Waliitwa “Wana wa Ngurumo”
Wafundishe Watoto Wako
Waliitwa “Wana wa Ngurumo”
MVUA inaponyesha huenda ukasikia ngurumo za radi. Je, umewahi kuogopeshwa na ngurumo hizo?— * Yesu anawaita wawili kati ya wafuasi wake “Wana wa Ngurumo.” Hebu tuchunguze kwa nini anawaita hivyo.
Wafuasi hao wawili wa Yesu ni Yakobo na Yohana. Wao ni ndugu na baba yao ni Zebedayo, naye mama yao ni Salome. Huenda Salome ni dada ya Maria, mama ya Yesu. Hivyo, huenda Yesu alikuwa binamu ya Yakobo na Yohana na yaelekea walikuwa marafiki tangu utotoni.
Zebedayo ni mvuvi nao Yakobo na Yohana ni wavuvi pia. Wao ni kati ya watu wa kwanza kuchaguliwa na Yesu kuwa wafuasi wake. Anapowaomba wamfuate, wanaacha mara moja biashara yao ya kuvua samaki na kumfuata. Baadaye Yesu anachagua 12 kati ya wafuasi wake kuwa mitume wake. Yakobo na Yohana ni wawili kati ya mitume hao.
Miezi kadhaa kabla ya Yesu kuuawa, yeye na wanafunzi wake wanapitia eneo lenye milima la Samaria. Usiku unakaribia na wote wamechoka. Lakini Wasamaria wanasema kwamba hawataki Yesu na mitume wake walale katika jiji lao. Unajua ni kwa nini?— Hebu tuone.
Yesu na mitume wake ni Wayahudi, na Wayahudi wengi wanawachukia Wasamaria. Bila shaka, Yesu hachukii Wasamaria. Anawatendea kwa fadhili, na ndivyo Yakobo na Yohana wanavyopaswa kuwatendea. Lakini wanafunzi hao wawili wanawakasirikia Wasamaria ambao walikataa kuwakaribisha, na wanamuuliza Yesu: ‘Unataka tuuambie moto ushuke na kuwaua?’ Unafikiri Yesu anasema nini?— Anawaambia ni makosa kusema jambo kama hilo! Yakobo na Yohana wanahitaji kujifunza mengi zaidi kuhusu rehema.
Yakobo na Yohana wana tatizo lingine kubwa la kutaka kuwa wa kwanza, yaani, kuwa watu wa maana zaidi. Muda mfupi kabla ya kifo cha Yesu, wanamtuma mama yao aende akamwambie Yesu maneno haya: “Toa agizo ili hawa wanangu wawili waketi, mmoja upande wako wa kuume na mmoja upande wako wa kushoto, katika ufalme wako.” Kwa hiyo, wale mitume wengine kumi wanakasirika sana wanaposikia kile ambacho Yakobo na Yohana wamefanya. Je, wewe pia ungekasirika?—
Huenda ungekasirika. Bila shaka, hatufurahi wengine wanapotaka kuwa wa kwanza na kujaribu kuwa watu maana zaidi. Baadaye, Yakobo na Yohana wanatambua jinsi walivyokosea na kutenda bila fadhili, na wanafanya mabadiliko. Wanakuwa mitume wenye upendo na fadhili. Tunaweza kujifunza nini kutokana na jambo hilo?—
Jambo tunalojifunza kutoka kwa Yesu ni kwamba sisi pia tunapaswa kutendeana kwa fadhili. Yesu aliwatendea watu kwa njia nzuri, kutia ndani wanaume, wanawake, na watoto. Je, wewe pia utajitahidi kukumbuka mfano wake na kuuiga?—
Soma katika Biblia yako
Mathayo 27:55, 56; Marko 15:40, 41
Yohana 4:4-15, 21-26; Luka 9:51-55
Mathayo 20:20-24; Marko 10:35-37, 41
[Maelezo ya Chini]
^ fu. 3 Kama unasoma sehemu hii pamoja na mtoto, unapoona kistari kama hiki (—), tua na umtie moyo mtoto atoe maoni yake.
Huenda Ukapenda Pia
MNARA WA MLINZI
Yesu Kristo—Tumkumbuke kwa Njia Gani?
Je, tunapaswa kumkumbuka Yesu akiwa mtoto? Wanaume wenye hekima waliokuja kumwona Yesu walikuwa nani? Yesu anafanya nini sasa?
MNARA WA MLINZI
Mungu Anaweza Kuhuzunika
Je, unajua unaweza kumfurahisha au kumhuzunisha Yehova? Chunguza jinsi Adamu na Hawa walivyomhuzunisha Yehova.
MNARA WA MLINZI
Tunajifunza Nini Kutoka kwa Mhalifu?
Yesu alipokuwa karibu kufa, alimwahidi mhalifu kwamba ataishi katika Paradiso. Yesu alimaanisha nini, na Paradiso hiyo itakuwaje?
MNARA WA MLINZI
Petro na Anania Walidanganya
Soma uone kwa nini mtu fulani alisamehewa alipodanganya lakini mwingine hakusamehewa.
MNARA WA MLINZI
Yothamu Aliendelea Kuwa Mwaminifu Licha ya Matatizo Nyumbani
MNARA WA MLINZI
Pupa ilimfanya Gehazi apoteze kibali cha Mungu
Gehazi alichukua vitu visivyo vyake. Tunaweza kujifunza nini kutokana kisa hicho?
