Serikali nyingi ulimwenguni pote zimeagiza kwamba watu wakae umbali unaofaa kutoka kwa wenzao na kuzuia mikusanyiko ya watu wengi. Mashahidi wa Yehova wameazimia kutii maagizo hayo huku wakiendelea kukutana pamoja kwa njia salama. Ili kufanya hivyo, makutaniko yamekuwa yakifanya mikutano kwa kutumia programu zinazowaunganisha kupitia video mtandaoni, kama vile Zoom.

 Ili tuweze kuwa na mikutano salama na ya ukawaida, Baraza Linaloongoza liliidhinisha kwamba michango itumiwe kununua akaunti za Zoom kwa ajili ya makutaniko. Hilo limesaidia sana makutaniko ambayo hayangeweza kugharimia akaunti ya dola 15 hadi dola 20 au zaidi. Makutaniko hayo yalikuwa yakitumia programu zinazotolewa bila malipo ambazo zina mipaka kuhusu idadi ya watu wanaoweza kuunganishwa na ambazo si salama sana. Makutaniko yanayotumia akaunti ya tengenezo ya Zoom yananufaika kutokana na vipimo rahisi vya usalama na uwezo wa kuwaunganisha watu wengi sana kwenye kila mkutano. Kufikia sasa, makutaniko zaidi ya 65,000 katika nchi zaidi ya 170 yanatumia akaunti hizo.

 Kutaniko la Kairagi, liliko Manado, Sulawezi Kaskazini, nchini Indonesia, lilihamia kutoka kwenye programu ya bila malipo na kuanza kutumia akaunti ya tengenezo ya Zoom. Ndugu Hadi Santoso anaeleza hivi: “Hata ndugu na dada ambao hawajui jinsi ya kutumia vifaa vya kielektroni sasa wanaweza kufurahia mikutano, hasa kwa sababu sasa hawahitaji tena kuingiza nywila mara kadhaa wakati wa mkutano uleule.”

 Lester Jijón, Jr., mzee wa Kutaniko la Guayacanes Oeste lililoko Guayaquil, Ekuado, anaeleza hivi: “Kwa sababu ya hali ya uchumi ya ndugu na dada wengi, haingewezekana kwa makutaniko fulani kulipia leseni ya Zoom ambayo ingeruhusu kutaniko lote kuhudhuria mkutano. Lakini sasa, kwa sababu ya akaunti ya Zoom ya tengenezo inayoruhusu idadi kubwa ya watu kujiunga, tunaweza kuwakaribisha watu kuhudhuria mikutano bila wasiwasi kwamba tutazidi kiwango kilichowekwa.”

 Johnson Mwanza, mzee wa Kutaniko la Ngwerere North lililoko Lusaka, Zambia, anaandika hivi: “Ndugu na dada wengi wamesema mara nyingi kwamba ‘akaunti ya Zoom ya tengenezo imetufanya tujihisi tukiwa karibu na ndugu na dada zetu na pia imetufanya tuhisi kwamba Yehova anatupenda na kututunza.’”

 Akaunti hizo za tengenezo zinanunuliwa kwa kutumia pesa zilizotengwa kwa ajili ya kutoa msaada wakati wa misiba. Pesa kama hizo hupatikana kupitia michango ya hiari ya kazi ya ulimwenguni pote. Michango mingi kati ya hiyo hupatikana kupitia tovuti ya donate.isa4310.com. Asanteni sana kwa michango yenu ya ukarimu, ambayo inasaidia pia katika jitihada za kutoa msaada ulimwenguni pote.—2 Wakorintho 8:14.