliwaandikia ili kuwaomba waachane na jambo hilo. (1 Kor. 1:11; 4:15) Alimutuma pia Tito, mufanyakazi mwenzake aende huko, na kisha amuletee habari hapo Troa. Sasa mutume Paulo anamungojea Tito katika muji wa Troa, ana hamu ya kujua hali ya ndugu wa Korintho. Lakini Tito hafike, na hilo linamuvunja mutume Paulo moyo. Paulo atafanya nini? Anachukua mashua na kuenda Makedonia, yeye anafurahi kukutana na Tito huko. Tito anamuelezea kama ndugu na dada wa Korintho walifurahia mashauri ya barua yake na walitamani sana kumuona. Mutume Paulo ‘anafurahi sana’ anaposikia habari hiyo nzuri.​—2 Kor. 2:12, 13; 7:5-9.

2. (a) Paulo aliwaandikia Wakorintho nini kuhusu imani na furaha? (b) Tutazungumuzia maulizo gani?

² Muda mufupi baadaye, Paulo aliwaandikia Wakorintho barua ya pili. Aliwaandikia hivi: ‘Si kwamba sisi ndio mabwana juu ya imani yenu, bali sisi ni wafanyakazi wenzi kwa furaha yenu, kwa maana ni kwa imani yenu kwamba ninyi munasimama.’ (2 Kor. 1:24) Mutume Paulo alimaanisha nini kwa kusema hivyo? Na wazee wa makutaniko leo wanaweza kujifunza nini kutokana na maneno hayo?

3. (a) Paulo alimaanisha nini alipoandika hivi: ‘Ni kwa imani yenu ninyi munasimama’? (b) Namna gani wazee wa makutaniko wanafuata mufano wa Paulo leo?

³ Paulo alitaja mambo mawili ya lazima yanayohusu ibada yetu, ni kusema, imani na furaha. Kuhusu imani  aliandika hivi: ‘Si kwamba sisi ndio mabwana juu ya imani yenu, kwa maana ni kwa imani yenu kwamba ninyi munasimama.’ Maneno hayo yanaonyesha kama mutume Paulo alijua kwamba ndugu zake wa Korintho walisimama imara si kwa sababu yake ao kwa sababu ya mwanadamu fulani, lakini kwa sababu ya imani yao katika Mungu. Kwa hiyo, Paulo hakupaswa kuchunguza-chunguza imani ya ndugu zake kama polisi, na hakutaka kufanya hivyo. Alikuwa hakika kwamba ndugu hao wanamupenda Mungu na walitaka kufanya yaliyo sawa. (2 Kor. 2:3) Leo, wazee wanafuata mufano huo kwa kuwatumainia ndugu zao na kutokutilia shaka nia yao ya kumutumikia Mungu. (2 Thes. 3:4) Kwa hiyo, hawawekee ndugu wa kutaniko sheria nyingi ngumu, lakini wanategemea kanuni za Maandiko na muongozo wa tengenezo la Yehova. Leo wazee hawajifanye kuwa mabwana juu ya imani ya ndugu na dada zao.​—1 Pet. 5:2, 3.

4. (a) Paulo alimaanisha nini alipoandika: ‘Sisi ni wafanyakazi wenzenu kwa shangwe yenu’? (b) Namna gani wazee wa makutaniko wanamuiga mutume Paulo leo?

⁴ Mutume Paulo aliongezea hivi: ‘Sisi ni wafanyakazi wenzenu kwa shangwe (ao furaha) yenu.’ Kwa maneno hayo, Paulo alimaanisha kwamba yeye si bwana-mukubwa wa ndugu zake, lakini wote ni wafanyakazi pamoja. Sababu gani tunasema hivyo? Katika barua hiyo, mutume Paulo aliwakumbusha Wakorintho kuhusu wawili kati ya wafanyakazi hao alipoandika hivi: “Yesu . . . aliyehubiriwa katikati yenu kupitia sisi, yaani, kupitia mimi na Silvano na Timotheo.” (2 Kor. 1:19) Zaidi ya hayo, kila mara alipotumia maneno “wafanyakazi wenzi” katika barua zake, Paulo alimaanisha wafanyakazi wenzake wa karibu, kama vile Apolo, Akila, Priska, Timotheo, Tito, na wengine. (Rom. 16:3, 21; 1 Kor. 3:6-9; 2 Kor. 8:23) Kwa hiyo, kwa kusema “Sisi ni wafanyakazi kwa shangwe yenu” Paulo aliwahakikishia Wakorintho kwamba yeye na wafanyakazi wenzake walitaka kufanya yote wanayoweza ili kusaidia washiriki wa kutaniko wamutumikie Mungu kwa furaha. Leo, wazee Wakristo wanataka kufanya hivyo pia. Wanataka kufanya yote wanayoweza ili kusaidia ndugu na dada zao ‘wamutumikie Yehova kwa furaha.’​—Zab. 100:2; Flp. 1:25.

