Pata Baraka Kupitia Mfalme Anayeongozwa na Roho ya Mungu!

“Roho ya Yehova itatua juu yake.”—ISA. 11:2.

1. Watu fulani wamesema nini kuhusu matatizo yanayokabili ulimwengu?

KATIKA mwaka wa 2006, mtaalamu wa elimu ya nyota Stephen Hawking aliuliza hivi: “Katika ulimwengu uliojaa machafuko ya kisiasa, kijamii na kimazingira, je, jamii ya wanadamu inaweza kuendelea kuwapo kwa miaka mingine 100?” Gazeti moja (New Statesman) lilikuwa na habari ifuatayo: “Hatujamaliza umaskini wala kuleta amani ulimwenguni. Badala yake, inaonekana tumepata matokeo yaliyo kinyume kabisa. Si kwamba hatujajaribu. Tumejaribu kila kitu kutia ndani ukomunisti na mfumo wa soko huru; Ushirika wa Mataifa na kujikusanyia silaha za nyuklia ili kuzuia vita. Tumepigana ‘vita vingi ili kumaliza vita’ kuamini kwamba tunajua jinsi ya kumaliza vita.”

2. Hivi karibuni Yehova atatumia jinsi gani haki yake akiwa mwenye enzi kuu juu ya dunia?

² Watumishi wa Yehova hawashangazwi na maneno kama hayo. Biblia inatuambia kwamba wanadamu hawakuumbwa ili wajiongoze wenyewe. (Yer. 10:23) Yehova peke yake ndiye anayestahili kuwa Mwenye Enzi Kuu wetu. Kwa hiyo, ana haki ya kutuwekea viwango, kutuambia kusudi ambalo tunapaswa kufuatia maishani, na kutuongoza ili kufikia kusudi hilo. Zaidi ya hayo, hivi karibuni atatumia mamlaka yake kukomesha jitihada za wanadamu za kujitawala wenyewe ambazo zimeshindwa. Wakati huohuo, atawaangamiza wote ambao kwa kukataa enzi yake kuu wamewafanya wanadamu wawe watumwa wa dhambi, kutokamilika, na wa “mungu wa mfumo huu wa mambo,” Shetani Ibilisi.—2 Kor. 4:4.

3. Isaya alitabiri mambo gani kumhusu Masihi?

³ Katika dunia mpya ambayo itakuwa Paradiso, enzi kuu ya Yehova yenye upendo itaonyeshwa kwa wanadamu kupitia Ufalme wa Kimasihi. (Dan. 7:13, 14) Isaya alitabiri hivi kuhusu Mfalme wa Ufalme huo: “Tawi litatoka katika kisiki cha Yese; na kutoka katika mizizi yake chipukizi litazaa. Na roho ya Yehova itatua juu yake, roho ya hekima na ya uelewaji, roho ya shauri na ya nguvu, roho ya ujuzi na ya kumwogopa Yehova.” (Isa. 11:1, 2) Roho takatifu ya Mungu imetumika katika njia gani hasa kumfanya Yesu Kristo ambaye ni ‘tawi kutoka katika kisiki cha Yese,’ astahili kuwatawala wanadamu? Ni baraka gani ambazo zitaletwa na utawala wake? Na ni lazima tufanye nini ili tupate baraka hizo?

Mungu Alimfanya Yesu Astahili Kutawala

4-6. Ni ujuzi gani wa maana sana ambao utamwezesha Yesu kutumika akiwa Mfalme, Kuhani Mkuu, na Mwamuzi mwenye huruma na hekima?

⁴ Yehova anataka raia wake wa kibinadamu wafikie ukamilifu chini ya mwongozo wa Mfalme, Kuhani Mkuu, na Mwamuzi ambaye ana huruma na hekima ya kweli. Ndiyo sababu Mungu alimchagua Yesu Kristo, ambaye alimfanya astahili kupitia roho takatifu kutimiza madaraka hayo ya maana zaidi. Ona sababu fulani ambazo zitamwezesha Yesu kutimiza kikamilifu madaraka ambayo amepewa na Mungu.

