Mtume Paulo alikuwa macho kutambua hatari ya propaganda za Shetani, lakini si Wakristo wote wa siku zake waliotambua hatari hiyo. Kwa mfano, inaelekea watu fulani huko Korintho walijiamini kupita kiasi, wakifikiri kwamba walikuwa imara sana katika kweli hivi kwamba wasiweze kuanguka. (1 Kor. 10:12) Hiyo ndiyo sababu Paulo alitoa onyo hili: “Naogopa kwamba kwa njia fulani, kama nyoka alivyomshawishi Hawa kwa ujanja wake, huenda akili zenu zikaharibiwa kutoka kwenye unyoofu wa moyo na usafi wa kiadili ambao unamfaa Kristo.”​​—2 Kor. 11:3.

Hangaiko zito la Paulo linaonyesha kwamba hakuna nafasi ya kuwa wazembe. Ili ushinde pambano la kulinda akili yako, ni lazima utambue hatari ya propaganda na ujilinde nayo.

Propaganda ni nini? Katika muktadha huu, propaganda ni habari zinazoegemea upande mmoja au zilizopotoshwa ambazo zinakusudiwa kupotosha jinsi watu wanavyofikiri na kutenda. Watu fulani husema propaganda ni “uwongo, kupotosha, kudanganya, kukosesha, kuvuruga akili [na] kukengeusha akili” na wanaihusianisha na “mbinu zinazopinda sheria, zenye madhara, na zisizo za haki.”​​—Propaganda and Persuasion.

Propaganda ni hatari kadiri gani? Kama gesi yenye sumu, isiyo na harufu, na isiyoonekana, propaganda inapenya ndani ya utu wetu kwa hila. Kwa sababu huenda tusiitambue, mtaalamu wa tabia Vance Packard anasema hivi: “Wengi wetu tunaongozwa vibaya na kupotoshwa kuliko tunavyoweza kufikiri.” Wanapoongozwa nayo, msomi mmoja anasema kwamba wanaume na wanawake “wanaongozwa kwa urahisi kufanya mambo hatari kupindukia”​​—kama vile ‘mauaji ya kimbari, vita, ubaguzi wa rangi, ubaguzi wa kidini, na tabia nyingine zisizofaa.’​​—Easily Led​​—A History of Propaganda.

Basi ikiwa wanadamu wa kawaida wanaweza kutupotosha kwa propaganda zao, Shetani anaweza kutupotosha kadiri gani? Amechunguza tabia za wanadamu tangu walipoumbwa. “Ulimwengu mzima” sasa unakaa katika nguvu zake. Anaweza kutumia sehemu yoyote ya ulimwengu kueneza uwongo wake. (1 Yoh. 5:​19; Yoh. 8:​44) Shetani amefanikiwa sana ‘kuzipofusha akili’ za watu hivi kwamba sasa ‘anaipotosha dunia nzima inayokaliwa.’ (2 Kor. 4:4; Ufu. 12:9) Unaweza kupingaje propaganda zake?

Yesu alitoa kanuni hii rahisi itakayokusaidia kupinga propaganda: ‘Ijue kweli, nayo kweli itakuweka huru.’ (Yoh. 8:​31, 32) Lakini kama mwanajeshi katika pambano, unahitaji chanzo kinachotegemeka cha habari ili kumzuia adui kuchezea akili yako, kwa kuwa mara nyingi kitu cha kwanza kinachotoweka wakati wa vita ni ukweli. Yehova ameandaa chanzo hicho. Utapata kile unachohitaji ili kupambana na propaganda za Shetani katika Biblia.​​— 2 Tim. 3:​16, 17.

Bila shaka, Shetani ambaye ni mkuu wa propaganda anajua hilo. Kwa hiyo, anatumia mfumo wake wa mambo kutuvunja moyo tusisome au kujifunza Biblia. Usikubali kudanganywa na hila zake zenye kupotosha! (Efe. 6:​11) ‘Ifahamu kabisa akilini’ kweli yote ya Biblia. (Efe. 3:​18) Unahitaji kujitahidi sana ili ufanye hivyo. Lakini kumbuka jambo hili hakika ambalo mwandishi Noam Chomsky alisema: “Hakuna mtu atakayemimina ukweli akilini mwako. Ni kitu ambacho lazima ujitafutie.” Kwa hiyo, ‘jitafutie’ kweli hizo kwa bidii kwa “[kuyachunguza] Maandiko kwa uangalifu.”​​—Mdo. 17:11.

