Kadiri tunajua sifa za mutu fulani, ni vile tunafikia kumujua muzuri zaidi, na ile inafanya urafiki wetu ukuwe nguvu. Vilevile, kadiri tunafikia kujua sifa za Yehova, ni vile tutajua muzuri zaidi yeye ni mutu wa namna gani, na ile inaweza kufanya urafiki wetu ukuwe nguvu. Kati ya sifa za ajabu za Mungu, ine ni kubwa kuliko zote: nguvu zake, hekima, haki, na upendo.

“Ee Bwana Mwenye Mamlaka Makubwa Zaidi Yehova! Angalia! Uliumba mbingu na dunia kwa nguvu zako kubwa.”​—YEREMIA 32:17.

Uumbaji unaonyesha wazi kama Mungu ni mwenye nguvu. Kwa mufano, kama unasimama inje wakati wa jua kali, unasikia nini kwenye ngozi yako? Kifukutu cha jua. Kwa kweli, ile yenye unasikia inatokana na nguvu za uumbaji za Yehova. Jua iko na nguvu kwa kiasi gani? Inasemekana kama katikati ya jua, joto liko na nyuzi Selsiasi milioni 15 hivi (ao, 15 000 000°C). Kila segonde, jua linatosha nguvu yenye inalingana na milipuko ya mamia ya mamilioni ya mabomu ya nyuklia (ao, bombes nucléaires).

Hata vile, jua letu ni kidogo likilinganishwa na mamilioni ya nyota zenye kuwa mu ulimwengu. Wanasayansi wanakadiria kuwa moja kati ya nyota kubwa zaidi yenye kuitwa UY Scuti, urefu wa diametre yake iko karibu mara 1 700 kuliko ile ya jua. Kama UY Scuti ingekamata nafasi ya jua, ingefunika dunia na kuvuka muzunguko wa sayari Sumbula (ao, Jupiter). Pengine ile inatusaidia kuelewa muzuri  zaidi maneno ya Yeremia yenye kusema kama Yehova aliumba mbingu na dunia, ni kusema, ulimwengu, kwa nguvu zake kubwa.

Tunapata faida gani kutokana na nguvu za Mungu? Uzima wetu unategemea vitu vyenye Mungu aliumba, kama vile jua na vitu vingine vya ajabu vyenye kuwa ku dunia. Zaidi ya ile, Mungu anatumia nguvu zake kwa faida ya kila mumoja wetu. Namna gani? Mu karne ya kwanza, Mungu alimupatia Yesu nguvu ya kufanya matendo ya ajabu kabisa. Tunasoma hivi: “Sasa vipofu wanaona, vilema wa miguu wanatembea, wenye ukoma wanafanywa kuwa safi, viziwi wanasikia, wafu wanafufuliwa.” (Matayo 11:5) Tuseme nini leo? Biblia inasema hivi: “Anapatia nguvu mutu mwenye kuchoka.” Inaongeza hivi: “Wale wenye kumutumainia Yehova watapata nguvu tena.” (Isaya 40:29, 31) Mungu anaweza kutupatia “nguvu zenye kupita zile za kawaida” ili tuweze kupambana ao kuvumilia magumu na majaribu yenye tunapata mu maisha. (2 Wakorinto 4:7) Hauvutiwe na Mungu mwenye anatumia kwa upendo nguvu zake zenye hazina mipaka kwa faida yetu?

“Kazi zako ni nyingi sana, Ee Yehova! Umezifanya zote kwa hekima.”​—ZABURI 104:24.

Kadiri tunajifunza juu ya vitu vyenye Mungu aliumba, ni vile tunashangazwa sana na hekima yake. Kwa kweli, katika sayansi yenye kuitwa bionique, wanasayansi wanachunguza uumbaji wa Yehova na kuuiga ili kufanya vitu vyenye walitengeneza vikuwe muzuri zaidi. Wanafanya vile ikuwe wanapenda kutengeneza chombo kidogo tu cha kufungia vitu ao kutengeneza ndege (ao, avions).