⁵ Yesu ana ujuzi wa ndani zaidi kumhusu Mungu. Mwana mzaliwa-pekee amemjua Baba kwa muda mrefu zaidi kuliko mtu mwingine yeyote, inawezekana amemjua kwa mabilioni mengi ya miaka. Katika kipindi hicho, Yesu alipata ujuzi mwingi sana kumhusu Yehova hivi kwamba  ingeweza kusemwa kuwa yeye ni ‘mfano wa Mungu asiyeonekana.’ (Kol. 1:15) Yesu mwenyewe alisema hivi: “Yule ambaye ameniona mimi amemwona Baba pia.”—Yoh. 14:9.

⁶ Baada ya Yehova, Yesu ndiye mtu mwenye ujuzi mwingi zaidi kuhusu uumbaji wote, kutia ndani wanadamu. Andiko la Wakolosai 1:16, 17 linasema hivi: “Kwa njia yake [Mwana wa Mungu] vitu vingine vyote viliumbwa mbinguni na duniani, vitu vinavyoonekana na vitu visivyoonekana . . . Pia, yeye ni wa kabla ya vitu vingine vyote na kwa njia yake vitu vingine vyote vilifanywa kuwapo.” Hebu fikiria jambo hilo! Yesu, akiwa “stadi wa kazi” wa Mungu, alishiriki katika kazi nyingine zote za uumbaji. Hivyo, anaelewa kila jambo kuhusu ulimwengu wote, kuanzia chembe ndogo sana za atomu mpaka ubongo wenye kustaajabisha wa mwanadamu. Ndiyo, kwa kweli Kristo ni hekima inayofananishwa na mtu!—Met. 8:12, 22, 30, 31.

7, 8. Roho takatifu ya Mungu ilimsaidia jinsi gani Yesu katika huduma yake?

⁷ Yesu alitiwa mafuta kwa roho takatifu ya Mungu. Yesu alisema hivi: “Roho ya Yehova iko juu yangu, kwa sababu alinitia mafuta kuwatangazia maskini habari njema, alinituma kuhubiri kuachiliwa huru kwa mateka na kupata kuona tena kwa vipofu, kuacha waliopondeka waende zao wakiwa wameachiliwa huru, kuhubiri mwaka wa Yehova wenye kukubalika.” (Luka 4:18, 19) Yesu alipobatizwa, inaelekea kwamba roho takatifu ilimfanya akumbuke mambo aliyokuwa amejifunza kabla ya kuja duniani, kutia ndani mambo ambayo Mungu alitaka atimize wakati wa huduma yake duniani akiwa Masihi.—Soma Isaya 42:1; Luka 3:21, 22; Yohana 12:50.

⁸ Kwa sababu Yesu alitiwa nguvu na roho takatifu na alikuwa na mwili na akili kamilifu, hakuwa tu mtu mkuu zaidi aliyepata kuishi duniani bali pia alikuwa Mwalimu mkuu zaidi. Kwa kweli, wasikilizaji wake ‘walishangazwa na njia yake ya kufundisha.’ (Mt. 7:28) Kwanza, Yesu alikuwa na uwezo wa kushughulikia visababishi vikuu vya matatizo ya wanadamu, yaani, dhambi, kutokamilika, na kukosa ujuzi wa mambo ya kiroho. Pia, angeweza kuona kikweli jinsi watu walivyokuwa ndani ya mioyo yao na kushughulika nao kwa njia inayofaa.—Mt. 9:4; Yoh. 1:47.