5. Tutazungumuzia majibu ya ulizo gani, na sisi wote tunapaswa kufikiria nini?

⁵ Hivi karibuni, ndugu na dada fulani wenye bidii na wanaoishi sehemu mbalimbali za dunia waliulizwa ulizo hili: “Ni maneno gani na matendo gani ya muzee fulani yaliyokuongezea furaha?” Tunapozungumuzia majibu yao, jiulize kama wewe pia ungejibu namna gani. Zaidi ya hayo, acheni sisi wote tufikirie jambo ambalo tunaweza kufanya ili furaha iongezeke katika kutaniko letu. *

6, 7. (a) Namna gani wazee wanaweza kuiga Yesu, mutume Paulo, na watumishi wengine wa Mungu? (b) Sababu gani ndugu na dada wanafurahi sana tunapowaita kwa majina yao?

⁶ Ndugu na dada zetu wengi wanasema kwamba wanafurahi sana wakati wazee walionyesha kwamba wanawahangaikia. Wazee wanaweza kufanya hivyo kwa kuiga mufano wa Daudi, Elihu, na Yesu mwenyewe. (Soma 2 Samweli 9:6; Ayubu 33:1; Luka 19:5.) Kila mumoja kati ya watumishi hao wa Yehova alionyesha kwamba anahangaikia mutu mwengine kwa kumuita kwa jina lake. Mutume Paulo pia alijua kwamba lilikuwa jambo la maana sana kukumbuka na kuwaita ndugu kwa majina yao. Alimalizia barua yake moja kwa kuwasalimu ndugu na dada zaidi ya 25, kila mutu kwa jina lake, kutia ndani Persisi, dada Mukristo ambaye Paulo alisema hivi juu yake: ‘Musalimu  Persisi mupendwa wetu.’​—Rom. 16:3-15.

⁷ Wazee fulani wanasahau kwa urahisi majina ya washiriki wa kutaniko. Lakini, muzee anapojikaza kukumbuka majina ya ndugu na dada katika kutaniko, ni kama vile anawaambia hivi, ‘Ninyi ni watu wa lazima kwangu.’ (Kut. 33:17) Ndugu na dada wanafurahi sana wakati wazee wanawaita kwa majina yao wakati wanatoa majibu kwenye funzo la Munara wa Mulinzi na kwenye mikutano mingine.​—Linganisha na Yohana 10:3.

8. Namna gani mutume Paulo aliiga Yehova na Yesu?

⁸ Mutume Paulo alionyesha kwamba anawahangaikia wengine kwa kuwapongeza kutoka moyoni; kufanya hivyo ni njia nyingine ya kuongezea waamini wenzetu furaha. Kwa hiyo, katika barua ambamo alisema kwamba alitamani kusaidia ndugu na dada zake wamutumikie Mungu kwa furaha, Paulo aliandika hivi: “Ninajisifu kwa njia kubwa kuhusiana nanyi.” (2 Kor. 7:4) Bila shaka, maneno hayo yalitia moyo ndugu na dada wa Korintho. Mutume Paulo alitumia maneno kama hayo alipoandikia makutaniko mengine. (Rom. 1:8; Flp. 1:3-5; 1 Thes. 1:8) Kwa mufano, kisha kutaja Persisi katika barua yake kwa kutaniko la Roma, Paulo aliongeza hivi: “Alifanya kazi nyingi katika Bwana.” (Rom. 16:12) Bila shaka, dada huyo mwaminifu alitiwa kabisa moyo na pongezi hilo! Paulo alipowapongeza wengine, alikuwa anamuiga Yehova na Yesu.​—Soma Marko 1:9-11; Yohana 1:47; Ufu. 2:2, 13, 19.

9. Namna gani furaha inaongezeka katika kutaniko wakati ndugu na dada wanapongezwa?

⁹ Leo, wazee wanajua kwamba ni jambo la maana kuwaambia ndugu na dada zao kwamba wanafurahia mambo wanayofanya. (Met. 3:27; 15:23) Kila mara muzee anapofanya hivyo, ni kama vile anawaambia ndugu na dada zake hivi: ‘Niliona mambo uliyofanya. Ninakuhangaikia.’ Na ndugu na dada wana lazima ya kusikia maneno hayo yenye kutia moyo kutoka katika kinywa cha muzee. Dada mumoja mwenye miaka zaidi ya 50 alisema hivi: “Nilipongezwa mara chache kazini. Watu hawahangaikie mambo ambayo wengine wanafanya na wanataka tu kushindana na wengine. Kwa hiyo, wakati muzee ananipongeza kwa sababu ya jambo ambalo nimefanya katika kutaniko, hilo linanituliza sana na kunipa nguvu nyingi! Muzee anaponipongeza, ninajisikia kuwa Baba yangu wa mbinguni ananipenda.” Ndugu mumoja anayechunga watoto wake wawili peke yake, alijisikia hivyo pia. Hivi karibuni, muzee mumoja alimupongeza. Ndugu yetu huyo alijisikia namna gani? Yeye anasema hivi: “Maneno ya muzee huyo yalinipa nguvu ya kufanya mengi zaidi katika kazi ya Mungu!” Hakika, muzee akimupongeza ndugu ao dada, jambo hilo linawatia moyo na linaongeza furaha yao. Na hilo linawasaidia waendelee kutembea katika barabara inayoongoza kwenye uzima bila ‘kuchoka.’​—Isa. 40:31.

