“Msihangaike kuhusiana na jambo lolote, bali katika kila jambo kwa sala na dua pamoja na kutoa shukrani, mjulisheni Mungu maombi yenu; na amani ya Mungu inayozidi uelewaji wote itailinda mioyo yenu na nguvu zenu za akili kupitia Kristo Yesu.”—Wafilipi 4:6, 7, Tafsiri ya Ulimwengu Mpya.

 “Msijisumbue kwa neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.”​—Wafilipi 4:6, 7, Union Version.

 Waabudu wa Mungu wanaweza kusali kwake na kupata amani badala ya kuwa na wasiwasi mwingi au mahangaiko. Anaahidi kuwapa amani ya moyoni, ambayo itawasaidia kukabiliana na mahangaiko yao na kulinda fikira na hisia zao. Mstari wa 6 unafafanua aina za sala ambazo zinaweza kuwasaidia wapate amani hiyo.

 Dua ni sala ya kuomba msaada inayotolewa kwa hisia nyingi. Mtu anaweza kutoa dua kwa Mungu anapokuwa na mkazo au hatarini, kama Yesu alivyofanya. (Waebrania 5:7) Sala za aina hii hutolewa kwa kurudiwa-rudiwa.

 Maombi ni sala ambazo mtu hutoa ili kumwomba Mungu jambo fulani hususa. Waabudu wake wanaweza kutoa maombi “katika kila jambo” au “katika kila neno.” Lakini Biblia inaonyesha kwamba sala hizo zinapaswa kupatana na mapenzi ya Mungu.—1 Yohana 5:14.

 Sala za shukrani ni sala ambazo mtu hueleza jinsi anavyothamini mambo ambayo Mungu amefanya na ambayo atatufanyia. Tunapokazia fikira sababu za kumshukuru Mungu, jambo hilo hutuletea furaha.​—1 Wathesalonike 5:16-18.

 Mungu anajibu sala hizo kwa kuwapa waabudu wake amani. “Amani ya Mungu” ni utulivu ambao unatokana na urafiki wa karibu pamoja na Mungu. (Waroma 15:13; Wafilipi 4:9) Amani hiyo ‘inazidi uelewaji wote’ kwa sababu inatoka kwa Mungu na inaweza kutusaidia kuliko tunavyoweza kufikiri.

 Mstari huo wa Biblia unasema kwamba amani ya Mungu inaweza kulinda mioyo yetu. Neno la Kigiriki lililotafsiriwa “itailinda” ni neno lililotumika katika jeshi kufafanua kile ambacho kikosi cha jeshi kingefanya ili kulinda jiji lililozungukwa na kuta ndefu. Vivyo hivyo, amani ya Mungu hulinda hisia na akili ya mtu. Humsaidia kutolemewa na matatizo.

 Amani ambayo Mungu anatupatia inatulinda “kupitia Kristo Yesu,” kwa sababu kupitia Yesu tunaweza kuwa na uhusiano na Mungu. Yesu alitoa uhai wake ukiwa dhabihu kwa ajili ya dhambi zetu. Tunaweza kufurahia baraka za Mungu tukiwa na imani katika Yesu. (Waebrania 11:6) Tunaweza pia kusali kwa Mungu kupitia Yesu. Yesu alisema hivi: “Hakuna mtu anayekuja kwa Baba bila kupitia kwangu.”​—Yohana 14:6; 16:23.

 Kitabu cha Biblia cha Wafilipi ni barua iliyoandikwa na Mtume Paulo kwa Wakristo waliokuwa wakiishi katika jiji la Filipi. a Katika sura ya 4 ya kitabu hicho, Paulo anawatia moyo ndugu na dada katika kutaniko washangilie, na anawashukuru kwa ukarimu wao uliomletea shangwe. (Wafilipi 4:4, 10, 18) Anataja pia jinsi sala inavyoleta amani ya Mungu, na mawazo na matendo yanayofaa ambayo yatatusaidia kupata msaada kutoka kwa “Mungu wa amani.”​—Wafilipi 4:8, 9.