Epuka Ibada ya Uwongo!
Epuka Ibada ya Uwongo!
“‘Tokeni katikati yao, na mjitenge,’ asema Yehova, ‘na mwache kugusa kitu kilicho najisi.’”—2 WAKORINTHO 6:17.
1. Watu wengi wenye nia nzuri wanahitaji kujua mambo gani?
WATU wengi wenye nia nzuri hawajui ukweli kumhusu Mungu na wakati ujao wa wanadamu. Wamechanganyikiwa kabisa na hawana uhakika kwa kuwa hawajapata majibu kwa maswali yanayowasumbua sana. Mamilioni ya watu ni watumwa wa ushirikina, desturi, na sherehe zinazomchukiza Muumba wetu. Yaelekea kwamba una majirani na watu wa ukoo wanaoamini kwamba kuna moto wa mateso, Mungu wa utatu, kutokufa kwa nafsi, au fundisho lingine la uwongo.
2. Viongozi wa kidini wamefanya nini, na matokeo yamekuwa nini?
2 Ni nini kinachosababisha giza hilo la kiroho lililoenea sana? Inashangaza kwamba ni dini, hasa mashirika ya kidini na viongozi wa kidini ambao wanaendeleza mafundisho yasiyopatana na maoni ya Mungu. (Marko 7:7, 8) Hivyo, watu wengi wamedanganywa kuamini kwamba wanamwabudu Mungu wa kweli, na kumbe wanamchukiza. Dini za uwongo hasa ndizo zimesababisha hali hiyo ya kusikitisha.
3. Ni nani hasa anayeeneza dini za uwongo, naye anafafanuliwaje katika Biblia?
3 Kuna mtu fulani anayeendeleza ibada ya uwongo. Mtume Paulo alisema hivi alipozungumza kuhusu mtu huyo: “Mungu wa mfumo huu wa mambo amezipofusha akili za wasioamini, ili nuru ya habari njema yenye utukufu juu ya Kristo, aliye mfano wa Mungu, isipenyeze mwangaza.” (2 Wakorintho 4:4) “Mungu wa mfumo huu wa mambo” si mwingine ila Shetani Ibilisi. Yeye hasa ndiye anayeeneza ibada ya uwongo. Paulo aliandika hivi: “Shetani mwenyewe huendelea kujigeuza mwenyewe kuwa malaika wa nuru. Kwa hiyo si jambo kubwa kama wahudumu wake wakiendelea pia kujigeuza wenyewe kuwa wahudumu wa uadilifu.” (2 Wakorintho 11:14, 15) Shetani hufanya mambo mabaya yaonekane kuwa mazuri, naye huwapotosha watu waamini uwongo.
4. Sheria ya Mungu kwa taifa la kale la Israeli ilisema nini kuhusu manabii wa uwongo?
4 Basi, si ajabu kwamba Biblia inashutumu vikali dini za uwongo! Kwa mfano, Sheria ya Musa iliwaonya waziwazi watu wa Mungu kuhusu manabii wa uwongo. Mtu yeyote aliyeeneza mafundisho yasiyo ya kweli na ibada ya miungu ya uwongo alipaswa ‘kuuawa kwa sababu ya kusema maasi juu ya Yehova.’ Waisraeli waliamuriwa ‘waondolee mbali kilicho kiovu kutoka katikati yao.’ (Kumbukumbu la Torati 13:1-5) Naam, Yehova huona ibada ya uwongo kuwa uovu.—Ezekieli 13:3.
5. Tunapaswa kutii maonyo gani leo?
5 Kama vile Yehova, Yesu Kristo na mitume wake pia walichukia dini za uwongo. Yesu aliwaonya wanafunzi wake hivi: “Jihadharini na manabii wa uwongo ambao wanakuja kwenu katika mavazi ya kondoo, lakini ndani wao ni mbwa-mwitu wenye kunyafua.” (Mathayo 7:15; Marko 13:22, 23) Paulo aliandika kwamba “ghadhabu ya Mungu inafunuliwa kutoka mbinguni juu ya watu wote wasiomwogopa Mungu na wasio waadilifu ambao wanaikandamiza kweli.” (Waroma 1:18) Ni muhimu sana Wakristo wa kweli watii maonyo hayo na kumwepuka mtu yeyote anayeikandamiza kweli ya Neno la Mungu au anayeeneza mafundisho ya uwongo!—1 Yohana 4:1.
