WATOTO wana lazima yako, sasa hivi. Mukubwa wako wa kazi naye iko na lazima yako. Bibi ao bwana yako anakuomba ufanye jambo fulani. Wakati huohuo, unapaswa pia kumushugulikia muzazi wako mwenye kuwa mugonjwa. Haukupanga kuwa na maisha kama hayo, lakini sasa yanakuchokesha kila siku. Unajiuliza hivi: “Ninaweza kufanya nini? Watu wako na lazima yangu!” Pengine kuwatimizia mambo yote yenye wanakuomba hakukuletee faida, ao hakuwaletee faida. Namna gani unaweza tena kupata nguvu ya kuvumilia?

Wakati Musa alikuwa muamuzi pekee wa taifa la zamani la Israeli, pengine aliwaza alikuwa anafanya tu mambo yenye alipaswa kufanya. Lakini baba yake mukwe alimuambia hivi: “Si vema jinsi unavyofanya. Utachoka.” Aliambia Musa achague wanaume wenye kuwa na uwezo wa kuhukumu. Wangeamua mambo madogo-madogo, na kupelekea Musa mambo magumu kuamua. Matokeo yalikuwa nini? Baba-mukwe wa Musa alimuhakikishia hivi: ‘Hakika utaweza kustahimili [kuvumilia] na, zaidi ya hilo, watu hawa wataenda mahali pao wenyewe kwa amani.’—Kutoka 18:17-23.

Kama vile tuliona katika habari ya kwanza, Delina iko na ugonjwa fulani wenye kuzuia ubongo kufikisha habari kwenye sehemu zingine za mwili. Tena, anachunga ndugu zake watatu wenye kuwa na matatizo ya akili. Anasema hivi: “Nimeona kuwa kuepuka kuhangaikia mambo ya kesho, na kuepuka tabia ya kuchelewesha mambo kunapunguza mahangaiko ya akili. Ninaelezea wengine magumu yangu, na hilo linafanya wanisaidie, hata bwana yangu ananisaidia. Tena, kila asubuhi ninatumia wakati kidogo ili kutengeneza bustani; hilo linaniletea furaha sana.”

Ikiwa uko na mambo mengi ya kufanya, na hilo linakufanya ukose nguvu, upime kufanya mambo yenye kufuata:

• Uombe musaada kwa wengine. Kwa mufano, uko na watoto wenye wanaishi pamoja na wewe, ambao wanaweza kukusaidia? Kuna watu wa jamaa ao marafiki wenye wanaishi karibu ambao wanaweza kukusaidia?

• Uambie wengine ni mambo gani uko nayo lazima. Kwa mufano, ikiwa mukubwa wako wa kazi anakupatia kazi nyingi sana, uzungumuze naye. Lakini usimuambie kama ikiwa hakusikie, utaacha kazi. Umuelezee tu ni magumu gani uko nayo. Pengine anaweza kukupunguzia kazi.

• Uandike kwenye karatasi ni mambo ngapi unapaswa kufanya katika juma. Kuna mambo unaweza kuambia wengine wakusaidie kufanya?

• Usiitike kuenda kila nafasi unaitwa. Ikiwa hautaweza kuenda nafasi uliitwa, kwa sababu hauna wakati ao hauna nguvu, umujulishe kwa upole mutu mwenye alikuita.

Jambo la Maana: Ikiwa unajaribu kufanya kila kitu, unaweza kushindwa kufanya hata kitu kimoja.