Kati ya mwaka wa 1990 na 2015, idadi ya talaka kati ya watu wenye umri wa miaka 50 au zaidi iliongezeka maradufu nchini Marekani, na idadi ya talaka kati ya watu walio na umri wa zaidi ya miaka 65 iliongezeka mara tatu. Ni nini kinachosababisha talaka za uzeeni? Unaweza kuilindaje ndoa yako isiathiriwe?

Katika makala hii

•  Ni nini ambacho husababisha talaka ya uzeeni?

•  Unaweza kufanya nini?

•  Mwongozo wa mazungumzo

•    Mara nyingi, uhusiano wa wenzi wa ndoa wenye umri mkubwa ulianza mapema sana kudhoofika hatua kwa hatua. Baada ya muda, wanaanza kusitawisha mapendezi tofauti kisha wanakosa kufurahia mambo pamoja. Au baada ya watoto wao kuwa watu wazima na kuondoka nyumbani, wenzi hao wanatambua kwamba wamekuwa wakizingatia zaidi majukumu yao ya kuwa wazazi kwa muda mrefu sana hivi kwamba wamesahau jinsi ya kuwa mume na mke.

•    Katika miaka ya karibuni, watu wanaodai kuwa wataalamu wamekuwa wakiwashauri wenzi wa ndoa watangulize hisia zao binafsi kwa kujiuliza: ‘Je, ndoa yangu inanifurahisha?’ ‘Je, inanifanya niwe mtu mzuri zaidi?’ ‘Je, mwenzi wangu wa ndoa anatosheleza mahitaji yangu ya kihisia?’ Ikiwa hafanyi hivyo, wataalamu hao wanasema, jitangulize wewe na hisia zako, yaani, mtaliki mwenzi wako na uanze maisha yako upya.

•    Watu hawaioni talaka kuwa jambo baya tena. Mwanasosholojia Eric Klinenberg aliandika hivi: “Miaka ya nyuma, ikiwa mtu hakufurahishwa na mwenzi wake wa ndoa na alitaka talaka, ilibidi atoe sababu nzuri za kuchukua hatua hiyo. Lakini leo ni kinyume kabisa: Ikiwa huridhishwi na ndoa yako, unapaswa kutoa sababu nzuri kwa nini unaendelea kukaa katika ndoa hiyo, kwa sababu leo watu wanaamini jambo muhimu zaidi ni kufanya kinachokufaa wewe.” a

 Ukweli ni kwamba talaka sio mwisho wa matatizo, badala yake ni mwanzo wa matatizo mengine mapya. Kwa mfano, uchunguzi mmoja ulionyesha kwamba “talaka ya uzeeni huvuruga mtu kiuchumi, hasa wanawake.”

 Kuna jambo lingine la kufikiria. Kitabu Don’t Divorce kinasema hivi: “Hata ukijaribu kubadili maisha yako, wewe bado ni mtu yuleyule. Umefanya nini kubadili njia yako ya kuwasiliana na wengine, kwa kuwa ni wazi hukufaulu kuwasiliana na mwenzi wako wa ndoa? Umefanya nini ili kubadili jinsi unavyoshughulikia hali ya kutoelewana?” b

•   Kubali mabadiliko. Hakuna uhusiano ambao hubaki vilevile sikuzote. Huenda uhusiano wako na mwenzi wako umebadilika kwa sababu watoto wenu waliondoka au kwa sababu mapendezi yenu nyote wawili yamebadilika. Badala ya kung’ang’ania mambo yalivyokuwa zamani, jaribu kuboresha mambo yalivyo sasa.

   Kanuni ya Biblia: “Usiulize: ‘Mbona siku za zamani zilikuwa bora kuliko hizi?’ kwa maana hukuuliza hivyo kwa hekima.”​—Mhubiri. 7:10.

•   Jengeni urafiki wa karibu. Je, unaweza kuonyesha upendezi katika mapendezi ya sasa ya mwenzi wako, au je, unaweza kumwalika mwenzi wako ashiriki katika jambo unalopenda kwa sasa? Je, mnaweza kuwa na jambo moja mnalopendezwa nalo sasa ambalo mnaweza kulifurahia kwa pamoja? Lengo lenu linapaswa kuwa kutumia wakati pamoja, ili wewe na mwenzi wako mhisi mko katika ndoa badala ya kuhisi kama watu wanaotumia chumba kimoja tu.

   Kanuni ya Biblia: “Kila mmoja na aendelee kutafuta, si faida yake mwenyewe, bali faida ya yule mtu mwingine.”​—1 Wakorintho 10:24.

•   Muwe na zoea la kuzungumza kwa njia nzuri. Usimpuuze mwenzi wako eti kwa sababu mmeishi pamoja kwa muda mrefu. Ongea kwa heshima, na ujitahidi kuonyesha adabu uliyoonyesha mlipokuwa mnachumbiana. Tumia maneno kama “tafadhali” na “asante.” Mwonyeshe mwenzi wako upendo, na umwambie unathamini mambo anayokufanyia.

   Kanuni ya Biblia: “Mtendeane kwa fadhili, huruma nyororo.”​—Waefeso 4:32.

•   Kumbukeni pindi nzuri mlizokuwa nazo. Tazameni picha zenu za harusi pamoja, au mwangalie picha za matukio mengine mliyofurahia pamoja. Kufanya hivyo kunaweza kuwasaidia kudumisha au kurudisha tena upendo na heshima katika ndoa yenu.

   Kanuni ya Biblia: “Kila mtu kati yenu anapaswa kumpenda mke wake kama anavyojipenda mwenyewe; kwa upande mwingine, mke anapaswa kumheshimu sana mume wake.”​—Waefeso 5:33.