Toka Katika “Babiloni Mkubwa”
6. “Babiloni Mkubwa” anafafanuliwaje katika Biblia?
6 Fikiria jinsi kitabu cha Biblia cha Ufunuo kinavyofafanua dini za uwongo. Dini hizo zinafananishwa na kahaba aliyelewa ambaye ana mamlaka juu ya falme nyingi na watu wa falme hizo. Mwanamke huyo wa mfano anafanya uasherati na wafalme wengi, naye amelewa kwa damu ya waabudu wa kweli wa Mungu. (Ufunuo 17:1, 2, 6, 18) Ana jina lililoandikwa juu ya paji la uso wake ambalo linapatana na mwenendo wake mchafu wenye kuchukiza. Jina hilo ni “Babiloni Mkubwa, mama wa makahaba na wa machukizo ya dunia.”—Ufunuo 17:5.
7, 8. Dini za uwongo zimefanyaje ukahaba, na matokeo yamekuwa nini?
7 Mambo ambayo Maandiko yanasema kuhusu Babiloni Mkubwa yanafaa kabisa dini zote za uwongo ulimwenguni. Ingawa maelfu ya dini zilizopo hazijaunganishwa rasmi kuwa shirika moja la ulimwengu, zina umoja katika kusudi na matendo. Kama inavyoonyeshwa na yule mwanamke mwasherati wa Ufunuo, dini za uwongo zina uvutano mkubwa sana juu ya serikali mbalimbali. Dini za uwongo ni kama mwanamke ambaye si mwaminifu kwa nadhiri zake za ndoa, na zimefanya ukahaba kwa kufanya mapatano pamoja na serikali nyingi. Mwanafunzi Yakobo aliandika hivi: “Enyi wazinzi, je, hamjui kwamba urafiki na ulimwengu ni uadui na Mungu? Kwa hiyo, yeyote anayetaka kuwa rafiki ya ulimwengu anajifanya kuwa adui ya Mungu.”—Yakobo 4:4.
8 Wanadamu wameteseka sana kwa sababu ya mapatano hayo kati ya dini za uwongo na serikali mbalimbali. Mchanganuzi mmoja wa siasa za Afrika, Dakt. Xolela Mangcu, alisema kwamba “historia ya ulimwengu imejaa mifano chungu nzima ya mauaji ya watu wengi yaliyosababishwa kwa kuchanganya dini na siasa.” Hivi karibuni, gazeti moja lilisema hivi: “Leo, migogoro hatari zaidi na yenye umwagaji mwingi zaidi wa damu . . . ni ile inayosababishwa na dini.” Mamilioni ya watu wameuawa katika mapambano yaliyoungwa mkono na dini. Babiloni Mkubwa hata amewatesa na kuwaua watumishi wa kweli wa Mungu. Hivyo, ni kana kwamba amelewa kwa damu yao.—Ufunuo 18:24.
9. Kitabu cha Ufunuo kinaonyeshaje kwamba Yehova anachukia ibada ya uwongo?
9 Mambo ambayo yatampata Babiloni Mkubwa yanaonyesha waziwazi kwamba Yehova anachukia ibada ya uwongo. Andiko la Ufunuo 17:16 linasema hivi: “Zile pembe kumi ulizoona, na yule mnyama-mwitu, hawa watamchukia yule kahaba na kumfanya kuwa ukiwa na uchi, nao watakula sehemu zake zenye nyama na kumteketeza kabisa kwa moto.” Kwanza, mnyama-mwitu mkubwa anamshambulia na kumuua na kula nyama yake. Kisha, sehemu zake zilizobaki zinateketezwa kabisa. Vivyo hivyo, hivi karibuni serikali za ulimwengu zitachukua hatua kama hiyo dhidi ya dini za uwongo. Mungu atachochea serikali hizo zifanye hivyo. (Ufunuo 17:17) Babiloni Mkubwa, milki ya ulimwengu ya dini za uwongo, ataharibiwa. “Hatapatikana tena.”—Ufunuo 18:21.
