“Nilipopambana na hisia za kujiona sifai, Yehova alinitia moyo kwa kutumia nyimbo zilizo kwenye JW Broadcasting^®.”—Lorraine, Marekani.

Sikuzote “nyimbo za kiroho” zimekuwa sehemu ya ibada ya Kikristo. (Kol. 3:16) Ukikariri nyimbo hizo, zinaweza kukusaidia hata usipokuwa na kitabu cha nyimbo au kifaa cha kielektroni. Madokezo yafuatayo yatakusaidia kukariri baadhi ya nyimbo.

• Soma maneno ya wimbo kwa makini ili uelewe maana yake. Ukielewa maana ya jambo fulani, utalikumbuka kwa urahisi. Maneno ya nyimbo zetu zote, kutia ndani nyimbo zilizotungwa na nyimbo kwa ajili ya watoto, yanapatikana katika jw.org. Kwenye sehemu ya Maktaba, nenda kwenye Muziki.

• Andika kwa mkono maneno ya wimbo. Kufanya hivyo kutakusaidia kukumbuka vizuri zaidi nyimbo hizo.—Kum. 17:18.

• Fanya mazoezi kwa sauti. Soma au imba wimbo huo mara kwa mara.

• Pima kumbukumbu yako. Jaribu kukumbuka maneno ya wimbo bila kuyatazama, na kisha uangalie kama umefanikiwa kukumbuka maneno yote.