“Katika Nuru Yako Tutaona Nuru”

MARA nyingi hatutambui umuhimu wa nuru hadi umeme unapopotea halafu kunakuwa na giza. Jambo la kufurahisha ni kwamba jua, ambalo ni ‘kituo chetu cha umeme,’ ni lenye kutegemeka kabisa. Nuru ya jua hutuwezesha kuona, kula, kupumua, na kuishi.

Kwa kuwa nuru ni muhimu kwa uhai, hatupaswi kushangaa tusomapo katika kitabu cha Mwanzo kwamba nuru ilitokea siku ya kwanza ya uumbaji. “Mungu akasema, Iwe nuru; ikawa nuru.” (Mwanzo 1:3) Wanaume wenye kumwogopa Mungu kama vile Mfalme Daudi sikuzote wametambua kwamba Yehova ndiye chanzo cha uhai na nuru. “Maana kwako Wewe iko chemchemi ya uzima, katika nuru yako tutaona nuru,” akaandika Daudi.—Zaburi 36:9.

Maneno ya Daudi yanatumika kihalisi na pia kwa njia ya mfano. Kichapo Encyclopædia Britannica chasema hivi: ‘Bila shaka, tunahitaji nuru ili kuona.’ Kisha kinaongeza kusema: ‘Habari nyingi zaidi hufika kwenye ubongo wa binadamu kupitia macho, kuliko kingine chochote.’ Kwa kuwa tunajifunza mambo kupitia macho—ambayo yanahitaji nuru ili kuona vizuri—Maandiko hutaja nuru kwa njia ya mfano.

Kwa hiyo, Yesu aliwaambia wanafunzi wake hivi: “Mimi ni nuru ya ulimwengu. Yeye anifuataye mimi hatatembea kwa vyovyote katika giza, bali atakuwa na nuru ya uhai.” (Yohana 8:12) Nuru ya mfano iliyorejezewa na Yesu ni ujumbe wa kweli aliohubiri, ambao ungeweza kuangaza nuru katika akili na mioyo ya wasikilizaji wake. Baada ya kuwa katika giza la kiroho kwa miaka mingi, hatimaye wanafunzi wa Yesu wangeweza kufahamu makusudi ya Mungu kwa wanadamu na tumaini la Ufalme. Kwa kweli, hiyo ilikuwa “nuru ya uhai,” kwa kuwa ujuzi huo ungeweza kuongoza kwenye uhai udumuo milele. Katika sala aliyotoa kwa Baba yake wa kimbingu, Yesu alisema, ‘Hii yamaanisha uhai udumuo milele, wao kuendelea kutwaa ujuzi juu yako wewe, Mungu pekee wa kweli, na juu ya yule uliyemtuma, Yesu Kristo.’ (Yohana 17:3) Na tusikose kamwe kutambua umuhimu wa nuru hiyo ya kiroho!