10. Tunapaswa kuonaje dini za uwongo?
10 Waabudu wa kweli wanapaswa kumwonaje Babiloni Mkubwa? Biblia inaamuru hivi waziwazi: “Tokeni kwake, watu wangu, ikiwa hamtaki kushiriki pamoja naye dhambi zake, na ikiwa hamtaki kupokea sehemu ya mapigo yake.” (Ufunuo 18:4) Ni lazima wale wanaotaka kuokoka watoke katika dini za uwongo kabla haijawa kuchelewa mno. Alipokuwa duniani, Yesu Kristo alitabiri kwamba katika siku za mwisho, wengi wangedai kwamba wanamfuata. (Mathayo 24:3-5) Atawaambia hivi watu hao: “Sikuwajua ninyi kamwe! Ondokeni kwangu, ninyi wenye matendo ya uasi-sheria.” (Mathayo 7:23) Mfalme aliyetawazwa, Yesu Kristo, amekataa katakata dini za uwongo.
Tunaweza Kuepukaje Ibada ya Uwongo?
11. Tunapaswa kufanya nini ili kuepuka ibada ya uwongo?
11 Wakristo wa kweli huepuka ibada ya uwongo na kukataa mafundisho ya dini za uwongo. Hilo linamaanisha kwamba tuepuke kusikiliza au kutazama vipindi vya kidini kwenye redio au televisheni na vilevile tuepuke kusoma vitabu vya kidini vinavyoeneza uwongo kuhusu Mungu na Neno lake. (Zaburi 119:37) Pia, ni jambo la hekima tuepuke kushiriki katika shughuli za kijamii na tafrija zinazogharimiwa na shirika lolote linalohusiana na dini za uwongo. Isitoshe, sisi hatuungi mkono ibada ya uwongo kwa njia yoyote ile. (1 Wakorintho 10:21) Kufanya hivyo hutulinda tusichukuliwe na mtu yeyote “kama windo lake kupitia falsafa na udanganyifu mtupu kulingana na pokeo la wanadamu, kulingana na mambo ya msingi ya ulimwengu na si kulingana na Kristo.”—Wakolosai 2:8.
12. Mtu anaweza kufanya nini ili kuacha kabisa kushirikiana na dini za uwongo?
12 Namna gani ikiwa mtu anayetaka kuwa Shahidi wa Yehova bado amejiandikisha katika dini fulani ya uwongo? Kwa kawaida, barua ya kujiuzulu huonyesha kwamba mtu hataki tena kuonwa kuwa mshiriki wa dini ya uwongo. Ni muhimu sana mtu huyo achukue hatua madhubuti na kuepuka kabisa kutochafuliwa kiroho kwa njia yoyote na ibada ya uwongo. Matendo ya mtu huyo anayetaka kuwa Shahidi yanapaswa kuwaonyesha wazi washiriki wa dini hiyo na watu wengine kwamba ameacha kushirikiana nayo.
13. Biblia inatoa shauri gani kuhusu umuhimu wa kuepuka ibada ya uwongo?
13 Mtume Paulo aliandika hivi: “Msifungwe nira isivyo sawa pamoja na wasio waamini. Kwa maana kuna ushirika gani kati ya uadilifu na uasi-sheria? Au nuru ina ushirika gani na giza? Na zaidi, kuna upatano gani kati ya Kristo na Beliali? Au mtu mwaminifu ana fungu gani na asiye mwamini? Na hekalu la Mungu lina upatano gani na sanamu? . . . ‘Kwa hiyo tokeni katikati yao, na mjitenge,’ asema Yehova, ‘na mwache kugusa kitu kilicho najisi.’” (2 Wakorintho 6:14-17) Tunatii maneno hayo kwa kuepuka ibada ya uwongo. Je, shauri la Paulo linamaanisha pia tuwaepuke waabudu wa uwongo?