Hekima ya Mungu inaonekana kwa njia ya ajabu zaidi sana katika mwili wa mwanadamu. Kwa mufano, fikiria namna mwili wa mutoto unakomaa. Mambo inaanzia katika chembe moja yenye imetungishwa, yenye kuwa na habari zote za lazima za chembe za uriti. Chembe hiyo inajigawanya katika chembe mingi zenye kufanana. Lakini kwa wakati wenye kufaa, zile chembe zinaanza kuwa tofauti, na ile inafanya mamia ya chembe za aina mbalimbali, kama vile chembe za damu, chembe za mishipa, na chembe za mifupa. Bila kukawia, mifumo ya viungo vya mwili (ao, systèmes organiques) inatokea na kuanza kutumika. Kwa miezi kenda tu, ile chembe moja inakuwa mutoto mwenye kufanyizwa na mamiliare ya chembe. Hekima yenye kuonekana mu mwili wa mwanadamu imefanya watu wengi wakubaliane na muandikaji mumoja wa Biblia mwenye alisema hivi: “Ninakusifu kwa sababu nimeumbwa kwa njia yenye kuogopesha sana na ya ajabu.”​—Zaburi 139:14.

Tunapata faida gani kutokana na hekima ya Mungu? Muumbaji anajua mambo yenye tuko nayo lazima ili tukuwe na furaha. Kwa kuwa iko na ujuzi mwingi na uelewaji, anatutolea mashauri yenye hekima katika Neno lake Biblia. Kwa mufano, inatutia moyo hivi: “Muendelee . . . kusameheana kwa kupenda.” (Wakolosai 3:13) Ile shauri ni yenye hekima? Ndiyo. Wanganga wamevumbua kama kuwa mwenye kusamehe kunaweza kufanya usingizi wa  mutu ukuwe muzuri zaidi na kupunguza mwendo wa damu. Inaweza pia kupunguza hatari ya kushuka moyo na matatizo ingine ya afya. Mungu iko kama rafiki muzuri na mwenye hekima mwenye kuendelea kututolea mashauri ya muzuri na yenye faida. (2 Timoteo 3:16, 17) Haungependa ukuwe na rafiki wa vile?

“Yehova anapenda haki.”​—ZABURI 37:28.

Sikuzote Mungu anafanya mambo yenye kuwa sawa. Kwa kweli, “ni jambo lenye haliwezi kuwaziwa kwamba Mungu wa kweli atende uovu, na Mweza-Yote afanye makosa!” (Yobu 34:10) Hukumu zake ni za haki, kama vile muandikaji mumoja wa zaburi alisema wakati alizungumuza juu ya Yehova. Alisema hivi: “Utahukumu vikundi vya watu kwa haki.” (Zaburi 67:4) Kwa sababu “Yehova anaona ndani ya moyo,” hawezi kudanganywa na unafiki lakini sikuzote iko na uwezo wa kuona ukweli wa mambo na kufanya hukumu za haki. (1 Samweli 16:7) Zaidi ya ile, Mungu anaona matendo yote ya kukosa haki na rushwa (ao, kata-midomo) yenye kufanyika hapa ku dunia, na ameahidi kama hivi karibuni “waovu wataondolewa katika dunia.”​—Mezali 2:22.

Lakini, Mungu haiko muamuzi mukali mwenye iko na hamu ya kutoa malipizi. Anaonyesha rehema wakati inafaa. Biblia inasema hivi: “Yehova ni mwenye rehema na huruma,” hata kwa waovu kama wanatubu kikweli. Ile ni haki ya kweli kabisa, haiko vile?​—Zaburi 103:8; 2 Petro 3:9.

Tunapata faida gani kutokana na haki ya Mungu? Mutume Petro alisema hivi: “Mungu hana ubaguzi, lakini katika kila taifa mutu mwenye anamuogopa na kufanya mambo yenye kuwa sawa anakubaliwa naye.” (Matendo 10:34, 35) Tunapata faida kutokana na haki ya Mungu kwa sababu hakuwake na ubaguzi ao upendeleo. Anaweza kutukubali na tunaweza kuwa waabudu wake hata kama tuko wa rangi gani ya ngozi, inchi, elimu, ao hali gani ya maisha.

