“Jinsi Ninavyoipenda Sheria Yako!”

ZABURI ya 119 ni wimbo unaoonyesha jinsi mtungaji wake alivyohisi kuhusu ujumbe au neno la Mungu lililoongozwa kwa roho yake. Mtungaji huyo anaimba hivi: “Moyoni mwangu nimeweka hazina ya maneno yako.” “Nitazipenda sheria zako.” “Nafsi yangu imepondeka kwa kutamani maamuzi yako ya hukumu wakati wote.” “Ninavipenda vikumbusho vyako.” “Nimeyatamani maagizo yako.” “Nitapendezwa na amri zako ambazo nimezipenda.” “Nitajishughulisha mwenyewe na masharti yako.” “Jinsi ninavyoipenda sheria yako! Ndiyo ninayoihangaikia mchana kutwa.”—Zaburi 119:11, 16, 20, 24, 40, 47, 48, 97.

Mtunga-zaburi alithamini kama nini Neno la Mungu lililofunuliwa! Je, hivyo ndivyo unavyohisi kuhusu ujumbe wa Neno la Mungu, Biblia? Je, ungependa kusitawisha upendezi huo? Ikiwa ndivyo, unahitaji kwanza kuwa na zoea la kusoma Biblia kwa ukawaida, ikiwezekana kila siku. Yesu Kristo alisema: “Mwanadamu ataishi, si kwa mkate tu, bali kwa kila neno linalotoka katika kinywa cha Yehova.” (Mathayo 4:4) Pili, unapaswa kutafakari mambo unayosoma. Kufikiria kweli kumhusu Mungu, sifa zake, mapenzi yake, na kusudi lake kutakufanya uithamini Biblia zaidi. (Zaburi 143:5) Na tujitahidi kabisa kutumia mashauri yake mazuri kila siku.—Luka 11:28; Yohana 13:17.

Utafaidikaje kwa kusitawisha upendezi kwa ajili ya yale ambayo Biblia inasema? Zaburi 119:2 inasema: “Wenye furaha ni wale wanaoshika vikumbusho [vya Mungu].” Vikumbusho vinavyopatikana katika Biblia vitakusaidia ukabiliane vyema na matatizo maishani. (Zaburi 1:1-3) Utapata hekima, ufahamu, na uelewaji, ambao utakusaidia ‘kuzuilia mbali miguu yako kutoka katika kila pito baya.’ (Zaburi 119:98-101) Kujua ukweli kumhusu Mungu na kusudi lake kwa ajili ya dunia, kutakufanya uwe na kusudi maishani na kukupa tumaini la wakati ujao.—Isaya 45:18; Yohana 17:3; Ufunuo 21:3, 4.

Mashahidi wa Yehova wanataka sana kuwasaidia wengine kuijua Biblia vizuri zaidi na kusitawisha upendezi kwa ajili ya ujumbe wake. Tunakukaribisha kwa uchangamfu ukubali mwaliko unaofuata.