Kumbuka kwamba Shetani hataki ufikiri vizuri au kuchanganua mambo kwa njia inayofaa. Kwa nini? Kwa sababu propaganda “inaweza kuwa na matokeo zaidi ikiwa watu . . . wanavunjwa moyo kufikiri kwa makini.” (kitabu Media and Society in the Twentieth Century) Kwa hiyo, usiridhike kamwe kusikia au kukubali tu unachoambiwa. (Met. 14:15) Tumia uwezo na nguvu zako za kufikiri ulizopewa na Mungu kufanya kweli iwe mali yako.​​—Met. 2:​10-​15; Rom. 12:​1, 2.

Wataalamu wa kupanga vita wanaweza kutumia propaganda kudhoofisha bidii na nia ya kupambana. Wanaweza kuwachochea wanajeshi maadui wapigane wao kwa wao au kuwapotosha ili wajitenge kutoka kwa kikosi kikuu cha vita. Inasemekana kwamba Jenerali Mjerumani alikiri kuwa sababu moja ya nchi yao kushindwa katika Vita vya Kwanza vya Ulimwengu ni kwamba watu “walipotoshwa na propaganda za maadui kama ambavyo sungura hupotoshwa na nyoka.” Shetani anatumia hila kama hizo kujaribu kuwatenganisha watu, kwa mfano, kwa kuchochea ugomvi miongoni mwa ndugu na dada Wakristo au kuwashawishi wajitenge na tengenezo la Yehova kwa sababu ya kudhani kwamba wametendewa isivyo haki au wamekosewa.

Usipotoshwe! Ruhusu Neno la Mungu likuongoze. Kwa mfano, katika suala la kudumisha umoja miongoni mwa ndugu na dada zako, Biblia inakutia moyo uendelee ‘kusamehe kwa hiari’ na ufanye haraka kusuluhisha kutoelewana. (Kol. 3:​13, 14; Mt. 5:​23, 24) Biblia inatuonya vikali tusijitenge na wengine kutanikoni. (Met. 18:1) Hakikisha uko tayari kupinga propaganda za Shetani. Jiulize hivi: ‘Ni nini kilichoniongoza mara ya mwisho nilipokabili hali kama hiyo? Je, ni roho ya ulimwengu au roho ya Mungu?’​​—Gal. 5:​16-​26; Efe. 2:​2, 3.

Mwanajeshi ambaye si mshikamanifu kwa kiongozi wake hawezi kupigana kwa moyo wote. Kwa hiyo, wanapropaganda hujaribu kuvunja ushikamanifu kati ya mwanajeshi na kiongozi wake na kufanya wasiaminiane. Wanaweza kutumia propaganda kama vile: “Huwezi kuwaamini viongozi wenu!” na “Usiruhusu wakuongoze vibaya na kukusababishia matatizo!” Ili kuongezea uzito mashambulizi hayo, kwa werevu wanaweza kukazia makosa ambayo viongozi hao wanafanya. Shetani hufanya hivyo. Hatakata tamaa kamwe kukufanya usiwaamini watu ambao Yehova amewaweka rasmi kuongoza mambo.

Unaweza kujilinda jinsi gani? Azimia kushikamana na tengenezo la Yehova na uwaunge mkono kwa ushikamanifu wale wanaoongoza hata iwe wanakosea kwa sababu ya kutokamilika. (1 The. 5:​12, 13) “[Usitikiswe] upesi kutoka kwenye kufikiri [kwako]” unapokabili mashambulizi yenye madhara ya waasi imani au watu wengine wanaojaribu kukudanganya, hata iwe mambo wanayosema yanaonekana kana kwamba ni ya kweli. (2 The. 2:2; Tito 1:​10) Fuata ushauri aliopewa kijana Timotheo. Shikamana na kweli uliyojifunza na ukumbuke mahali ulipojifunzia kweli hiyo. (2 Tim. 3:​14, 15) Kwa kweli, kuna uthibitisho wa kutosha unaoonyesha kwamba una sababu za kuamini njia ambayo Yehova ametumia kwa karibu miaka mia moja kutuongoza katika njia ya kweli.​​—Mt. 24:​45-​47; Ebr. 13:​7, 17.