9. Uhakika wako katika Yesu akiwa Mtawala unatiwa nguvu jinsi gani unapofikiria mambo yaliyompata alipokuwa duniani?

⁹ Yesu aliishi akiwa mwanadamu. Maisha yake akiwa mwanadamu na kushirikiana kwa ukaribu na watu ambao si wakamilifu kulimsaidia sana Yesu kustahili kuwa Mfalme. Mtume Paulo aliandika hivi: “[Yesu] alipaswa kuwa kama ‘ndugu’ zake katika mambo yote, ili awe kuhani mkuu mwenye rehema na mwaminifu katika mambo yanayohusiana na Mungu, kusudi atoe dhabihu ya upatanisho kwa ajili ya dhambi za watu. Kwa kuwa yeye mwenyewe ameteseka alipokuwa akijaribiwa, anaweza kuwasaidia wale wanaojaribiwa.” (Ebr. 2:17, 18) Kwa kuwa Yesu ‘alijaribiwa,’ anaweza kuwahurumia wale ambao wanapatwa na majaribu. Huruma ya Yesu ilionekana wazi wakati wa huduma yake duniani. Wagonjwa, walemavu, watu walioonewa, na hata watoto walijihisi huru kumkaribia. (Marko 5:22-24, 38-42; 10:14-16) Watu wapole na watu waliokuwa na njaa ya kiroho walivutiwa pia naye. Kwa upande mwingine, watu wenye kiburi, wenye majivuno, na  wale ambao ‘hawakuwa na upendo wa Mungu ndani yao,’ walimkataa, walimchukia, na kumpinga.—Yoh. 5:40-42; 11:47-53.

10. Yesu alionyesha kwa njia gani kuu kwamba anatupenda?

¹⁰ Yesu alitoa uhai wake kwa ajili yetu. Labda sababu kuu zaidi inayothibitisha kwamba Yesu anastahili kuwa Mtawala ni kwamba alikuwa tayari kufa kwa ajili yetu. (Soma Zaburi 40:6-10.) Kristo alisema hivi: “Hakuna aliye na upendo mkuu kuliko huu, kwamba mtu aitoe nafsi yake kwa ajili ya rafiki zake.” (Yoh. 15:13) Ndiyo, tofauti na viongozi wa kibinadamu wasio wakamilifu, ambao mara nyingi wanaishi maisha ya starehe kwa kutumia pesa ambazo wanapata kutoka kwa raia wao, Yesu alitoa uhai wake mwenyewe kwa ajili ya wanadamu.—Mt. 20:28.

Yesu Amepewa Mamlaka ya Kutumia Fidia au Dhabihu ya Ukombozi

11. Kwa nini tunaweza kuwa na uhakika kabisa katika Yesu akiwa Mkombozi wetu?

¹¹ Ni jambo linalofaa kama nini kwamba Yesu akiwa Kuhani Mkuu ndiye atakayeongoza katika kutuletea faida za dhabihu yake ya ukombozi! Kwa kweli, wakati wa huduma yake duniani, Yesu alituonyesha kimbele yale ambayo atafanya akiwa Mkombozi wetu wakati wa Utawala wake wa Miaka Elfu Moja, ambao tutafurahia ikiwa tutakuwa waaminifu. Aliwaponya wagonjwa na walemavu, akawafufua wafu, akalisha umati, na hata akazuia nguvu za asili. (Mt. 8:26; 14:14-21; Luka 7:14, 15) Zaidi ya hayo, hakufanya mambo hayo ili aonyeshe mamlaka na nguvu zake, lakini alifanya hivyo ili kuonyesha huruma na upendo wake. Mtu fulani mwenye ukoma alipomsihi amponye, Yesu alimwambia, “ninataka.” (Marko 1:40, 41) Yesu ataonyesha huruma hiyohiyo wakati wa utawala wake wa Miaka Elfu Moja, lakini atafanya hivyo katika dunia yote.

12. Andiko la Isaya 11:9 litatimizwa jinsi gani?

¹² Kristo na watawala wenzake wataendeleza pia programu ya elimu ya kiroho ambayo Yesu alianzisha miaka 2,000 hivi iliyopita. Hivyo, maneno ya Isaya 11:9 yatatimizwa: “Dunia hakika itajawa na kumjua Yehova kama vile maji yanavyoifunika bahari.” Elimu hiyo ya kimungu bila shaka itatia ndani maagizo kuhusu jinsi ya kutunza dunia na viumbe wengi walio duniani, kama vile Adamu alivyokuwa ameagizwa afanye mwanzoni. Kufikia mwisho wa ile miaka 1,000, kusudi la kwanza la Mungu linalotajwa katika Mwanzo 1:28 litakuwa limetimizwa, na dhabihu ya ukombozi itakuwa imetumiwa kikamili.

