Hivi karibuni Mashahidi wa Yehova 23 huko Queens, New York, walijifunza kusoma na kuandika Kibengali, lugha inayozungumzwa nchini Bangladeshi na maeneo fulani ya India. Walijiandikisha kwenye madarasa ya kujifunza lugha yaliyofundishwa na Mashahidi wenzao.

Darasa la Kibengali ni mojawapo ya madarasa ya lugha yaliyofanywa huko Marekani na katika nchi nyingine. Lengo la kuhudhuria darasa hilo ni kujifunza jinsi tunavyoweza kuwahubiria watu wanaozungumza lugha nyingine.

Mmoja wa wanafunzi anayejifunza Kibengali anayeitwa Magaly, anasema hivi: “Idadi ya watu wanaozungumza Kibengali katika eneo letu inaongezeka upesi. Watu wanataka kujua majibu ya maswali kama vile ‘Kwa nini wanadamu wanateseka sana?’ Ninapowaeleza watu kuhusu ahadi za wakati ujao zenye kusisimua za Mungu, wanataka kujua zaidi. Lakini kizuizi ni kutojua lugha.”

Ili kuwasaidia wanafunzi wajifunze lugha haraka, walimu hutumia mbinu za kufundisha zinazowafurahisha wanafunzi. Mojawapo ya mbinu hizo ilihusisha utendaji wa mwili ili kuwasaidia kushika mambo waliyojifunza.

Baada ya kila kipindi cha darasa, mara tu baada ya kujifunza mbinu mpya, wanafunzi huwatembelea watu wanaozungumza Kibengali katika jamii yao na kuzungumzia nao maswali yanayohusu Biblia. Magaly alisema hivi: “Watu wanasisimka sana na wanataka kujua kwa nini ninajifunza lugha yao. Kwa sababu nilijitahidi kujifunza lugha yao walithamini sana ujumbe wetu.”

Zaidi ya kujifunza lugha ya kigeni Mashahidi wa Yehova hupokea mazoezi ya kufundisha madarasa mengine ya lugha. Katika eneo la ofisi ya tawi huko Marekani peke yake, kati ya mwezi wa Januari 2006 na Januari 2012, madarasa 38 hivi ya kufundisha lugha yamewazoeza walimu 2,244. Kufikia tarehe 1 Septemba, mwaka wa 2012, katika eneo la ofisi ya tawi ya Marekani, Mashahidi wa Yehova walikuwa wamefundisha lugha 37 katika madarasa 1,500.