Maoni ya Biblia

Kwa Nini Wafuasi wa Kweli wa Yesu Wanachukiwa?

‘Watu watawatia ninyi katika dhiki na kuwaua ninyi, nanyi mtachukiwa na mataifa yote kwa sababu ya jina langu.’ —MATHAYO 24:9.

YESU alisema maneno hayo siku chache tu kabla ya kuuawa kikatili. Usiku uliotangulia kifo chake, aliwaambia hivi mitume wake waaminifu: “Ikiwa wamenitesa mimi, watawatesa ninyi pia.” (Yohana 15:20, 21) Lakini kwa nini watu wangewachukia wale ambao wanamtii Yesu na wanaojaribu kumwiga? Si Yesu alijitoa kwa ajili ya wengine, akawafariji maskini na kuwapa tumaini watu waliokandamizwa?

Biblia inafunua sababu hususa kwa nini wangechukiwa. Sababu hizo zinatuonyesha kwa nini watu wanaomfuata Kristo leo hupata upinzani mwingi kama yeye.

Huenda Wapinzani Wakatenda kwa Kutojua

Yesu aliwaambia wafuasi wake hivi: “Saa inakuja wakati ambapo kila mtu anayewaua ninyi atafikiri amemtolea Mungu utumishi mtakatifu. Lakini watafanya mambo haya kwa sababu hawamjui Baba wala hawanijui.” (Yohana 16:2, 3) Ni kweli kwamba wengi waliowatesa Wakristo walidai kuwa wanamtumikia Mungu yuleyule ambaye Yesu alitumikia, lakini waliongozwa na mafundisho na mapokeo ya dini ya uwongo. Naam, walikuwa na “bidii kwa ajili ya Mungu; lakini si kulingana na ujuzi sahihi.” (Waroma 10:2) Mmoja wa wapinzani hao alikuwa Sauli wa Tarso, ambaye baadaye alikuja kuwa mtume Mkristo Paulo.

Sauli alikuwa mshiriki wa kikundi kilichojulikana kama Mafarisayo, farakano la Kiyahudi lililokuwa na nguvu kisiasa na uvutano mkubwa ambalo lilipinga Ukristo. Sauli alikiri hivi baadaye: “Nilikuwa mkufuru na mtesaji na mtu mwenye dharau.” Pia alisema: “Nilikosa ujuzi nami nilitenda kwa ukosefu wa imani.” (1 Timotheo 1:12, 13) Hata hivyo, alipojifunza ukweli kumhusu Mungu na Mwana Wake, alibadili njia zake mara moja.

Leo pia watu ambao hapo awali waliwatesa Wakristo wamefanya mabadiliko kama hayo. Isitoshe, kama Sauli, baadhi yao wameteswa pia. Licha ya hayo, hawajalipa uovu kwa uovu bali wametii himizo hili la Yesu: “Endeleeni kuwapenda adui zenu na kusali kwa ajili ya wale wanaowatesa ninyi.” (Mathayo 5:44) Mashahidi wa Yehova hujitahidi kufuata maneno hayo, wakitumaini kwamba angalau wapinzani wengine watabadili mtazamo wao kama Sauli alivyofanya.

Wapinzani Fulani Wana Wivu

Wengi waliompinga Yesu walifanya hivyo kwa sababu ya wivu. Gavana Mroma Pontio Pilato “alijua kwamba wakuu wa makuhani walikuwa wamemtia [Yesu] mikononi mwake kwa sababu ya wivu” ili atundikwe mtini. (Marko 15:9, 10) Kwa nini viongozi wa kidini Wayahudi walimwonea Kristo wivu? Sababu moja ni kwamba Yesu alipendwa na watu wa kawaida ambao walidharauliwa na viongozi hao. Mafarisayo hao walilalamika hivi: “Ulimwengu umemfuata.” (Yohana 12:19) Vivyo hivyo, baadaye watu walipoitikia ujumbe wa wafuasi wa Kristo, wapinzani wa kidini “walijawa na wivu” na kuanza kuwapinga waeneza-injili hao Wakristo.—Matendo 13:45, 50.

