Familia Zisizo na Baba-Ni Ishara ya Nyakati

UNGESEMA ni tatizo lipi la kijamii lililo la pekee zaidi siku hizi? Takriban asilimia 80 ya watu waliotoa maoni katika uchunguzi wa Gallup uliofanywa Marekani, huamini kwamba “ni kukosekana kwa baba nyumbani.” Kulingana na uchunguzi huo wa Gallup, zaidi ya watoto milioni 27 huko Marekani hawaishi pamoja na baba zao halisi, na idadi hiyo inaongezeka haraka. Ripoti moja ya Hazina ya Watoto ya Umoja wa Mataifa yasema kwamba karibu asilimia 50 ya watoto wazungu waliozaliwa Marekani tangu mwaka wa 1980 “kwa miaka kadhaa ya utoto wao wataishi katika familia yenye mzazi mmoja. Kwa watoto weusi kiwango hicho ni karibu asilimia 80.” Hivyo kichapo USA Today kilitaja Marekani kuwa “nchi inayoongoza ulimwenguni kwa kuwa na familia zisizo na baba.”

Hata hivyo, makala moja katika The Atlantic Monthly yasema: “Kuongezeka kwa mvurugo wa familia hakukumbi tu jamii ya Marekani. Mvurugo huo uko karibu katika nchi zote zilizositawi, kutia ndani Japani.” Na ingawa ni vigumu kupata takwimu, nchi nyingi zinazositawi zinakabili tatizo hilo hilo. Kulingana na gazeti World Watch, “watu [katika nchi maskini] mara nyingi huacha wake zao na watoto wao kwa sababu ya kuongezeka kwa mikazo ya kiuchumi.” Kwa kweli, uchunguzi katika nchi moja ya Karibea ulifunua kwamba ni asilimia 22 tu ya akina baba wenye watoto walio na umri wa miaka minane ndio kwa kweli walioishi na watoto wao.

Watoto wasio na baba walikuwako pia hata katika nyakati za Biblia. (Kumbukumbu la Torati 27:19; Zaburi 94:6) Hata hivyo, huko nyuma, sababu kuu iliyofanya vijana waishi bila baba ilikuwa kifo cha baba. “Leo,” asema mwandishi David Blanckenhorn, “sababu kuu ya kuwa bila baba ni kuachwa na baba.” Kwa kweli, kama tutakavyoona, kuongezeka kwa watoto wasio na baba huthibitisha kwamba watu wengi leo hawana “shauku ya kiasili.” Kulingana na Biblia, huu ni uthibitisho mwingine zaidi kwamba tunaishi katika “siku za mwisho.”—2 Timotheo 3:1-3.

Hata hivyo, unakuwa msiba kwa watoto wachanga kuachwa na baba maishani. Hutokeza maumivu makali na mfadhaiko unaoweza kuwa na matokeo yatakayodumu kwa muda mrefu. Kwa hiyo, katika mfululizo huu wa makala tutazungumzia zoea hilo, si ili kuwavunja moyo wasomaji, bali kuandaa habari inayoweza kusaidia familia zikomeshe mwelekeo huo wenye kuleta uharibifu.