“Endeleeni Kutembea kwa Hekima”
14. Je, ni lazima tuwaepuke kabisa wale wanaoshiriki ibada ya uwongo? Eleza.
14 Je, waabudu wa kweli wanapaswa kuwaepuka kabisa watu wanaoshiriki ibada ya uwongo? Je, tunapaswa kujitenga kabisa na wale wasioamini mambo tunayoamini? Hapana. Amri ya pili kati ya zile amri mbili kubwa zaidi inasema: “Mpende jirani yako kama wewe mwenyewe.” (Mathayo 22:39) Bila shaka, sisi huonyesha kwamba tunawapenda jirani zetu kwa kuwahubiria habari njema ya Ufalme. Pia, tunaonyesha kwamba tunawapenda kwa kujifunza Biblia pamoja nao na kuwaeleza kwamba wanahitaji kuepuka ibada ya uwongo.
15. Ni nini maana ya ‘kutokuwa sehemu ya ulimwengu’?
15 Ingawa sisi huwahubiria jirani zetu habari njema, sisi “si sehemu ya ulimwengu” kwa sababu sisi ni wafuasi wa Yesu. (Yohana 15:19) Hapa, neno “ulimwengu” linamaanisha jamii ya wanadamu iliyojitenga na Mungu. (Waefeso 4:17-19; 1 Yohana 5:19) Sisi si sehemu ya ulimwengu katika maana ya kwamba sisi huepuka mitazamo, maneno, na mwenendo unaomchukiza Yehova. (1 Yohana 2:15-17) Isitoshe, kupatana na ile kanuni inayosema kwamba “mashirika mabaya huharibu tabia nzuri,” sisi huepuka urafiki wa karibu pamoja na wale wasiofuata kanuni za Kikristo maishani. (1 Wakorintho 15:33) Kutokuwa sehemu ya ulimwengu kunamaanisha kuendelea kuwa “bila doa kutokana na ulimwengu.” (Yakobo 1:27) Hivyo, kutokuwa sehemu ya ulimwengu hakumaanishi kwamba tuwaepuke kabisa watu wengine.—Yohana 17:15, 16; 1 Wakorintho 5:9, 10.
16, 17. Wakristo wanapaswa kuwatendeaje wale ambao hawajui kweli za Biblia?
16 Basi, tunapaswa kuwatendeaje wale ambao hawajui kweli za Biblia? Paulo aliliandikia kutaniko la Kolosai hivi: “Endeleeni kutembea kwa hekima kuelekea wale walio nje, mkijinunulia wakati unaofaa. Maneno yenu na yawe yenye neema sikuzote, yenye kukolezwa chumvi, ili mjue jinsi mnavyopaswa kumjibu kila mtu.” (Wakolosai 4:5, 6) Mtume Petro aliandika hivi: “Mtakaseni Kristo kuwa Bwana katika mioyo yenu, sikuzote mkiwa tayari kujitetea mbele ya kila mtu ambaye hutaka kutoka kwenu sababu ya tumaini lililo ndani yenu, lakini mkifanya hivyo kwa tabia-pole na heshima kubwa.” (1 Petro 3:15) Paulo aliwashauri Wakristo “wasiseme vibaya juu ya yeyote, wasiwe wataka-vita, wawe wenye usawaziko, wakionyesha upole wote kuelekea watu wote.”—Tito 3:2.
17 Tukiwa Mashahidi wa Yehova, sisi huepuka kuwatendea wengine kwa ukali au kwa ujeuri. Sisi hatutumii maneno ya dharau tunapozungumza kuhusu watu wa dini nyingine. Badala yake, sisi huwa wenye busara, hata ikiwa mwenye nyumba, jirani, au mfanyakazi mwenzetu hatutendei kwa fadhili au anatutukana.—Wakolosai 4:6; 2 Timotheo 2:24.
