Jinsi Wengine Wanavyokumbukwa

MIAKA elfu tatu hivi iliyopita, Daudi alikuwa anamkimbia Mfalme Sauli wa Israeli. Daudi alituma watu kwa Nabali, mfugaji tajiri wa kondoo na mbuzi, akiomba chakula na maji. Kwa kweli, Nabali alipaswa kuonyesha Daudi na wafuasi wake fadhili kwa sababu walilinda mifugo yake. Hata hivyo, Nabali hakuwaonyesha ukarimu wowote. Hata aliwakemea kwa ukali wanaume wa Daudi. Nabali alikuwa anacheza na moto, kwa kuwa Daudi hakuwa mtu wa kuchezewa.—1 Samweli 25:5, 8, 10, 11, 14.

Mtazamo wa Nabali haukupatana na desturi ya Mashariki ya Kati ya kuwaonyesha wageni ukarimu. Kwa hiyo, Nabali alijifanyia jina la aina gani? Biblia inasema kwamba alikuwa “hana adabu [“mkali,” NW], tena mwovu katika matendo yake” na “mtu asiyefaa kabisa.” Jina lake linamaanisha “mpumbavu,” naye kwa kweli alionyesha sifa hizo mbaya. (1 Samweli 25:3, 17, 25) Je, ungependa kukumbukwa hivyo? Je, wewe huwa mkali na mwenye hasira unaposhughulika na wengine, hasa ikiwa wanaonekana kuwa dhaifu? Au je, wewe ni mwenye fadhili, mkarimu, na anayewajali wengine?

Abigaili—Mwanamke Mwenye Busara

Kwa sababu ya ukali wake, Nabali alikuwa taabani. Daudi na wanaume wake 400 walijifunga panga viunoni na kutoka kwenda kumwadhibu Nabali. Abigaili, mke wa Nabali, alisikia yaliyokuwa yametokea. Akajua kwamba mapigano yalikuwa karibu kutukia. Angefanya nini? Aliharakisha kutayarisha chakula kingi na maandalizi mengine naye akatoka kukutana na Daudi na wanaume wake. Alipokutana nao, alimsihi Daudi asimwage damu bure. Moyo wa Daudi ukapoa. Akasikiliza maombi yake na kutulia. Muda mfupi baada ya matukio hayo, Nabali alikufa. Daudi alimwoa Abigaili baada ya kutambua sifa zake nzuri.—1 Samweli 25:14-42.

Abigaili alijifanyia sifa ya aina gani? Alikuwa na “akili njema,” kama Kiebrania cha awali kinavyolieleza neno hilo. Bila shaka alikuwa mwenye hekima na busara naye alijua jinsi na wakati wa kuchukua hatua. Alitenda kwa uaminifu ili kulinda mume wake mpumbavu na watu wa nyumbani mwake wasipatwe na msiba. Mwishowe Abigaili alikufa, lakini akiwa na sifa nzuri ya kuwa mwanamke mwenye busara.—1 Samweli 25:3.

Petro Anakumbukwa kwa Sifa Gani?

Na tuwafikirie mitume 12 wa Yesu katika karne ya kwanza W.K. Bila shaka, Petro au Kefa aliyekuwa mvuvi kutoka Galilaya, alikuwa mmoja wa wanafunzi wa Yesu mwenye kujieleza waziwazi na aliyetenda mambo hara ka-haraka. Yaonekana alikuwa mtu hodari asiyeogopa kueleza hisia zake. Kwa mfano, wakati mmoja Yesu aliosha miguu ya wanafunzi wake. Petro aliitikiaje ilipofika zamu yake ya kuoshwa miguu?

Petro alimwambia Yesu: “Bwana, je, wewe unaosha miguu yangu?” Yesu akamjibu: “Kile ninachofanya wewe hukielewi wakati wa sasa, bali utaelewa baada ya mambo haya.” Petro akamwambia: “Hakika wewe hutaosha kamwe miguu yangu.” Ona jinsi Petro alivyozungumza kwa mkazo, lakini akatenda kwa haraka-haraka. Yesu aliitikiaje?

Yesu akamjibu: “Isipokuwa nikuoshe, wewe huna sehemu pamoja na mimi.” Simoni Petro akamwambia: “Bwana, si miguu yangu tu, bali pia mikono yangu na kichwa changu.” Sasa Petro anapita mipaka! Lakini wakati wote watu walijua mtazamo wake. Hakuwa na hila.—Yohana 13:6-9.