10, 11. (a) Namna gani wazee wanaweza kufuata mufano wa Nehemia? (b) Muzee anapaswa kufanya nini mbele ya kufanya ziara ya uchungaji?

¹⁰ Ni katika njia gani hasa wazee wanaonyesha kama wanawahangaikia ndugu na dada zao na kwa kufanya hivyo wanaongeza furaha katika kutaniko? Wanafanya hivyo kwa kuwatafuta wale wanaohitaji kutiwa moyo. (Soma Matendo 20:28.) Wanapofanya hivyo, wazee wanaiga wachungaji wa zamani. Kwa mufano, fikiria jambo ambalo mwangalizi mwaminifu Nehemia alifanya wakati alipotambua kama ndugu zake fulani Wayahudi walianza kuwa wazaifu kiroho. Biblia inaonyesha kama alisimama mara moja na kuwatia moyo. (Neh. 4:14) Leo, wazee  wanataka kufanya hivyo pia. ‘Wanasimama,’ ni kusema, wanachukua mipango ili kuwatia moyo waamini wenzao wabaki imara katika imani. Inapowezekana, wanawatembelea ndugu na dada zao nyumbani kwao ili kuwatia moyo. Wanapofanya ziara za uchungaji kwa ndugu na dada zao, nia yao ni ‘kuwapa sehemu ya zawadi ya kiroho.’ (Rom. 1:11) Ni nini itakayowasaidia wazee kufanya hivyo?

¹¹ Mbele ya kufanya ziara ya uchungaji, muzee anapaswa kufikiria yule atakayetembelea. Anaweza kujiuliza hivi: Ni magumu gani anayopambana nayo? Ninaweza kufanya nini ili kumutia moyo? Ninaweza kumusomea andiko gani ao kumuelezea maisha ya mutumishi gani wa Mungu ili kumutia moyo? Kujiuliza maulizo hayo kunaweza kumusaidia muzee azungumuzie mambo yenye kutia moyo, kuliko kuzungumuzia mambo yasiyo ya maana. Anapowatembelea ndugu ao dada, muzee anapaswa kuwaacha wajieleze na kuwasikiliza kwa uangalifu. (Yak. 1:19) Dada mumoja alisema hivi: “Inatia moyo sana wakati muzee anaposikiliza kwa uangalifu.”​—Lu. 8:18.

12. Katika kutaniko, ni nani wanaohitaji kutiwa moyo, na sababu gani?

¹² Ni nani wanaopaswa kufanyiwa ziara ya uchungaji ao kutembelewa na wazee? Mutume Paulo aliwashauri wazee Wakristo ‘wakazie uangalifu kundi lote.’ Kila mushiriki wa kutaniko anahitaji kutiwa moyo: wahubiri na mapainia ambao kwa uaminifu wameendelea kuhubiri kwa miaka mingi. Sababu gani wanahitaji musaada wa kiroho wa wazee? Kwa sababu, hata ikiwa wanaonekana wenye nguvu kiroho, wakati mwengine wanapambana pia na matatizo fulani yanayoletwa na ulimwengu muovu wa Shetani. Ili tuelewe kabisa kwamba wakati fulani mutumishi wa Mungu ambaye anaonekana mwenye nguvu kiroho anaweza kuwa na lazima ya kutiwa moyo na mwengine, acheni tuzungumuzie jambo moja lililotokea katika maisha ya Mufalme Daudi.

13. (a) Daudi alikuwa katika hali gani wakati Ishbi-benobu alitaka kumushambulia? (b) Abishai alifanya nini ili kumusaidia Daudi?