“Endelea Kushika Kielelezo cha Maneno Yenye Afya”
18. Wale wanaorudia ibada ya uwongo hupatwa na hali gani ya kiroho yenye kusikitisha?
18 Inasikitisha sana wakati mtu anaporudia ibada ya uwongo baada ya kujifunza kweli za Biblia! Biblia inafafanua matokeo yenye kusikitisha ya kufanya hivyo inaposema hivi: “Hakika ikiwa, baada ya kuponyoka kutoka katika mambo ya unajisi ya ulimwengu kwa ujuzi sahihi juu ya Bwana na Mwokozi Yesu Kristo, wanajiingiza tena katika mambo haya na kushindwa, hali ya mwisho imekuwa mbaya zaidi kwao kuliko ile ya kwanza. . . . Neno la methali ya kweli limewapata: ‘Mbwa ameyarudia matapiko yake mwenyewe, na nguruwe aliyeoshwa amerudi kugaagaa katika matope.’”—2 Petro 2:20-22.
19. Kwa nini ni muhimu tuwe macho kutambua jambo lolote ambalo linaweza kuhatarisha hali yetu ya kiroho?
19 Tunapaswa kuwa macho kutambua jambo lolote ambalo linaweza kuhatarisha hali yetu ya kiroho. Hatari zipo sikuzote! Mtume Paulo anaonya hivi: “Neno lililoongozwa na roho linasema kwa hakika kwamba katika vipindi vya nyakati za mwisho wengine wataanguka kutoka kwenye imani, wakisikiliza maneno yaliyoongozwa kwa roho yenye kupotosha na mafundisho ya roho waovu.” (1 Timotheo 4:1) Tunaishi katika “vipindi vya nyakati za mwisho.” Wale ambao hawaepuki ibada ya uwongo wanaweza ‘kurushwa huku na huku kama kwa mawimbi na kuchukuliwa huku na huku na kila upepo wa fundisho kupitia udanganyifu wa watu, kwa njia ya ujanja katika kutunga kosa.’—Waefeso 4:13, 14.
20. Tunaweza kujilindaje na uvutano mbaya wa dini za uwongo?
20 Tunaweza kujilindaje na uvutano mbaya wa dini za uwongo? Fikiria mambo yote ambayo Yehova ameandaa. Tuna Neno la Mungu, Biblia. (2 Timotheo 3:16, 17) Pia, Yehova ameandaa chakula kingi cha kiroho kupitia “mtumwa mwaminifu na mwenye busara.” (Mathayo 24:45) Tunaposonga mbele katika kweli, je, hatupaswi kusitawisha hamu kwa ajili ya ‘chakula kigumu cha watu wakomavu’ na kutamani kukutana pamoja mahali ambapo tunajifunza kweli za kiroho? (Waebrania 5:13, 14; Zaburi 26:8) Acheni tuazimie kutumia maandalizi ya Yehova kwa ukamili ili tuweze ‘kuendelea kushika kielelezo cha maneno yenye afya’ ambayo tumesikia. (2 Timotheo 1:13) Tukifanya hivyo, tutafaulu kuepuka ibada ya uwongo.
Umejifunza Nini?
• “Babiloni Mkubwa” ni nini?
• Tunapaswa kufanya nini ili kuepuka dini za uwongo?
• Tunapaswa kuepuka mambo gani yanayoweza kuhatarisha hali yetu ya kiroho?
[Maswali ya Funzo]
[Picha katika ukurasa wa 28]
Je, unajua ni kwa nini “Babiloni Mkubwa” anafananishwa na mwanamke mwasherati?
[Picha katika ukurasa wa 29]
“Babiloni Mkubwa” ataharibiwa
[Picha katika ukurasa wa 31]
Sisi huwa wenye “tabia-pole na heshima kubwa” kuwaelekea wale wasioamini mambo tunayoamini