Kutoka kwa Wasomaji Wetu

Wembamba Makala yenye kichwa “Vijana Huuliza . . . Kwa Nini Mimi Ni Mwembamba Sana?” ilinipendeza sana. (Septemba 22, 2000) Mimi ni mwanamke mwenye umri wa miaka 32, lakini sikuzote nimekuwa mwembamba sana na huaibika sana kwa sababu ya sura yangu. Nimedhihakiwa katika maisha yangu yote, nikaitwa sindano na mwenye miguu kama ya ndege. Mara nyingi hilo limenifadhaisha. Nilifurahia sehemu iliyosema kwamba twapaswa kuwatafuta watu wanaothamini utu wetu wa ndani. Wakristo hawapaswi kuwadharau wengine kwa sababu ya maumbile yao.

W. L., Marekani

Kubadili Maumbile ya Chembe za Urithi Jana usiku nilisoma ule mfululizo wa makala wenye kichwa “Je, Sayansi Itatokeza Jamii Kamilifu?” (Septemba 22, 2000) Nilienda na gazeti hilo kazini, na hivyo nikawa na mazungumzo mazuri sana pamoja na mwajiri wangu, ambaye ni daktari. Picha zilizokuwa katika gazeti hilo zilimfanya mtu afikiri na ziliongeza uthamini. Asanteni sana kwa muda, fikira, na jitihada mnayofanya ili kutokeza kila picha.

N. M., Marekani

Asanteni kwa kueleza habari iliyo tata kwa njia ambayo kila mtu anaweza kuelewa. Wanasayansi wanapoamua ni nani anayeweza kuzaa na yule “asiyefaa,” mimi hujiuliza ikiwa wao hufikiria sifa kama upendo, huruma, na uthamini kwa mambo ya kiroho. Kuwa na akili nyingi au afya nzuri zaidi hakumaanishi kwamba mtu ni bora zaidi. Hata hivyo, nina swali. Kwa nini utumiaji wa mkono wa kushoto unaitwa kasoro?

J. C., Marekani

Taarifa uliyotaja ilinukuliwa kutoka kwenye kitabu “The Biotech Century.” Neno “kasoro” lilitiwa katika alama za kunukuu, kuonyesha kwamba mwandishi alilitumia kwa utani. Taarifa hiyo inaonyesha baadhi ya magumu ya maadili yanayotokana na kubadilisha maumbile ya chembe za urithi. Wanadamu wakiwa na uwezo wa kubadilisha msimbo wa chembe za urithi, kuna hatari kwamba wengine watatunga sheria zinazofanya maumbile kama rangi ya ngozi au utumizi wa mkono wa kushoto kuwa yasiyofaa.—Mhariri.

Ingawa sipendezwi sana na somo la sayansi, makala hizo zilinigusa moyo. Yujeniki yahusisha juhudi za watu wasiokamilika za kutafuta ukamilifu. Wagonjwa na walemavu wanapofanya yale wanayofikiria, huenda wataonwa kuwa watu “duni.” Hawatahurumiwa. Badala yake, Mungu anaahidi kuwafanya wanadamu kuwa wakamilifu wakati wa Milenia. (Ufunuo 20:4, 5) Lakini atafanya hivyo bila kuingilia uhuru wetu wa kuchagua.

S. O., Japani

Ulimwengu Asanteni sana kwa ule mfululizo wa makala wenye kichwa “Ulimwengu—Je, Ulitokea kwa Nasibu?” (Oktoba 8, 2000) Huu ndio mwaka wangu wa kwanza kama mwanafunzi wa biolojia, na makala zenu zilikuwa kama kitabu—lakini si kitabu cha nadharia ya mageuzi bali kinachozungumza juu ya Muumba mwenye akili. Inapendeza kama nini kuona habari zikielezwa kwa njia sahihi na inayoeleweka!

K. L., Marekani

Simulizi la Maisha Makala yenye kichwa “Hangaiko Langu Kuu—Kudumu Mwaminifu” (Oktoba 8, 2000), simulizi la Alexei Davidjuk, lilinitia moyo sana. Alexei alieleza kwamba mtu aliyekuwa amemwamini kwa miaka mingi aliwasaliti ndugu zake wa kiroho. Miaka mingi iliyopita, nilijikuta katika hali kama hiyo, serikali ilipopiga marufuku kazi yetu ya Kikristo. “Wazee” wawili waliwapa polisi wa siri habari kuhusu kazi yetu. Basi tukakamatwa na kuhojiwa. Mmoja kati ya hao waliodai kuwa ndugu alikufa. Yule mwingine alitengwa na ushirika wa kutaniko. Hata hivyo, alirudishwa karibuni. Ninafurahi sana kwamba sasa ninaweza kumsalimu ndugu huyo bila kuhisi chuki yoyote! Hilo ni jambo linaloweza kutukia tu kwa roho ya Yehova.

D. G., Ujerumani