Amepewa Mamlaka ya Kuhukumu

13. Yesu alionyesha jinsi gani kwamba alipenda uadilifu?

¹³ Kristo ndiye “aliyeagizwa na Mungu kuwa mwamuzi wa walio hai na wafu.” (Mdo. 10:42) Basi, inatia moyo kama nini kujua kwamba  Yesu hawezi kupotosha haki, na kwamba uadilifu na uaminifu umefungwa kama mshipi kwenye viuno vyake! (Isa. 11:5) Alionyesha kwamba alichukia pupa, unafiki, na maovu mengine, na aliwashutumu vikali watu ambao hawakujali watu waliokuwa wakiteseka. (Mt. 23:1-8, 25-28; Marko 3:5) Zaidi ya hayo, Yesu alionyesha kwamba hakudanganywa na sura ya nje, kwa “maana yeye mwenyewe alijua kile kilichokuwa ndani ya mwanadamu.”—Yoh. 2:25.

14. Yesu anaonyesha jinsi gani sasa kwamba anapenda uadilifu na haki, na tunapaswa kujiuliza maswali au maulizo gani?

¹⁴ Yesu anaendelea kuonyesha kwamba anapenda uadilifu na haki kwa kusimamia kampeni kubwa zaidi ya kuhubiri na kufundisha katika historia yote ya ulimwengu. Hakuna mwanadamu, hakuna serikali ya wanadamu, na hakuna roho mwovu ambaye anaweza kuzuia kazi hiyo isitimizwe kwa kiwango ambacho Mungu angependa. Hivyo, tunaweza kuwa na hakika kabisa kwamba baada ya Har-Magedoni, haki ya Mungu itakuwa imeshinda. (Soma Isaya 11:4; Mathayo 16:27.) Jiulize hivi: ‘Je, ninaonyesha mtazamo kama wa Yesu kuelekea watu katika huduma yangu? Je, ninampa Yehova kilicho bora zaidi hata ingawa afya yangu au hali zangu za kibinafsi zinaweza kupunguza mambo ambayo ninaweza kufanya?’

15. Tunaweza kumpa Mungu kilicho bora zaidi tukitambua jambo gani?

¹⁵ Tukitambua kwamba kazi ya kuhubiri ni kazi ya Mungu, hilo litatusaidia kumtumikia Mungu kwa nafsi yote. Aliamuru kazi hiyo ifanywe; anaiongoza kupitia Mwana wake; na kupitia roho yake takatifu anawatia nguvu wale wanaoshiriki katika kazi hiyo. Je, unathamini pendeleo ulilo nalo la kutumika ukiwa mfanyakazi mwenzi wa Mungu pamoja na Mwana wake ambaye anaongozwa na roho? Ni nani mwingine isipokuwa Yehova ambaye angewachochea watu zaidi ya milioni saba, wengi wao wakiwa watu wanaoonwa kuwa “wasio na elimu na wa kawaida,” wawahubirie watu ujumbe wa Ufalme katika nchi zaidi ya 236?—Mdo. 4:13.

Jibariki Mwenyewe Kupitia Kristo!

16. Andiko la Mwanzo 22:18 linaonyesha nini kuhusu baraka za Mungu?

¹⁶ Yehova alimwambia hivi Abrahamu: “Kupitia kwa uzao wako mataifa yote ya dunia hakika yatajibariki kwa sababu wewe umeisikiliza sauti yangu.” (Mwa. 22:18) Hilo linaonyesha kwamba watu wanaothamini utumishi wao kwa Yehova wanaweza kutazamia kwa hakika kupata baraka ambazo zitaletwa na Uzao wa Kimasihi. Na leo wanatumikia kwa bidii wakitazamia baraka hizo.

17, 18. Ni ahadi gani ya Yehova ambayo tunasoma katika Kumbukumbu la Torati 28:2, na ahadi hiyo inamaanisha nini kwetu?