¹³ Muda mufupi tu kisha Daudi kutiwa  mafuta ili kuwa mufalme, yeye alipigana na Goliathi, mumoja wa Warefaimu, jamii ya watu majitu (kabambi). Daudi alikuwa na uhodari na alimuua kabambi huyo, Goliathi. (1 Sam. 17:4, 48-51; 1 Nya. 20:5, 8) Miaka fulani baadaye, katika vita na Wafilisti, Daudi alipigana tena na mutu mwengine aliyekuwa kabambi kama Goliathi. Aliitwa Ishbi-benobu, aliyekuwa pia Murefaimu. (2 Sam. 21:16) Lakini, mara hii mutu huyo alikuwa karibu kumuua Daudi. Sababu gani? Si kwa sababu Daudi alikosa uhodari, lakini kwa sababu alikuwa amechoka. Biblia inasema hivi: “Daudi, akachoka.” Alipoona kwamba Daudi alikuwa amechoka, Ishbi-benobu ‘alifikiria kumupiga na kumua Daudi.’ Lakini, wakati tu alitaka kumushambulia Daudi, ‘Abishai mwana wa Seruya alikuja mara moja kumusaidia [Daudi], akamupiga yule Mufilisti na kumuua.’ (2 Sam. 21:15-17) Daudi aliponyokea chupuchupu! Bila shaka, Daudi alimushukuru sana Abishai kwa kuwa mwangalifu na kumusaidia wakati alipoona kwamba maisha yake yalikuwa katika hatari! Habari hii inatufundisha nini?

14. (a) Namna gani tunaweza kushinda matatizo yanayosimama mbele yetu kama Goliathi? (b) Namna gani wazee wanaweza kuwasaidia wengine ili warudiliwe na nguvu zao na furaha yao? Toa mufano.

¹⁴ Sisi watumishi wa Yehova, tunaendelea kuhubiri duniani pote ijapokuwa vizuizi ambavyo Shetani na watu wake wanatia mbele yetu. Ndugu na dada fulani wanapambana na matatizo makubwa yanayofananishwa na Goliathi, lakini wanayashinda sababu ya kumutegemea Yehova kwa moyo wote. Hata hivyo, wakati fulani tunakuwa wenye kuchoka na kuvunjika moyo katika vita hiyo. Katika hali kama hiyo, tunakuwa wazaifu na tunaweza kushindwa na magumu ambayo kwa kawaida tunavumilia. Wakati kama huo, muzee akitutia moyo, tunaweza kurudiliwa na furaha yetu na nguvu zetu. Ndugu na dada wengi wamekwisha kujionea jambo hilo. Dada mumoja painia mwenye umri wa miaka zaidi ya 60 anasema hivi: “Wakati fulani, sikuwa mwenye kujisikia vizuri, na kazi ya kuhubiri ilinichokesha. Muzee mumoja alitambua kama sikuwa na nguvu na akanitembelea. Tulikuwa na mazungumuzo yenye kutia moyo yenye kutegemea andiko fulani la Biblia. Nilitumikisha mashauri aliyonipa, na hilo lilinisaidia sana. Muzee huyo alitambua hali yangu ya kuwa muzaifu na akanitolea musaada. Huo ulikuwa upendo kabisa!” Bila shaka, inatia moyo kujua kwamba tuna wazee wanaotuhangaikia, na kama Abishai, wako tayari ‘kuja kutusaidia.’

15, 16. (a) Sababu gani ndugu na dada walimupenda sana mutume Paulo? (b) Sababu gani tunawapenda wazee wetu wanaotuhangaikia?

¹⁵ Kuwa muchungaji ni kazi ngumu. Kuna wakati wazee wanakosa usingizi ili kusali kwa ajili ya kutaniko ao ili kuwasaidia kiroho waamini wenzao. (2 Kor. 11:27, 28) Hata hivyo, kama mutume Paulo, wazee wanatimiza vizuri kabisa daraka lao kama inavyofaa na kwa furaha. Mutume Paulo aliwaandikia Wakorintho hivi: “Kwa furaha nyingi sana nitajitoa na tena nitatolewa kwa ajili ya [nafsi] zenu.” (2 Kor. 12:15, La Sainte Bible en Swahili de la R.D. Congo) Bila shaka, kwa sababu aliwapenda ndugu zake, Paulo alijitoa kabisa ili kuwatia nguvu. (Soma 2 Wakorintho 2:4; Flp. 2:17; 1 Thes. 2:8) Kwa hiyo, si jambo la kushangaza kwamba ndugu na dada walimupenda sana mutume Paulo!​—Mdo. 20:31-38.

¹⁶ Sisi watumishi wa Mungu leo tunawapenda pia wazee wetu wanaotuhangaikia na tunamushukuru Yehova kwa kutupatia wazee hao. Wanatuongezea furaha kwa kutuonyesha kwamba wanatuhangaikia. Tunajengwa na ziara zao za uchungaji. Zaidi ya hilo, tunafurahi kwamba wako tayari kutusaidia tunapolemewa na mahangaiko ya ulimwengu huu. Bila shaka, wazee hao wanaotuhangaikia ni ‘wafanyakazi wenzetu kwa furaha yetu.’