Hebu tueleze kuhusu malezi yako.

Baba yangu alikuwa injinia wa mashine. Mara nyingi, alinieleza kwa msisimuko kuhusu hesabu na sayansi. Nilipokuwa mtoto, nilipendezwa sana na mimea na wanyama waliokuwa katika vijito na vidimbwi vilivyokuwa karibu na nyumbani kwetu huko New Paris, Ohio, Marekani. Kwa sababu hiyo, nilipojiunga na Chuo Kikuu cha Purdue, niliamua kusomea ikolojia.

Je, ulipendezwa na dini?

Ndiyo. Baba alinitia moyo nijifunze kuhusu dini yetu ya Kilutheri. Nilijifunza Koine (Kigiriki cha kawaida), ambayo ni mojawapo ya lugha za kwanza zilizotumiwa kuandika Biblia. Mafunzo hayo yalifanya niiheshimu sana Biblia.

Ulikuwa na maoni gani kuhusu nadharia ya mageuzi?

Dini yangu ilikubali nadharia hiyo. Wanasayansi wenzangu waliiamini. Kwa hiyo, sikuwa na sababu ya kuwa na shaka kuihusu. Lakini pia niliamini kwamba kuna Mungu. Akilini mwangu nilijiambia kwamba imani hizo mbili zinapatana. Ingawa niliiheshimu Biblia, sikuamini kwamba ilitoka kwa Mungu.

Kwa nini ulibadili maoni yako kuhusu Biblia?

Mashahidi wawili wa Yehova, Steve na Sandy, walitutembelea mimi na mke wangu, Debbie. Walituonyesha kwamba ingawa Biblia si kitabu cha sayansi, ni sahihi kisayansi. Kwa mfano, inasema hivi kumhusu Mungu: “Kuna Yeye anayekaa juu ya mviringo wa dunia.” (Isaya 40:22) Pia inasema: ‘Anaitundika dunia pasipo na kitu.’ (Ayubu 26:7) Wakati huo, nilikuwa nikitumia picha za setilaiti kujifunza kuhusu ikolojia, kwa hiyo maandiko hayo yalinipendeza sana.  Maandiko hayo yaliandikwa zamani sana kabla ya mtu yeyote kupiga picha mviringo wa dunia ukiwa umetundikwa pasipo na kitu. Mimi na mke wangu tulipokuwa tukijifunza Biblia pamoja na Steve na Sandy, nilijifunza kuhusu unabii uliokuwa umetimia, mashauri yanayofanya kazi, na majibu ambayo yaliniridhisha. Hatua kwa hatua nilisadikishwa kwamba Biblia ni Neno la Mungu.

Ni lini ulibadili maoni yako kuhusu chanzo cha uhai?

Hatimaye, Steve alinionyesha maneno haya ya Biblia yaliyo wazi: “Yehova Mungu akamfanya mtu kutoka katika mavumbi ya nchi.” (Mwanzo 2:7) Historia ya mwanadamu wa kwanza imeandikwa katika Biblia. Hilo lilizua swali hili: Je, Biblia inapatana na mambo hakika ya kisayansi? Steve alinitia moyo nifanye utafiti kuhusu jambo hilo, nami nikafanya hivyo.

Ulijifunza nini kuhusu mageuzi?

Mambo mengi. Nikitaja tu moja, nadharia ya mageuzi inajaribu kueleza jinsi jamii mbalimbali za viumbe zilivyotokea. Viumbe hai vina viungo vinavyofanya kazi kwa usahihi kabisa kama vile moyo, mapafu, na macho. Pia tunapochunguza ndani ya chembe za mwili, tunaona mifumo iliyobuniwa kwa ustadi sana. Ubuni huo ulitoka wapi? Wanamageuzi wanadai kwamba utendaji bora uliwekwa ndani ya viumbe bora vilivyosalimika. Lakini wazo hilo halijibu swali hili: Mifumo hiyo mbalimbali ilitoka wapi? Niligundua kwamba wanasayansi wengi hawaamini kwamba nadharia ya mageuzi inaweza kujibu swali hilo. Profesa mmoja wa zuolojia aliniambia kwamba hakuamini nadharia yoyote ya mageuzi. Hata hivyo, hangeweza kuwaeleza wengine kuhusu maoni yake kwa sababu alihofia kupoteza kazi yake.

Je, ujuzi wako wa ikolojia unaimarisha imani yako?

Ndiyo. Kazi yangu ilihusisha kuchunguza jinsi viumbe hai vinavyotegemeana. Viumbe vyote hai duniani hutegemeana. Kwa mfano, fikiria maua na nyuki. Rangi, harufu, nekta, na maumbo ya maua yamekusudiwa yawavutie nyuki na kuwanyunyizia chavua. Nyuki wamekusudiwa wafyonze nekta na kubeba chavua ya ua moja hadi kwenye ua lingine ili kulitungisha. Ni wazi kwamba maua na nyuki wamekusudiwa watimiziane mahitaji yao.

Katika mfumo wa ikolojia, unaweza kuona vitu mbalimbali vikitegemeana kwa kiwango kikubwa zaidi. Mfumo wa ikolojia ni eneo lenye maelfu ya jamii za wanyama, mimea, bakteria, na kuvu. Wanyama wote hutegemea mimea ili kupata chakula na oksijeni, na mimea mingi inayoota maua hutegemea wanyama. Ingawa mifumo ya ikolojia ni tata sana na viumbe wanaoishi humo huathirika kwa urahisi, inaweza kuendelea kuwepo kwa maelfu ya miaka. Hata inapoharibiwa na uchafuzi, mara tu chanzo cha uchafuzi kinapoondolewa, mfumo tata wa ikolojia huanza kunawiri tena. Ninapofikiria uwezo wa mfumo wote wa uhai duniani wa kustahimili hali ngumu, ninasadikishwa kwamba uhai ulibuniwa na Mungu.

Kwa nini uliamua kuwa Shahidi wa Yehova?

Nilihangaishwa sana na jinsi wanadamu wanavyoharibu mazingira. Nilijua kwamba ingawa mifumo ya ikolojia ina uwezo wa kustahimili hali ngumu, inaweza kuharibiwa. Nilijifunza kutoka kwa Mashahidi wa Yehova kwamba Biblia inasema Mungu ‘atawaharibu wale wanaoiharibu dunia.’ (Ufunuo 11:18) Maneno hayo yalikuwa muhimu kwangu. Kadiri nilivyoendelea kujifunza Biblia, ndivyo nilivyotambua hatua kwa hatua kwamba tumaini linalotolewa na Biblia ni hakika.

Mimi hufurahia kuwaeleza watu mambo ninayoamini, na nimewafundisha wanasayansi fulani Biblia. Nilipofikia umri wa miaka 55, nilistaafu mapema ili niweze kutumia wakati mwingi kuwasaidia watu waelewe kuhusu Muumba wa uhai na kusudi lake kwa dunia yetu maridadi.