Petro anakumbukwa pia kwa udhaifu wake ulio kawaida ya wanadamu. Kwa mfano, alimkana Kristo mara tatu mbele ya watu ambao walimshtaki kuwa mfuasi wa Yesu Mnazareti aliyehukumiwa. Petro alipotambua makosa yake, alilia kwa uchungu mwingi. Hakuogopa kuonyesha sikitiko na majuto yake. Ni muhimu pia kwamba habari hii ya Petro kuhusu kumkana Yesu iliandikwa na waandikaji wa Injili—huenda Petro mwenyewe ndiye aliyewapa habari hiyo! Alikuwa mnyenyekevu kiasi cha kukubali makosa yake. Je, wewe una sifa hiyo nzuri?—Mathayo 26:69-75; Marko 14:66-72; Luka 22:54-62; Yohana 18:15-18, 25-27.

Majuma kadhaa baada ya kumkana Kristo, Petro akiwa amejawa na roho takatifu,  aliuhubiria kwa ujasiri umati wa Wayahudi wakati wa Pentekoste. Huo ulikuwa wonyesho hakika kwamba Yesu aliyefufuliwa alimtumaini.—Matendo 2:14-21.

Pindi nyingine Petro alianguka katika mtego mwingine. Mtume Paulo alieleza kwamba kabla ya ndugu fulani Wayahudi kufika Antiokia, Petro alichangamana waziwazi na waamini wasio Wayahudi. Lakini Petro alijitenga nao “kwa kuwahofu hao wa tabaka ya waliotahiriwa” ambao walikuwa wamefika kutoka Yerusalemu. Paulo alifunua kwamba Petro hakuwa na msimamo.—Wagalatia 2:11-14.

Hata hivyo, ilipoonekana kwamba wafuasi wa Yesu walitaka kumwacha, ni nani kati yao aliyezungumza kwa ujasiri wakati huo mgumu? Huo ulikuwa wakati Yesu alipofunua jambo jipya kuhusu umuhimu wa kula mwili wake na kunywa damu yake. Alisema: “Msipoula mwili wa Mwana wa binadamu na kunywa damu yake, hamna uhai katika nyinyi wenyewe.” Wengi wa wafuasi wa Yesu waliokuwa Wayahudi walikwazika na kusema: “Usemi huu unashtua; ni nani ambaye aweza kuusikiliza?” Ikawaje? “Kwa sababu ya hili wengi wa wanafunzi wake wakaenda zao kwenye mambo yaliyo nyuma wakawa hawatembei tena pamoja naye.”—Yohana 6:50-66.

Wakati huo mgumu, Yesu aliwageukia wale mitume 12 na kuwauliza: “Nyinyi hamtaki kwenda pia, je, mwataka?” Petro akamjibu: “Bwana, tutaenda zetu kwa nani? Wewe una semi za uhai udumuo milele; na sisi tumeamini na tumekuja kujua kwamba wewe ndiwe Mtakatifu wa Mungu.”—Yohana 6:67-69.

Petro alijifanyia sifa ya aina gani? Mtu anayesoma habari kumhusu atavutiwa na unyoofu wake, uaminifu wake, hali yake ya kusema mambo waziwazi, na kuwa tayari kukubali udhaifu wake. Petro alijifanyia jina zuri sana.

Watu Wanakumbuka Nini Kumhusu Yesu?

Huduma ya Yesu duniani ilikuwa ya miaka mitatu na nusu tu. Lakini anakumbukwaje na wafuasi wake? Je, alikuwa mtu asiyefikika kwa sababu alikuwa mkamilifu na bila dhambi? Je, alipiga ubwana kwa sababu alijua kwamba yeye ni Mwana wa Mungu? Je, aliwaogopesha au kuwalazimisha wafuasi wake wamtii? Je, alifikiria sana jinsi alivyoonekana hivi kwamba hakuwa mcheshi? Je, alikuwa na shughuli nyingi sana hivi kwamba hakuwa na wakati kwa walio dhaifu na wagonjwa, au watoto? Je, aliwadharau wanawake na watu wa jamii zingine, kama ilivyokuwa kawaida ya wanaume wengi wakati huo? Tunajifunza nini kutokana na mambo yaliyoandikwa kumhusu?