¹⁷ Pindi fulani, Mungu aliwaambia hivi wazao wa kimwili wa Abrahamu, yaani, taifa la Israeli: “Nazo baraka hizi zote [zilizotajwa katika agano la Sheria] zitakujia na kukufikia, kwa sababu umeendelea kuisikiliza sauti ya Yehova Mungu wako.” (Kum. 28:2) Maneno hayohayo yanaweza kusemwa kwa watumishi wa Mungu leo. Ikiwa unatamani kupata baraka za Yehova, ‘endelea kuisikiliza’ sauti yake. Kisha baraka zake “zitakujia na kukufikia.” Hata hivyo, ‘kusikiliza’ kunatia ndani nini?

¹⁸ Bila shaka, kusikiliza kunatia ndani kuchukua kwa uzito yale yanayosemwa katika Neno la Mungu na chakula cha kiroho ambacho Mungu anaandaa. (Mt. 24:45) Pia, kunamaanisha kumtii Mungu na Mwana wake. Yesu alisema: “Si kila mtu anayeniambia, ‘Bwana, Bwana,’ atakayeingia katika ufalme wa mbinguni, bali yule anayefanya mapenzi ya Baba yangu aliye mbinguni ndiye atakayeingia.” (Mt. 7:21) Na kumsikiliza Mungu kunamaanisha kujitiisha kwa kupenda chini ya mpango ambao  ameweka, yaani, kutaniko la Kikristo pamoja na wazee waliowekwa rasmi, “zawadi katika wanadamu.”—Efe. 4:8.

19. Tunaweza kutazamia baraka ikiwa tutafanya nini?

¹⁹ ‘Zawadi hizo katika wanadamu’ zinatia ndani washiriki wa Baraza Linaloongoza, ambao wanatenda wakiwa wawakilishi wa kutaniko lote la Kikristo. (Mdo. 15:2, 6) Kwa kweli, mtazamo wetu kuelekea ndugu wa kiroho wa Kristo ni jambo kuu ambalo litaamua jinsi tutakavyohukumiwa wakati wa dhiki kuu inayokuja. (Mt. 25:34-40) Hivyo, njia moja ambayo tunaweza kupata baraka ni kwa kuwaunga mkono kwa ushikamanifu watiwa-mafuta wa Mungu.

20. (a) Wale ambao ni “zawadi katika wanadamu” wana daraka gani la maana? (b) Tunaweza kuonyesha jinsi gani kwamba tunawathamini ndugu hao?

²⁰ “Zawadi katika wanadamu” zinatia ndani pia washiriki wa Halmashauri za Tawi, waangalizi wanaosafiri, na wazee wa kutaniko—na wote hao wamewekwa rasmi kupitia roho takatifu. (Mdo. 20:28) Daraka la maana sana la ndugu hao ni kuwajenga watu wa Mungu “mpaka . . . sote tuufikie umoja katika imani na katika ujuzi sahihi wa Mwana wa Mungu, kufikia kuwa mtu aliyekomaa, kufikia kipimo cha kimo ambacho ni cha ujazo wa Kristo.” (Efe. 4:13) Ni kweli kwamba kama sisi sote, wao pia si wakamilifu. Hata hivyo, tunajibariki wenyewe tunapothamini na kutii uchungaji wao wenye upendo.—Ebr. 13:7, 17.

21. Kwa nini kuna uharaka wa kumtii Mwana wa Mungu?

²¹ Hivi karibuni, Kristo atachukua hatua ya kuangamiza mfumo mwovu wa Shetani. Hilo litakapotokea, uhai wetu utategemea hukumu ya Yesu, kwa kuwa yeye ndiye aliyepewa mamlaka na Mungu ya kuuongoza “umati mkubwa” uliotabiriwa kwenye “chemchemi za maji ya uzima.” (Ufu. 7:9, 16, 17) Hivyo, acheni tufanye yote tunayoweza sasa ili tujitiishe kwa kupenda na kwa kuthamini chini ya Mfalme ambaye anaongozwa na roho ya Yehova.

Ulijifunza Nini Kutokana na . . .

• Isaya 11:1-5?

• Marko 1:40, 41?

• Matendo 10:42?

• Mwanzo 22:18?

[Maswali ya Funzo]

[Picha katika ukurasa wa 17]

Yesu alionyesha huruma alipomfufua binti ya Yairo

[Picha katika ukurasa wa 18]

Yesu Kristo anasimamia kampeni kubwa zaidi ya kuhubiri katika historia yote