INAONEKANA kwamba kuna habari nyingi sana kuhusu misiba. Watu wengi zaidi wanapatwa na misiba mbalimbali kuliko wakati mwingine wowote ule. Kituo cha Utafiti Kuhusu Magonjwa Yanayosababishwa na Misiba kilicho huko Ubelgiji kiliripoti kwamba mwaka wa 2010 peke yake kulikuwa na misiba 373 iliyosababisha vifo vya watu wapatao 296,000.

Kumekuwa pia na ongezeko la misiba iliyoripotiwa katika miongo kadhaa iliyopita. Kwa mfano, kati ya mwaka wa 1975 na 1999, misiba isiyozidi 300 ilirekodiwa kila mwaka. Hata hivyo, kati ya mwaka wa 2000 na 2010, wastani ulikuwa karibu misiba 400 kila mwaka. Labda wewe ni kati ya watu wanaojiuliza, ‘Kwa nini misiba imeongezeka sana leo?’

Ingawa mara nyingi watu wanasema kwamba misiba hiyo ni “kazi ya Mungu,” kwa kweli huo ni uwongo. Mungu hasababishi misiba inayowaathiri watu wengi sana leo. Ingawa hivyo, Biblia ilitabiri kwamba kungekuwa na misiba katika nyakati zetu. Kwa mfano, tunasoma maneno haya ya Yesu kwenye Mathayo 24:7, 8: “Kutakuwa na upungufu wa chakula na matetemeko ya nchi mahali pamoja baada ya pengine. Mambo yote hayo ni mwanzo wa maumivu ya taabu.” Kwa nini Yesu alitabiri matukio hayo, nayo yanamaanisha nini kwetu?

Yesu, mwana wa Mungu, alikuwa akijibu swali ambalo alikuwa ameulizwa: “Ni nini itakayokuwa ishara ya . . . umalizio wa mfumo wa mambo?” (Mathayo 24:3) Alitaja mambo mengi ambayo yangetukia, kutia ndani misiba kama ile ambayo imetajwa hapo juu. Kisha akasema maneno haya yenye uzito: “Wakati mnapoona mambo hayo yakitukia, jueni kwamba ufalme wa Mungu uko karibu.” (Luka 21:31) Hivyo, misiba hiyo ya asili ina maana kubwa sana kwetu. Inaonyesha kwamba kutakuwa na mabadiliko makubwa hivi karibuni.

Hata hivyo, bado watu wengi wanauliza, Ikiwa Mungu hasababishi misiba, ni nani au ni nini kinachoisababisha? Tunaweza tu kuelewa jibu ikiwa tutatambua ukweli muhimu unaotajwa katika Biblia: “Ulimwengu mzima unakaa katika nguvu za yule mwovu.” (1 Yohana 5:19)  Mstari huo unafunua kwamba si Mungu anayesababisha hali zenye kutaabisha zilizo ulimwenguni, bali mara nyingi ni adui yake, “yule mwovu”—ambaye katika Biblia anaitwa “Ibilisi.”—Ufunuo 12:9, 12.

Akiongozwa na tamaa yake ya kibinafsi, adui huyo wa Mungu anawaona watu kama vitu vya kutumiwa kisha vitupwe. Kwa sababu anaongoza ulimwengu mzima, amechochea roho hiyohiyo kati ya wanadamu. Kwa kweli, Biblia inataja jambo hilo inapotabiri kwamba “katika siku za mwisho,” watu watakuwa “wenye kujipenda wenyewe, wenye kupenda pesa, wenye kujidai, wenye majivuno.” (2 Timotheo 3:1, 2) Hivyo, hatushangazwi kuona kwamba Ibilisi ametokeza mifumo ulimwenguni kote ambayo inafanikiwa kwa sababu ya tabia hizo na pia tabia nyingine ambazo hazimpendezi Mungu. Anawachochea watu watende kwa ubinafsi na pupa, mambo ambayo mara nyingi yanafanya watu wakabili hatari.

Mfumo wa sasa wenye pupa unaendelezaje misiba? Ripoti ya Umoja wa Mataifa kuhusu misiba ulimwenguni inasema: “Mara nyingi kuna wakaaji wengi sana katika maeneo hatari kama vile maeneo tambarare yanayoweza kufurika. Vilevile, kuharibiwa kwa misitu na maeneo yenye majimaji kunapunguza uwezo wa mazingira wa kustahimili misiba. Hatari kubwa zaidi ni yale mabadiliko ya hali ya hewa ulimwenguni na kuongezeka kwa kiwango cha maji baharini kwa sababu ya ongezeko la gesi zinazoongeza joto duniani . . . ambazo zinatokezwa na shughuli za wanadamu.” Ingawa inasemekana kwamba nyingi kati ya ‘shughuli hizo za wanadamu’ zinafanywa ili kuleta maendeleo ya kiuchumi, kwa kweli zinachochewa na roho ya ubinafsi na pupa ambayo imeenea sana ulimwenguni.

Hivyo basi, sasa wataalamu wengi wanatambua kwamba shughuli za wanadamu zisizo na mipango zimeongeza madhara yanayosababishwa na misiba inayotokea. Kwa kweli, wanadamu wanaunga mkono mfumo ambao Ibilisi anatumia kuzidisha mateso yanayowapata wanadamu wakati wa misiba.

Basi, tunaona kwamba misiba mingi inatokana na mambo ambayo wanadamu wanafanya bila kujali. Misiba fulani haingesababisha uharibifu mkubwa sana kama haingetokea mahali ilipotokea. Katika maeneo mengi duniani, madhara ya misiba ya asili yamekuwa mabaya zaidi kwa sababu ya shughuli za watu wafisadi au kwa sababu ya msongamano wa watu katika maeneo hatari unaosababishwa na tofauti za kiuchumi au kijamii ambazo ni sehemu ya ulimwengu huu. Bila shaka, watu fulani huteseka wakati wa misiba, si kwa sababu ya makosa ya mtu fulani au kutojali, bali kwa sababu “wakati na tukio lisilotazamiwa huwapata wote.”—Mhubiri 9:11.

Hata sababu iwe gani, ikiwa utakumbwa na msiba wa asili, unawezaje kukabiliana nao? Sasa tutazungumzia hatua tunazoweza kuchukua ili kupunguza madhara msiba unapotokea.