Yesu alipendezwa na watu. Tunapochunguza huduma yake tunaona kwamba mara nyingi aliwaponya vilema na wagonjwa. Alijitahidi sana kuwasaidia wenye uhitaji. Alipendezwa na watoto, naye aliwaambia wanafunzi wake: “Waacheni watoto wachanga waje kwangu; msijaribu kuwakomesha.” Kisha Yesu “akachukua watoto akawakumbatia na kuanza kuwabariki, akiweka mikono yake juu yao.” Je, wewe hutafuta wakati wa kuwa pamoja na watoto, au una shughuli nyingi sana hivi kwamba hata huwaoni? —Marko 10:13-16; Mathayo 19:13-15.

Yesu alipokuwa duniani, Wayahudi walikuwa wamelemewa na amri na kanuni ambazo zilipita matakwa ya Sheria. Viongozi wao wa kidini waliwatwika mizigo mizito, ambayo wao wenyewe hawakuisogeza kwa kimoja cha vidole vyao. (Mathayo 23:4; Luka 11:46) Yesu alikuwa tofauti sana. Alisema: “Njoni kwangu, nyinyi nyote mnaomenyeka na kulemezwa mizigo, nami hakika nitawaburudisha nyinyi.”—Mathayo 11:28-30.

Watu waliburudika waliposhirikiana na Yesu. Hakuwaogopesha wanafunzi wake wasiweze kujieleza. Kwa kweli, aliwauliza maswali ili kuwatia moyo wajieleze. (Marko 8:27-29) Inafaa waangalizi Wakristo wajiulize: ‘Je, waamini wenzangu wananiona hivyo? Je, kweli wazee wengine hu nieleza maoni yao, au husita kufanya hivyo?’ Inaburudisha kama nini waangalizi wanapokuwa wenye kufikika, wenye kuwasikiliza wengine, na wasio wagumu! Kukosa busara huwavunja wengine moyo wasizungumze kwa uhuru na kwa wazi.

Ingawa Yesu ni Mwana wa Mungu, hakutumia vibaya uwezo wala mamlaka yake. Lakini alijadiliana na wasikilizaji wake. Ilikuwa hivyo Mafarisayo walipojaribu kumnasa kwa swali hili la hila: “Je, yaruhusika kisheria kumlipa Kaisari kodi ya kichwa au la?” Yesu aliwaambia wamwonyeshe sarafu naye akawauliza: “Sanamu na mwandiko huu ni wa nani?” Wakasema, “Wa Kaisari.” Ndipo akawaambia: “Basi, mlipeni Kaisari vitu vya Kaisari, lakini mlipeni Mungu vitu vya Mungu.” (Mathayo 22:15-21) Alihitaji tu kujadiliana nao kwa akili ili kujibu swali lao.

Je, Yesu alikuwa mcheshi? Huenda wasomaji wengine wakaona ucheshi wa aina fulani wanaposoma mahali ambapo Yesu alisema kwamba ni rahisi zaidi ngamia kupita katika tundu la sindano kuliko mtu tajiri kuingia katika Ufalme wa Mungu. (Mathayo 19:23, 24) Wazo lenyewe la ngamia kujaribu kupita katika tundu la sindano halisi ya kushona limetiwa chumvi. Mfano mwingine wa utiaji chumvi ni ule wa kuona unyasi katika jicho la ndugu na usione boriti katika jicho lako mwenyewe. (Luka 6:41, 42) Kwa kweli, Yesu hakuwa mshauri mkali bali alikuwa mchangamfu na mwenye urafiki. Kwa Wakristo leo, ucheshi unaweza kupunguza huzuni wakati wa msiba.

Yesu Aliwahurumia Wanawake

Wanawake walihisije walipokuwa na Yesu? Bila shaka, Yesu alikuwa na wafuasi wengi wanawake waliokuwa waaminifu, waliotia ndani Maria, mama yake. (Luka 8:1-3; 23:55, 56; 24:9, 10) Wanawake walijihisi huru kumwendea Yesu hivi kwamba pindi moja mwanamke fulani ‘aliyejulikana kuwa mtenda-dhambi’ alimwosha miguu kwa machozi na kuipaka mafuta yenye marashi. (Luka 7:37, 38) Mwanamke mwingine aliyetokwa damu kwa miaka mingi, alijikakamua kupita katikati ya watu ili kugusa vazi lake na kuponywa. Yesu alisifu imani yake. (Mathayo 9:20-22) Naam, wanawake walimwona Yesu kuwa mwenye kufikika.