Hata hivyo, kumbuka kwamba nyakati nyingine propaganda za Shetani huonekana waziwazi. Kwa mfano, anaweza kutumia vitisho. Hiyo ni “mojawapo ya mbinu ambayo imetumiwa kwa muda mrefu zaidi ya kueneza propaganda.” (Easily Led​​—A History of Propaganda) Profesa Mwingereza, Philip M. Taylor, aliandika kwamba Waashuru waliwashinda maadui wao kwa kutumia “sera ya vitisho pamoja na propaganda.” Shetani atatumia woga wa wanadamu, woga wa mateso, woga wa kifo, na woga mwingine wowote usiofaa ili ajaribu kukushinda na kufanya uache kumtumikia Yehova.​​—Isa. 8:​12; Yer. 42:11; Ebr. 2:​15.

Usimruhusu Shetani atumie woga kupunguza bidii yako au kuvunja utimilifu wako. Yesu alisema: “Msiwaogope wale wanaouua mwili na baada ya hilo hawawezi kufanya jambo lolote zaidi.” (Luka 12:4) Uwe na uhakika kamili katika ahadi za Yehova kwamba atakulinda, atakupatia “nguvu zinazopita zile za kawaida,” na kukusaidia kushinda mambo yoyote yanayoweza kukuogopesha ili uache kumtumikia.​​—2 Kor. 4:​7-9; 1 Pet. 3:​14.

Bila shaka, huenda ukakabili matukio yenye kuogopesha na yanayoweza kupunguza bidii yako. Lakini kumbuka maneno ya Yehova yenye kutia moyo aliyomwambia Yoshua: “Uwe hodari na mwenye nguvu. Usitetemeke wala usiwe na hofu, kwa maana Yehova Mungu wako yupo pamoja nawe kila mahali unapoenda.” (Yos. 1:9) Unapoingiwa na wasiwasi, sali kwa Yehova mara moja ukimweleza mahangaiko yako yote. Unaweza kuwa na uhakika kwamba ‘amani ya Mungu italinda moyo wako na nguvu zako za akili’ hivi kwamba utakuwa na nguvu za kupinga propaganda za Shetani.​​—Flp. 4:​6, 7, 13.

Je, unakumbuka propaganda iliyotumiwa na mjumbe Mwashuru, Rabshake, dhidi ya watu wa Mungu? Kihalisi alikuwa akisema hivi: ‘Hakuna mtu anayeweza kuwalinda kutoka kwa mkono wa Ashuru. Hata Mungu wenu, Yehova, hawezi kuwasaidia.’ Aliendelea kusema hivi kwa ujasiri: ‘Yehova mwenyewe alituambia tuharibu nchi hii.’ Yehova alijibuje madai hayo? “Usiogope kwa sababu ya maneno uliyosikia ambayo watumishi wa mfalme wa Ashuru wamesema vibaya kunihusu.” (2 Fal. 18:​22-​25; 19:6) Kisha akamtuma malaika aliyeangamiza Waashuru 185,000 kwa usiku mmoja!​—2 Fal. 19:35.

Je, umewahi kutazama sinema ambayo, ukiwa mtazamaji, unaweza kuona waziwazi kwamba mtu fulani anadanganywa au kupotoshwa? Je, ulijikuta ukiwaza hivi: ‘Usiamini! Wanakudanganya!’ Wazia basi malaika wakipaaza sauti na kukuambia maneno haya: “Usipotoshwe na uwongo wa Shetani!”

Ziba masikio yako usisikie propaganda za Shetani. (Met. 26:​24, 25) Msikilize Yehova na umtegemee katika mambo yote unayofanya. (Met. 3:​5-7) Sikiliza mwito wake wenye upendo: “Uwe na hekima, mwanangu, na kuufanya moyo wangu ushangilie.” (Met. 27:11) Hapo ndipo utakapokuwa umeshinda pambano la kulinda akili yako!