Wanataka Marekebisho

NA MWANDISHI WA AMKENI! NCHINI UJERUMANI

“Kama ningekuwa kijana, ningeanzisha harakati za kuleta marekebisho!” akasema Anna, mwanamke mwenye umri wa miaka 80 nchini Ujerumani. “Ungebadilisha nini?” akauliza Robert. “Kila kitu!” Anna akajibu.

WATU wengi wanaweza kukubaliana na Anna. Katika uchunguzi mmoja uliofanywa nchini Ujerumani katikati ya miaka ya 1990, kila watu 2 kati ya 3 waliohojiwa walihisi kwamba ‘marekebisho makubwa na mabadiliko muhimu ya kijamii’ yanahitajika. Huenda hali iko hivyo katika nchi yenu.

Watu wanapotaka mabadiliko, kwa kawaida wao huahidiwa marekebisho. Frederick Hess, profesa-msaidizi wa elimu na usimamizi, aliandika hivi kuhusiana na marekebisho ya elimu: “Marekebisho ni mbinu ya kuwatuliza watu wasio na subira.” Tunasoma kwenye magazeti kuhusu  mabadiliko ya kiuchumi, ya kiafya, ya kilimo, na ya kisheria. Tunasikia kuhusu marekebisho yanayopangwa kufanywa katika elimu, huduma, na magereza. * Pia tunasoma kwamba wafuasi wa makanisa fulani wanataka marekebisho katika mafundisho yao.

Wanaopenda Marekebisho na Wasioyapenda

Kwa nini watu wanataka sana mabadiliko? Sikuzote wanadamu hujaribu kuboresha hali zao. Wamejaribu kufanya hivyo kupitia uchaguzi, kutumia pesa, kutunga sheria, au kutumia mabavu. Hiyo ni kwa sababu wana tamaa kubwa ya kuboresha hali zao maishani, kuwapa watoto wao maisha mazuri ya baadaye, au kufanya jamii iishi kupatana na dhana zao za maadili, haki, na ustawi. Maadamu watu wanang’ang’ana kuondoa ujinga, magonjwa, umaskini, na njaa, sikuzote watataka marekebisho.

Ingawa wengi wanafurahia marekebisho, wengine wana maoni tofauti kuhusu watetezi wa marekebisho na harakati zao. Watu fulani hawapendi mabadiliko yoyote ya kijamii. Wanawaona watetezi wa marekebisho kuwa watu wanaotaka kubadili ulimwengu lakini hawajui hali halisi ya maisha. Kitabu Handbuch der deutschen Reformbewegungen 1880-1933 (Kitabu cha Harakati za Marekebisho Nchini Ujerumani cha mwaka wa 1880-1933) kinasema kwamba watu wanaotetea marekebisho “huchambuliwa, huchorwa vibonzo kwenye magazeti, na kudhihakiwa.” Molière, mwandishi Mfaransa wa michezo ya kuigiza, alisema hivi: “Ujinga mkubwa zaidi ni kutaka kuboresha ulimwengu.”

Wewe unaonaje? Je, marekebisho yanaweza kuboresha ulimwengu? Ama je, watetezi wa marekebisho wanaota tu ndoto? Vipi kuhusu marekebisho yaliyoanzishwa nyakati zilizopita? Je, wanaharakati hao walitimiza malengo yao? Makala zinazofuata zitazungumzia mambo hayo.

[Maelezo ya Chini]