Pindi nyingine, Yesu alizungumza na mwanamke Msamaria kwenye kisima. Alishangaa sana na kusema: “Ni jinsi gani kwamba wewe, ujapokuwa Myahudi, waniomba mimi kinywaji, wakati mimi ni mwanamke Msamaria?” Wayahudi hawakuwa na shughuli na Wasamaria. Yesu alimfunza kweli nzuri kuhusu ‘maji yanayobubujika ili kutoa uhai udumuo milele.’ Alistarehe kabisa kati ya wanawake. Hakuhisi kwamba kuongea na  wanawake kulimshushia heshima.—Yohana 4:7-15.

Yesu anakumbukwa kwa sifa ya huruma, kutia ndani roho yake ya kujidhabihu. Alikuwa mfano halisi wa upendo wa kimungu. Yesu anaweka kiwango cha kufuatwa na wote wanaotaka kuwa wafuasi wake. Wewe unafuata kwa ukaribu jinsi gani kielelezo chake?—1 Wakorintho 13:4-8; 1 Petro 2:21.

Wakristo wa Leo Hukumbukwaje?

Siku hizi maelfu ya Wakristo waaminifu wamekufa, wengi wakiwa wazee na wengine wakiwa na umri wa kadiri. Lakini wameacha sifa nzuri. Baadhi yao, kama vile Crystal, aliyekufa akiwa mzee, wanakumbukwa kwa kuwa wachangamfu na wenye shauku. Wengine kama vile Dirk, aliyekufa akiwa na umri wa miaka 43, wanakumbukwa kwa furaha yao na kwa kuwa tayari kusaidia.

Pia kuna José anayeishi Hispania. Katika miaka ya 1960, wakati kazi ya kuhubiri ya Mashahidi wa Yehova ilipokuwa imepigwa marufuku katika nchi hiyo, José alioa na kupata binti watatu. Alikuwa na kazi ya kudumu huko Barcelona. Lakini wakati huo kulikuwa na uhitaji wa wazee Wakristo wakomavu huko Hispania kusini. José aliacha kazi yake na kuhamia Málaga pamoja na familia yake. Waliishi chini ya hali ngumu sana za kiuchumi, na mara nyingi hakupata kazi ya kuajiriwa.

Hata hivyo, José alijulikana kwa kuweka kielelezo kizuri cha kuwa mwaminifu na mwenye kutegemeka katika huduma, na kwa kuwalea binti zake vizuri akisaidiwa na mke wake, Carmela aliyemwunga mkono. Kulipokuwa na uhitaji wa kupanga makusanyiko ya Kikristo katika eneo hilo, José alikuwa tayari kusaidia. Kwa kusikitisha alipokuwa na umri wa miaka 50 hivi alishikwa na ugonjwa mbaya naye akafa. Hata hivyo, anakumbukwa kwa sifa ya kuwa mzee mwenye kutegemeka na mwenye bidii na baba na mume mwenye upendo.

Kwa hiyo wewe utakumbukwaje? Kama ungalikufa jana, watu wangekuwa wanasema nini leo kukuhusu? Swali hilo linaweza kutuchochea tuboreshe matendo yetu.

Tunaweza kufanya nini ili tujifanyie sifa nzuri? Tunaweza kufanya maendeleo katika kuonyesha matunda ya roho kama vile upendo, ustahimilivu, fadhili, upole, na kujidhibiti. (Wagalatia 5:22, 23) Naam, kwa hakika “jina zuri ni jema kuliko marashi ya damani; na siku ya kufa ni njema kuliko siku ya kuzaliwa kwa mutu.” —Mhubiri 7:1, ZSB; Mathayo 7:12.

[Picha katika ukurasa wa 5]

Abigaili anakumbukwa kwa busara yake

[Picha katika ukurasa wa 7]

Petro anakumbukwa kwa kutenda mambo haraka-haraka, lakini alikuwa mnyofu

[Picha katika ukurasa wa 8]

Yesu alitafuta wakati wa kuwa pamoja na watoto