Maadui wengine walichukizwa na mwenendo mzuri wa watumishi wa Mungu. Mtume Petro aliwaambia hivi Wakristo wenzake: “Kwa sababu ninyi hamwendelei kukimbia pamoja nao [waovu] katika mwendo huo kwenda kwenye dimbwi lilelile la chini la upotovu, wao wanashangaa na  kuendelea kuwatukana ninyi.” (1 Petro 4:4) Mtazamo huohuo usiofaa unaonekana leo. Bila shaka, ingawa Wakristo wa kweli huepuka mwenendo mbaya, wao hawajioni kuwa waadilifu au bora kuliko wengine. Kufanya hivyo si Ukristo, kwa kuwa wanadamu wote ni watenda dhambi na wanahitaji rehema ya Mungu.—Waroma 3:23.

Wanachukiwa kwa Sababu Wao “Si Sehemu ya Ulimwengu”

Biblia inasema: “Msiwe mkiupenda ulimwengu au vitu vilivyo katika ulimwengu.” (1 Yohana 2:15) Mtume Yohana alikuwa akisema kuhusu ulimwengu gani? Ulimwengu wa wanadamu waliojitenga na Mungu na kujitiisha chini ya Shetani. Yeye ndiye “mungu wa ulimwengu huu.”—2 Wakorintho 4:4, Biblia Habari Njema; 1 Yohana 5:19.

Kwa kusikitisha, baadhi ya wale wanaoupenda ulimwengu huu na njia zake mbaya huwapinga wale wanaojaribu kuishi kupatana na mafundisho ya Biblia. Kwa sababu hiyo, Yesu aliwaambia hivi mitume wake: “Kama mngekuwa sehemu ya ulimwengu, ulimwengu ungependa kilicho chake. Sasa kwa sababu ninyi si sehemu ya ulimwengu, bali nimewachagua ninyi kutoka ulimwenguni, kwa sababu hiyo ulimwengu unawachukia ninyi.”—Yohana 15:19.

Inahuzunisha kama nini kwamba watu wanawachukia watumishi wa Yehova kwa sababu wao hawaupendi ulimwengu huu ambao umejaa ufisadi, ukosefu wa haki, na jeuri na ambao unatawaliwa na Shetani! Watu wengi wanyoofu wanataka kufanya ulimwengu uwe mahali pazuri, lakini hawawezi kuondoa uvutano wa mtawala wake asiyeonekana. Ni Yehova Mungu peke yake anayeweza kumwondoa Shetani—naye atafanya hivyo, kwa kumwangamiza kabisa, kana kwamba kwa moto!—Ufunuo 20:10, 14.

Tumaini hilo zuri ndilo jambo kuu katika “habari njema ya ufalme” ambayo Mashahidi wa Yehova hutangaza ulimwenguni pote. (Mathayo 24:14) Ndiyo, Mashahidi wanasadiki kabisa kwamba Ufalme wa Mungu, yaani, serikali yake itakayosimamiwa na Kristo, ndiyo tu itakayoleta amani na furaha ya kudumu duniani. (Mathayo 6:9, 10) Kwa hiyo, wataendelea kutangaza Ufalme huo, wakitambua kwamba kupata kibali cha Mungu ni muhimu kuliko kupata kibali cha wanadamu.

JE, UMEJIULIZA HIVI?

● Kwa nini Sauli wa Tarso aliwapinga wafuasi wa Kristo?—1 Timotheo 1:12, 13.

● Ni sifa gani mbaya iliyowachochea baadhi ya maadui wa Yesu?—Marko 15:9, 10.

● Wakristo wa kweli wana maoni gani kuhusu ulimwengu?—1 Yohana 2:15.

[Picha katika ukurasa wa 21]

Katika mwaka wa 1945, Mashahidi wa Yehova walitendewa kijeuri na umati huko Quebec, Kanada, kwa sababu ya kuhubiri habari njema ya Ufalme wa Mungu

[Hisani]

Courtesy Canada Wide