Kijana Anayejivunia Dini Yake

ALIPOKUWA na umri wa miaka 13, Andrew alipewa mradi wa shule uliohusu jamii na utamaduni. Asema hivi: “Kwanza nilinuia kuandika juu ya babu yangu, lakini baadaye nilifikiri: ‘Mimi ni mmoja wa Mashahidi wa Yehova, kwa nini nisiandike juu ya jambo hilo! Hiyo ni nafasi nzuri kutoa ushahidi juu ya imani yangu!’

“Kichwa cha mradi wangu kilikuwa ‘Walisimama Imara,’ na nilitengeneza bango kubwa lililoonyesha jinsi Mashahidi wa Yehova walivyonyanyaswa vikali na Wanazi huko Ujerumani. Vitu vyangu vya maonyesho vilikuwa nguo ya mfungwa yenye ishara ya rangi ya zambarau yenye pembe tatu na picha na barua mbalimbali za familia ya Kusserow. * Niliwapa watazamaji nakala za barua ambayo Mashahidi wa Yehova waliwatumia watawala wa Ujerumani. Barua hiyo ilishutumu matendo yasiyo ya haki dhidi ya Mashahidi wa Yehova bila kuunga mkono upande wowote kisiasa. Video ya Jehovah’s Witnesses Stand Firm Against Nazi Assault ilichezwa mfululizo. Pia, nilikuwa na maonyesho ya Biblia, vijitabu, na trakti mbalimbali.

“Kwanza, wanafunzi na walimu wote walionyeshwa miradi yetu kwenye jumba la michezo. Usiku uliofuata, familia na marafiki wa wanafunzi wakaalikwa. Wengi waliniuliza maswali kwa sababu hawakujua kwamba Mashahidi wa Yehova walinyanyaswa na Wanazi.”

Andrew anakiri kwamba alihitaji ujasiri alipotoa ushahidi juu ya imani yake kwa njia hiyo. Anasema hivi: “Nilijua kwamba watu wangenicheka, lakini ningalisikia vibaya sana kama singalifanya jambo hilo. Katika mradi wangu nilieleza juu ya watu waliokufa walipotetea imani yao katika Yehova, kwa hiyo niliona angalau ningeweza kuvumilia kuchekwa kidogo.”

Mwishowe, Andrew alifurahi kwamba alitumia nafasi hiyo kutoa ushahidi. Anasema hivi: “Niliongea na wengi juu ya sababu inayofanya tukatae kuingia vitani, na niliwagawia watu waliopendezwa Biblia, vitabu, na trakti. Sijawahi kujivunia kuwa mmoja wa Mashahidi wa Yehova kama nilivyofanya wakati huo.”

[Maelezo ya Chini]