Kwa sababu Mungu anapenda tuelewe haki yake na kupata faida kutokana na ile haki, ametupatia zamiri. Maandiko inaonyesha kuwa zamiri ni sheria  yenye ‘kuandikwa ndani ya mioyo yetu,’ yenye “inatoa ushahidi” ikiwa mwenendo wetu ni wa muzuri ao wa mubaya. (Waroma 2:15) Ile inatuletea faida gani? Kama inazoezwa muzuri, zamiri yetu inaweza kutuchochea tuepuke matendo ya mubaya ao yenye kukosa haki. Na ikiwa tunafanya kosa fulani, inaweza kutuchochea tutubu na kubadilisha mwenendo wetu. Kwa kweli, kuelewa mawazo ya Mungu juu ya haki kunatusaidia na kunatufanya tumukaribie!

“Mungu ni upendo.”​—1 YOHANA 4:8.

Mungu ni mwenye nguvu, hekima, na haki, lakini Biblia haiseme kama Mungu ni nguvu, hekima, ao haki. Inasema kama yeye ni upendo. Juu ya nini? Ni juu inaweza kabisa kusemwa kama nguvu za Mungu zinamuwezesha kutenda, na haki na hekima yake vinaongoza matendo yake. Lakini upendo wa Yehova unamuchochea kutenda. Upendo unachochea kila jambo lenye anafanya.

Hata kama Yehova hakukosa kitu chochote, upendo wake ulimuchochea kuumba viumbe wenye akili, wenye kuwa mbinguni na ku dunia, wenye wanaweza kufaidika na kufurahia upendo wake na kuona namna anawahangaikia. Bila uchoyo, alitayarisha dunia ili ikuwe makao yenye kufaa kwa wanadamu. Na anaendelea kuonyesha upendo wanadamu wote kwa ‘kuangazia jua lake watu waovu na watu wazuri, tena ananyesha mvua juu ya wenye haki na wenye hawako wenye haki.’​—Matayo 5:45.

Zaidi ya ile, “Yehova ni mwenye upendo mwingi sana na mwenye rehema.” (Yakobo 5:11) Anaonyesha upendo kwa wale wenye wanakamata kwa moyo wote hatua ya kumujua na kumukaribia. Mungu anaona watu kama hao kipekee. Kwa kweli, ‘anakuhangaikia.’​—1 Petro 5:7.

Tunapata faida gani kutokana na upendo wa Mungu? Tunafurahiaka uzuri wa jua wakati inashuka. Tunafurahiaka kusikia cheko ya mutoto mudogo. Tunajisikiaka muzuri sana wakati mutu wa familia yetu anatuonyesha upendo. Pengine ile haitakuwa mambo ya maana, lakini inafanya tufurahie maisha kwa njia kubwa sana.

Mungu anatuonyesha upendo wake katika njia ingine yenye inatuletea pia faida; njia hiyo ni sala. Biblia inatutia moyo hivi: “Musihangaike juu ya jambo lolote, lakini katika kila jambo kwa sala na sala ya kumulilia Mungu pamoja na kutoa shukrani, maombi yenu yajulishwe Mungu.” Kama baba mwenye upendo, Yehova anapenda tumutegemee ili kupata musaada wake kuhusu mambo yenye kutuhangaisha sana. Kisha Yehova, kupitia upendo wake wenye hauna uchoyo, anaahidi kutupatia “amani ya Mungu yenye kupita uelewaji wote.”​—Wafilipi 4:6, 7.

Kuzungumuzia kwa kifupi sifa kubwa za Mungu​—kama vile nguvu, hekima, haki, na upendo wake—​kumekusaidia kujua muzuri zaidi Mungu ni mutu wa namna gani? Ili upendezwe na Mungu zaidi, tunakuomba ujifunze mambo yenye amekwisha kukufanyia na ile yenye atafanya kwa faida yako.