“Kinanisaidia Kugusa Mioyo ya Watu”

WAKATI fulani uliopita Porto Alegre, jiji lililo kusini mwa Brazili, lilikuwa na mkutano wa kimataifa kuhusu mambo ya kijamii. Makumi ya maelfu ya watu kutoka katika nchi 135 walihudhuria mkutano huo. Wakati wa mapumziko, kikundi cha Mashahidi kutoka kutaniko la Porto Alegre kiliwafikia wajumbe wengi ili kuzungumza nao ujumbe wa Ufalme kutoka katika Biblia. Waliwasiliana jinsi gani?

“Tulitumia kijitabu Good News for People of All Nations (Une bonne nouvelle pour des gens de toutes nations),” anaeleza Elizabete, ambaye ni painia. Anaongeza hivi: “Wajumbe wengi walikuwa hawajawahi kamwe kusikia habari njema ya Ufalme, lakini walifurahia ujumbe wetu. Tulizungumza na watu kutoka Bolivia, China, India, Israel, Nigeria, na Ufaransa. Tuliwapa wajumbe fulani vichapo vya Biblia katika lugha zao, nao walivikubali kwa furaha.”

Huko Mexico, painia anayeitwa Raúl anapata matokeo mazuri kwa kutumia pia kijitabu hicho. Muda fulani uliopita, alimfikia mwanamume mmoja Mwarabu mwenye umri wa miaka 80 aliyefiwa na mke wake karibuni. Baada ya mwanamume huyo kusoma katika kijitabu hicho ukurasa ambao una ujumbe wa Ufalme katika Kiarabu, alitokwa na machozi ya shangwe. Kwa nini? Ahadi ya Mungu ya kwamba kifo hakitakuwapo tena, kama inavyoonyeshwa katika Ufunuo 21:3, 4, ilimgusa moyo sana alipoisoma katika lugha yake ya asili. Pindi nyingine, alipokuwa akihubiri isivyo rasmi, Raúl alikutana na mwanamume aliyezungumza Kireno. Mwanamume huyo alikuwa pia amefiwa na mwana wake mpendwa. Raúl alimwomba asome ukurasa wa lugha ya Kireno katika kijitabu hicho. Baada ya kusoma, mwanamume huyo alisema kwamba alitaka kujifunza zaidi kuhusu Biblia, naye akakubali funzo la Biblia.

Raúl ametumia kijitabu hicho (Good News for People of All Nations) kutoa ushahidi kwa wale wanaozungumza Kiajemi, Kiarmenia, Kichina, Kifaransa, Kihindi, Kiingereza, Kijerumani, Kikorea, Kimixe, Kirusi, na Kizapoteki. Anasema hivi: “Nimeona jinsi lilivyo jambo la maana kutumia kifaa hicho katika huduma yangu. Kinanisaidia kugusa mioyo ya watu hata ikiwa sizungumzi lugha yao.”

Kwa kuwa watu wengi wanasafiri na kuishi nchi za ng’ambo, tuna nafasi nyingi zaidi za kukutana na wale ambao wanazungumza lugha nyingine. Tunaweza kuwahubiria ujumbe wa Ufalme kwa kutumia kijitabu hicho. Je, unakibeba?

[Picha katika ukurasa wa 32]

Raúl akiwa na kijitabu ambacho kinamsaidia kugusa mioyo ya watu